Read turkana Ngipilipi 3 Bible Online

Ngipilipi 3 - turkana bible

Ngipilipi 3

¹Eya daang ngikaitotoi kang, talakaros ani imorikinitor esi aapei ka Ekapolon Yesu. Nyakaburuni abongokin nakolong sek egiri, kainyo kiyuunete nguna esi.

²Tochoikinos alotunga alu esubete ngakiro naaronok, alu ikote ngingokwo, ngitunga lu eneikina adungudung ngawat.

³Ngoni kianyu akilengero na iteni, meere kesi. Kainyo kilipit Akuj a Etau keng, nabo kilakara ani kimorikinor aapei ka Yesu Kiristo. Nyikigieno ngakiro na a akwaan anikalapatan.

⁴Arai atasaki, kegienokin ayong dang ngakiro na ikote nguna. Ani kitamit itwaan atamar egienokin ngakiro a akwaan anikalapatan, erai ayong echamit ekokini neni noi.

⁵Kelengerio ayong akolongit na a ngikan-kauni nakedounere. Kedounio ayong arai Esiraelit, lo a ekitela a Benjamen, arai Eburaniait lokadir. Ani alowae alo erai eka akiwapit etal, arai ayong Eparisayot,

⁶nabo erichakina ayong lokojokon noi atoboliar tani ngitunga a ekanisa. Arai tarai itwaan ni etenoono eboyor keng kotere ni iwapitor ngitalio, kemam ayong ibore asechit.

⁷Nakaneni daang nakolong etamit ayong atamar eraakasi ngakajokak, engolik ayong atamar eraakasi ngapasiek kotere Kiristo.

⁸Meere nguna make, emarunit ayong ibore daang atamar erai pas kotere ibore niajokon noi, ni erai ngesi akiyen Yesu Kiristo, Ekapolon kang. Alung ayong ngiboro daang kotere ngesi, ekokis daang anikang ngachin, sodi ataanyunea ayong Kiristo

⁹nabo emorikinotor ka ngesi jik. Nyeringa nabo ayong asaki ateneanut na ewapitor etal, aanyu tokona ayong ateneanut na itorunit nanupit ngakiro a Kiristo. Ateneanut na itorunit nia Akuj na erai aka anupit.

¹⁰Daang na asaki ayong ngesi akiyen Kiristo ka aanyungar agogongu a ayarun keng, aboliaro ka ngesi aapei ka akikwaanikin ka ngesi anakitu keng,

¹¹ erai egieno atamar keteyarunio ayong dang.

¹²Nyewoga ayong abala epiu daang arumor kori aliwor lo ekiuna. Arubakinit erichakina sodi ataanyunea ebachit lo ketiliworea ayong Kiristo ekeng.

¹³Tarai bocha dir ngikaitotoi kang, nyetamit ayong atamar aanyu ayong ebachit ngolo. Erai ibore ipei ngesi asubi ayong, kemuriakinete ayong na eya naabor kang, sodi erichakin aanyun na eya ngaren kang.

¹⁴Nakaneni akeri ayong ngaren asaki aanyun ebachit, lo erai ngesi kitaanyunitor Akuj akiyar na a alokidiama ani a Yesu Kiristo.

¹⁵Echamit ngoni lu kitenikin dir alokiristoonu yok ikokinete ngakiro yok neni. Nakaneni ani kegelaaka ngakiro itamete ngiche kus, isileereuni Akuj nguna anikus.

¹⁶ Kanguna kadaang, atotena ngaren a ngitalio alusek ngoon kiwapit tanang tokona.

¹⁷Ngikaitotoi kang, torubakisi kisisaate ayong. Kona kidodikinea sua esi ekitetemes loajokon, topupo ngakiro alu iwapito ekitetemes ngolo.

¹⁸Kalimok kolong sek ayong esi ngakiro nguna ngalimokinet ngakaalak, abongokini tokona nabo egoro, eya lukaalak lu eremokino aloboyor kech Kiristo lo aramakinio napir.

¹⁹Edaikin ngulu daang lonyas, ngakookies kech kesi eraakasi akuj kech. Inisatar kesi ngakiro na eraakasi ngileech, eraakasi ngakiro a eboyor aloaronon bon itamete kesi.

²⁰Nakaneni kirai ngoni ngitunga a adis, kimuit noi Ekapolon Yesu Kiristo ebuni anadis.

²¹Ilochi ngesi ngawat yok napalag na epedorete akitu sodi kisikok akwaan keng a apolou, kotere agogongu na echunakinea ngesi ibore daang topolokinio.