Read turkana Ngikolosai 2 Bible Online

Ngikolosai 2 - turkana bible

Ngikolosai 2

¹Asaki ayong esi toyena eger lo erichar ayong asubi etich anikus, kotere ngitunga a Laodikea ka luche daang lu eringa nyiriemuna ka ayong.

²Asubi ayong kongina sodi totitinyekerotor kesi noi nabo toliworotor ngipei a echami sodi kitenikinor eboyor kech lokojokon ani eyeneta na eraakasi ngaka iteni dir. Kotere eger ngolo, eyenete kesi ngakiro namunonoe a Akuj, na eraakasi Kiristo elope.

³Ngesi erai engaet lo engauni aosou ka achwaanu naajokon noi na idait Akuj.

⁴Tokona, kalimokinit ayong esi atamar warasi nyikingal esi itwaan idio a ngakiro ana eraakasi alioko, tani kesibit ejokak kwaani.

⁵Kainyo, tani kalona ayong anikus a akwaan, kirukit ayong ka esi a etau. Nakaneni alakara ayong noi ani eteeo eboyor kus etenoono lokojokon ani iraakatar esi ngipei inupito Kiristo.

⁶Kona ichamuneta esi Yesu Kiristo lo erai Ekapolon, kiboyoto irukito ka ngesi aapei.

⁷Tosubutu lu ilijakina ngaten tooma keng. Totionikisi akiboi anikeng nabo togogongioto ananupit kus loger lokolong kitatamere. Toliworos lu ileleba alakara.

⁸Tochoikinos robo warasi itwaan idio nyikirik esi kotere engalas lopasit a aosou a ngitunga, lo itorunit nakitatameta na ikobete ngitunga eraakasi ngaka ngipean alu a akwap, nyitorunito nia Kiristo.

⁹Kainyo eyei eboyor daang lo a Akuj nakwaan a Kiristo,

¹⁰ nakaneni kitaanyun akiyar daang ani imorikinotor esi ka ngesi. Epolot ngesi noi idwangit ngipean daang ka ngikapolok daang.

¹¹Kilenger esi ani imorikinotor aapei ka Kiristo. Meere kotere akilengero na a ngitunga, nakaneni erai akilengero na Kiristo, ana erai alachakino anagogongu a eboyor alo a ngasechesea.

¹²Kainyo kinukio ka Kiristo anakibatisare, anakibatisare anapei kangina, iyarut esi ka Kiristo aapei ani inupitotor atamar etiono noi Akuj na eteyaruni ngesi.

¹³Iraakasi kolong esi ngitunga lu imudukaka alotai kotere ngasechesea kus ka nabo ni iraakatar esi ngibukui lu nyerai Ngiyaudi, amam esi etal iwapito. Nakaneni kiteyaru tokona esi Akuj aapei ka Kiristo. Kirimak Akuj ngoni ngasechesea yok daang,

¹⁴atach ngesi ngamichae yok nakolong egiritae ka ngitalio kech sodi kikisa jik ani aramakinea napir.

¹⁵ Kipiu Yesu ationis a ngipean ka ngikapolok anapir kangina, kitiliwo kesi ibore ni ekianatar ngitunga, erikit ngesi kesi anajore ana edwangea ngesi kesi anapir.

¹⁶Kotere nguna, warasi robo itwaan nyikilomak esi lotalio a ngimujen kori a ibore ani matat, kori ngirwa lu kinyakanaret, kori esikukuu a elap alokitetet kori akolongit a Sabato.

¹⁷Eraakasi ngakiro nguna daang etorube a ngakiro anamonan epote, Kiristo ngesi erai ngakiro na iteni.

¹⁸Warasi nyikirira esi itwaan ni ebala ajok ngesi ani aanyungarea ngakisingolikinet a Akuj, nabo toneikina akisudokinit akitiditeuna ka akilipit ngimalaikae. Inisa itwaan ni ikoni neni pas kotere ngitamen keng a ilope.

¹⁹ Aisiki ngesi Kiristo lo erai akou a akwaan kangina. Kotere erike lo a Kiristo, itanio akwaan daang kimorikin aapei ka nginerin ta ngamori keng, sodi topolounio loger lo esakitor Akuj.

²⁰Itoaka esi ka Kiristo aapei kilachakin ani eya ngipean lu epolokinito akwap. Nyo tokona nabo ibooyoto esi ikwa ibore esibit iraakasi esi ngitunga a akwap kana. Nyo iwapitotor esi ngitalio lu ikote lu ebeyere

²¹“Nyiitinga en”, “Nyiira ngin”, “Nyiitapa niche”?

²²Eraakasi nguna daang ngakiro a ngiboro alu inyasuunun nakitingea ngoni, eraakasi kesi ngitalio ka ngakitatamet na irokete ngitunga.

²³Iteni dir, esibit ngitalio a aosou a eger alo eneikina ngitunga akilip ngimalaikae, ka akisudokinit akitiditeuna, ka aboliar ngawat niaronon, nakaneni nyejok kesi alowae alo erai eka a atitinyikin etereku a ngawat loaronon.