Read turkana Ngikolosai 1 Bible Online

Ngikolosai 1 - turkana bible

Ngikolosai 1

¹Erai ayong Paulo lo arai emeanara a Yesu Kiristo kotere echami a Akuj, ta lokaatoyok Timoteo kigirunit abarua naga.

²Kigirakinit esi ngitunga a Akuj lu iyakasi Kolosai, lu iraakasi ta lokaatokosi lu kimuno sua ani kiliworor ngipei ani a Kiristo. Kigasi atamar kitaanyu esi Akuj Apayok ajokis ka ekisil.

³Kibuanakini sua Akuj na erai Apakeng a Ekapolon yok Yesu Kiristo alakara jiik nakilipanakinea sua esi.

⁴Kainyo kiira sua eger lo inupitotor esi ngakiro a Yesu Kiristo ka eger lo iminatar esi ngitunga a Akuj daang.

⁵Nakolong sek isiauneta esi akiirar Ngakiro Naajokak na iteni, ipot esi kiirasi atamar eyei ibore nikigieno ngoni atamar kianyuni. Nakaneni iwapap ibore ngini kidekinitae ngoni anadis ka anupit ta amina yok.

⁶Erubakinito Ngakiro Naajokak irokete apiaro nabo epetar anakwapea kadaang, loger lokolong apetarotor anikus napei kolong a akolongit ana a ekingaren iirareta esi ngakiro a ajokis a Akuj sodi toyenut dir eger lo ikote.

⁷Itatamasi kolong esi ngakiro na a ajokis a Akuj ani eyei Epapuras, erukitos kosi lokimina sua noi. Erai ngesi lo esubi etich a Kiristo emunokinitae, kotere sua.

⁸ Kilimok ngesi sua ngakiro a amina ana kitaanyu esi Etau a Akuj.

⁹Kotere nguna, kilipanakini sua esi jiik napei kolong kiirarea ngakiro kus. Kilipit sua Akuj kileleb esi aosou ka achwaanu toyena ngakiro na echamit ngesi, nabo kitaanyu esi aosou ka akeleanut na itorunit nia a Etau a Akuj.

¹⁰Sodi topedoreta esi akiboi loger lo esaki Ekapolon nabo tosubeta jiik na ejoikinito ngesi. Itorunete ngakiro naajokak nagelagelae loboyor kus, nabo iyenunete esi Akuj lokojokon noi.

¹¹Agasi atamar togogongioto esi a ationis ana itorunit napolou a Akuj, sodi tanaikineta esi ngakiro daang ititinyikinito.

¹²Sodi nabo talakaros ibuakinito Akuj alakara. Akuj nakolong kimarakini esi dang nakiro nakolong etiliworit ngesi ngaka ngitunga keng, Anapolou ana a akicha.

¹³Kiyuuni kolong ngesi ngoni anationis a aribu, sodi kiwaak ngesi ngoni niajokon nia a apolou a lokookeng alominat,

¹⁴ lo erai ngesi kilachakinere ngoni, ngesi atamar, kitorimakinere ngoni ngasechesea yok.

¹⁵Erai Kiristo ekikwaane lo etakani a Akuj ana nyetakani. Ngesi erai Lokookeng a Akuj lo ekingaren, lo epolot idwangit ngiborei lusubuna daang.

¹⁶Kainyo ngesi kolong asubea Akuj ibore daang ni eyei nadis ka nakwap, ngiboro lu etakanete ka lu nyetakanete, imorikina aapei ka ngationisio a adis, ngikapolok, ngikarikok ta lu eweikinito akwap. Asubi kolong Akuj ibore daang anikeng, kotere ngesi.

¹⁷Ayei kolong sek Kiristo eringa ibore daang nyesubuna. Eyei ibore daang nipalem sek eyei ani imoratar ka ngesi.

¹⁸Ngesi erai akou a akwaan keng, ana erai ngitunga a ekanisa, isiakinit akiyar a akwaan anikeng. Ngesi erai Edia lo ekingaren lo ayaruni, sodi toliworor ngesi lo ingareni aloboro kadaang.

¹⁹Kainyo atiakuni kolong Akuj alope atamar eyei ateneanut daang a Akuj ni eyei Lokookeng.

²⁰ Sodi totiaku Akuj atamar kotere Lokookeng, echamun ngesi ka ngitunga daang a akwap, kainyo esili Akuj kotere ngaakot a Yesu na abukorosi anapir, tachamunos ngesi ka ngiboro daang lu eya nakwap ka nadis.

²¹Iloka kolong esi dang ani a Akuj nabo iraakasi esi ngimoe kotere ngakiro naaronok na isubete esi kitamete.

²²Nakaneni, kotere ni atoanea Lokookeng, kitiliwo Akuj esi ngipaalon keng sodi kiyaunea esi nikeng iraakasi lubekon, lu ikiuna ka lu emam akisech.

²³Ejoikinit bocha esi irubakinete aloboyor alo etenoono eriyan nabo nyejoikinit esi kiteriangakinio anakigieno ana kolong ianyunete esi na iirareta Ngakiro Naajokak. Ngakiro Naajokak nguna ngesi araakar ayong Paulo ekasuban etich, Ngakiro Naajokak na etatam ngitunga daang anakwap.

²⁴Alakara tokona ayong kotere ni kaboliare kotere esi. Kainyo ariaba nakariabea ayong akwaan, engarakinit akiyookin na iituno ani aboliare Kiristo kotere akwaan keng, ngesi ngitunga a ekanisa.

²⁵Aliwor ayong ekasuban etich a ngitunga a ekanisa a Akuj, ana ketaanyuni ayong akisub etich lo kengarakinitor esi. Etich ngolo ngesi lo a akitatam ngakiro keng lokojokon,

²⁶ngakiro nguna ngesi nakolong emunonit ngesi nakanuan alotunga kadaang, nakaneni edodik tokona ngesi ngitunga keng.

²⁷Ereat Akuj atamar etoyen ngitunga keng ngakiro keng namunonoe na etionio apolou na erai aka ngitunga kadaang. Nakaneni ngakiro namunonoe ngesi na atamar eyei Kiristo nikus, idodiunit ibore ngini atamar ianyunete esi dang apolou a Akuj.

²⁸Nakaneni kitatami sua ngakiro a Kiristo anitwaan kadaang. Kikilanakini nabo kitatami itwaan daang a aosou kadaang, sodi ayauneta itwaan daang nia Akuj erai ni etenikin eboyor keng ani emorikinotor ka Kiristo.

²⁹Kotere nguna, asubi ayong etich, ericha, a ationis anakaagongon ketaanyunit Kiristo ana esubi etich anikang.