Read turkana Ngipilipi 2 Bible Online

Ngipilipi 2 - turkana bible

Ngipilipi 2

¹Abala ayong esi a, etenikin eboyor kus ani a Kiristo a, nabo atikoki amina keng ngitai kus a? Abala ayong esi a, kitiliwo esi Etau a Akuj ngipei a? Isienonosi esi make ani ichamatar a?

²Kitemokisi alakara kang ani iliworotor ngitunga a ngitamen a ngipei, imoreta amina apei nabo tarata ngipei alotai ka ngitamen kus.

³Warasi nyiisuba ibore idio a adinga ana ibolotor kori ni kiterekuyaritor atamar kiteyenikin, nakaneni kitiditeunos esi ani eya luche, erai itamito jiik atamar ejokak luche kidwangito esi.

⁴Nakaneni nyiirichut ngakiro na eraakasi ngakus make, kirichutu tani na a ngitunga aluche.

⁵Kikokis ngakiro na iwapito esi aloboyor kus napei kolong ewapit Yesu Kiristo:

⁶Tani na ayakar eboyor a Akuj ngirwa daang, nyeneikina ngesi a ekileenu keng, aliwor lo ikwaan ka Akuj.

⁷Akidwang nguna, tajal ngesi daang na atingit, sodi kikwaanikinos ka ekedalan. Kikok ngesi itwaan, sodi tatakanu a ekikwaane a itwaan.

⁸Etiditeuna ngesi arai lo iwapit ngakiro daang tanang akolongit na a akitu keng, na atoanea ngesi anapir.

⁹Kotere nguna, kiteyaru Akuj ngesi kikea kiwaak kidiama noi, sodi nak ngesi ekiro lo idwangit ngirora daang.

¹⁰ Sodi ngisubuna daang lu eya nadis ka ngitunga lu eya nakwap ta lu eya tooma nalup, toriediko alongaren Yesu, idodiunito arimatoi anikeng.

¹¹Elimuni angajep daang atamar erai Yesu Kiristo Ekapolon, kotere apolou a Akuj Apa.

¹²Tokona bocha ngipaalon luminan, kona kolong iwapitotor esi ngakiro kang jiik nakirukitor ayong ka esi, ejoikinit tokona esi iwapete ngakiro kang lokojokon ani tokona nyikirukitor ngoni. Torubakisi isubete etich iemito, tamaranete sodi kiyookineto ayuuno kus.

¹³Kainyo esubi Akuj jiik etich anikus akitachamun esi ka akisiwap esi na esaki ngesi.

¹⁴Tosuba ngakiro daang emam enguringur ka eburas,

¹⁵sodi toliworotor esi lu nyisechito nabo nyimodeaka, ngide a Akuj lu ikiuna, lu ibooyete anakwapea ana eyakasi ngitunga lua nginyas, lukasechak. Ejoikinit esi imaunete anikech loger lo imaunitotor ngikanyer anakwap,

¹⁶ itionikinito akiwapit ngakiro naajokak a akiyar. Ani kikokis esi neni, etakanunete ngakiro na enisar ayong kotere esi akolongit na Kiristo, kainyo itodiunete nguna atamar akiricha nakolong ericha ayong ka etich lo asubi, nyeliworosi ngika pas.

¹⁷Kori dikino ngaakot kang ebukorio toliwor akipeyos a ngalemunet ana ilemunito esi ani inupitotor Akuj. Ani robo kikote neni, alakara ayong nabo kilakara ka esi daang aapei.

¹⁸Aloger alopei kangolo, ejoikinit esi dang ilakarosi sodi atalakar ayong dang ka esi aapei.

¹⁹Ani kerai echami a Ekapolon Yesu, etamit ayong atamar apedori ameun Timoteo nikus atipei, sodi atalakaror ayong eirari ngakiro kus.

²⁰Ngesi bon kimina esi loger lo kaminar ayong nabo ngesi emina aweikinit ngakiro kus.

²¹Irichito ngitunga luche daang ngakiro kech a ngikulepek, nyekachito etich a Yesu Kiristo.

²²Iyenete esi ngikulepek eger eteniyoto ngakiro a Timoteo, kisub ayong ka ngesi etich a ngakiro ana ajokak aapei, loger a ikoku ka apakeng.

²³Kotere nguna, ameuni ayong ngesi nikus napei ayenea atamar ikokinete ngakiro kang ai.

²⁴Etamit ayong atamar kengarakini Ekapolon Yesu abu ayong elope nikus atipei.

²⁵Engolik ayong atamar echamit ameuni lokaatoyok Epapirodito nikus. Erai ngesi lo kisubi ka ayong etich aapei kitiji Ekipe, nabo arai ngesi emeuna kus lo kengarakini ayong ngiboro lu echana.

²⁶Iburakinit ngesi aanyun esi daang noi nabo ialolongi ngesi kainyo iirasi esi atamar adeaka ngesi.

²⁷Adeaka ngesi iteni dir akot tani akitu. Nakaneni kisieni Akuj ngesi, nakaneni meere ngesi bon, kisieni Akuj tani ayong, sodi nyealolongio ayong noi.

²⁸Keburakinit ayong noi ameun ngesi nikus sodi talakaros esi nabo na ianyungareta ngesi, sodi atojongo ayong akialolong.

²⁹Kitepeyono robo ngesi a alakara kadaang, ani eraakar lokaatokus ani a Ekapolon. Kidodiutu arimatoi alotunga kadaang alu ikote ngesi,

³⁰kainyo ajali ngesi akiyar keng sodi tonyou akitu kotere etich a Kiristo, sodi kengarak ngesi ayong a erot alo peipedorete esi ani ilokiata.