Read turkana Ngipilipi 4 Bible Online

Ngipilipi 4 - turkana bible

Ngipilipi 4

¹Tokona bocha ngikaitotoi kang luminan, kamina ayong esi noi nabo edakuna etau kotere esi! Alakara ayong noi kotere esi nabo enisa kotere esi! Ngikaitotoi luminan, ejoikinit esi irubete itionikinito eboyor kus ani a Ekapolon kongina.

²Kemaimai ayong esi Eudia ka Sunitike atamar tachamunos kare ani iraakatar ngikaitotoi ani a Ekapolon Yesu.

³Ani iyong dang lokaatokang lokamuno, asaki ayong iyong kingarak ngaberu nugu, kainyo kisub ayong ka kesi etich lokojokon kitatami ngakiro naajokak, ka Kilemenit aapei ta ngirukitos luche daang kisubea etich, lu igiritae ngirora kech nakitab a Akuj na a akiyar.

⁴Agasi atamar talakaros esi jiik ani imorikinotor ka Ekapolon aapei. Alimunit ayong nabo, talakaros!

⁵Tapataketa alotunga kadaang. Aapiki Ekapolon Yesu abunere!

⁶Warasi nyiiriabasi kotere ibore idio, nakaneni anakilipet kus kadaang, kilipa Akuj ibore ni isakete esi, kilipeeneta jiik a ngitai alu idodiunito alakara.

⁷Sodi ekisil a Akuj, lo idwangit ngaososio daang a ngitunga, tochoik ngitai ka ngitamen kus niajokon ani imorikinotor aapei ka Yesu Kiristo.

⁸Ani eya daang ngikaitotoi kang, kimiekisi ngitamen kus toupiasi ngakiro naajokak na erikito ekipur, ngakiro na iteni, na iyookino, na ikiuna, naajokak ta na idodiunito arimatoi.

⁹Kiwapa nakolong itatamasi esi toyena anikang, napei alokiruor kang tanang tani na asubeene ayong. Sodi kiruko esi ka Akuj na kitaanyuununi esi ekisil.

¹⁰Aloboyor kang alo kimorikinor aapei ka Yesu Kiristo, alakara ayong noi kotere esi. Kainyo adaunet a ngirwa a ngikaalak, ipot esi nabo kidodiut atamar eringa kitamunito. Nyabala ayong ipotu kolong esi tapalikis akitan ayong, amam esi kona idodiunete.

¹¹Nyalimunit ayong nugu ani eitanitor ibore idio, kainyo etatama kolong ayong atamar ketemokino ibore ni atingit.

¹²Ayen ayong eboyor lo eboikin keboosit kori abarit. Etatama ayong ngakiro namunonoe nguna, sodi ani a wadaang ka esaa daang, atoliwor ayong lo ketemokino ibore erai emwonit kori kanyamit akoro, arai atingit ibore nikaalan noi kori niichi noi.

¹³ Eyei ayong ationis na asubea ngakiro daang kotere agogongu naketaanyuni Kiristo.

¹⁴Nakaneni, isubete esi niajokon ani kingarakineta ayong alochan kang.

¹⁵Iyenete esi Ngipilipi dir atamar nakolong arotokinio ayong alo Makedonia ngirwa lukolong esiakinea ayong akitatam Ngakiro Naajokak, esi make iraakasi ngitunga a ekanisa lu kingarakinete ayong. Arai esi make kiinanakinete ayong ngaropiyae na echana.

¹⁶Ngirwa ngikaalak, kiinunete esi ayong ngaropiyae na echanar ngaropiyae alo Tesalonike.

¹⁷Meere atamar asaki ayong aanyuunun ngaropiyae, pearai asaki ayong talalaketa ngitichisio luajokak kilimitere esi.

¹⁸Aanyu tokona ayong ngiboro daang lu ayaunio anikus, nabo elalak kesi noi idwangito tani lukolong eitanit ayong! Etemokin tokona ngiboro daang lukolong asaki ayong nangoon kainunea Epapirodito ngainakinet kus. Ikote kesi ngalemikinet nakakukunyok elemikinitae Akuj, ngakipeyos naajokak, echamunit Akuj.

¹⁹Kiinakini esi Akuj kang ibore daang ni isakete alobari keng aloationon noi, kisitoru nia Kiristo.

²⁰ Eliwor apolou nakajik aka a Akuj yok ana erai Apa! Aamen.

²¹Emalae ngitunga daang lu eraakasi ngika Akuj ani eraakatar ngika Yesu Kiristo. Kimalaate esi ngikaitotoi lu kirukit ka ayong kane.

²²Kimalaate esi ngitunga a Akuj daang lu kirukit ka ayong kane, tarai cha noi lu eraakasi ngika akai a ekapolon a Ngiroma.

²³Agasi atamar kiruko esi daang ka ajokis a Ekapolon yok Yesu Kiristo.