Read turkana Ngikolosai 3 Bible Online

Ngikolosai 3 - turkana bible

Ngikolosai 3

¹Kona kiteyarunere esi ka Kiristo toyara, tasaka ngakiro na eya nadis, ni ibooyo Kiristo anapolou keng, anakan ana aloteten a Akuj.

²Kiitana ngakiro na eya kidiama, meere ngakiro na eya nakwap nege.

³Kainyo itoaka esi, nakaneni edae akiyar kus ka Kiristo aapei ani a Akuj.

⁴ Akiyar kus na iteni dir ngesi Kiristo, ani na etakanunea ngesi, itakanunete esi dang ka ngesi aapei sodi toliworos ngikapolok ka ngesi aapei!

⁵Echamit esi ipalikinete etereku loaronon lo eyei nawat kus lo erikit eboyor loaronon ikoni emalaanu, ngakiro na a ngileech, arorokanut, etereku loaronon ta adakanu (kainyo ikoni adakanu akilipit akuj nasubuna).

⁶Kotere ngakiro nguna enyunyurikin Akuj lu nyiwapete ngakiro keng.

⁷ Ibooyete kolong esi dang iwapito ngakiro na ikote nguna nakolong aupiyaritotor kesi eboyor kus.

⁸Nakaneni tapalikisi tokona ngakiro nu daang, na eraakasi angoit, ka anyunyura, ka arorokanut ta aremo. Nyejoikinit ngiyeny ka ngakiro na a ngileech elimunete ngakituk kus.

⁹Warasi nyiingalasi make, kainyo itubosi kolong esi eboyor kus longorot ka ngakiro daang na enait ngesi

¹⁰nakaneni irokut esi eboyor lokitetet. Eboyor ngolo ngesi erubakinit Akuj Akasubunan itenenakini kikwaanikin ka ngesi, sodi toyeneta esi Akuj lokojokon noi.

¹¹ Kotere nguna, nyeringa etiakitae ngibukui lu nyerai Ngiyaudi ka lu eraakasi Ngiyaudi, lu ilengeritae ka lu nyilengeritae, lu isomato ka lu nyisomato, ngipeyok ka lukulepek a akwap, ngirikon ka lu elachakina. Nakaneni erai Kiristo eka daang nabo eyei nika daang.

¹²Iraakasi esi ngitunga a Akuj, kimina ngesi esi kitoseu toliworos ngikeng. Tokona bocha, ejoikinit esi iliworosi ngitunga lu a ngisien, lukapatanak lu itiditeuna, toliworos lukalilimok ta lu inaikinito ngakiro.

¹³Tanaikisi ngakiro aluche nabo torimanakinos make erai kingolik itwaan atamar eyei ibore kasechakinit itwaan niche. Ejoikinit esi irimanakinosi make loger lo kirimakinea esi Ekapolon.

¹⁴Anakiro kanguna kadaang, kirichakisi echami lo erai ngesi imorikini ibore daang niajokon toliwor ipei.

¹⁵Kiriki esi ekisil lo kitaanyuni Kiristo anakiro ana itiakunete esi atamar kiwapi, kainyo ekisil ngolo ngesi kinyarare esi toliworos akwaan apei. Nabo toliworos lu ilimununete atamar kilakara.

¹⁶Echamit ngakiro a Kiristo epete nikus a ationis a aosou keng kadaang, kitatamas nabo kichikichikas make kotere aosou daang. Toeonokisi Akuj ngieosio ka ngiitesinei ka ngieosio a Etau a Akuj erai ibuakinito alakara alotai kus.

¹⁷ Ani ibore daang ni isubete esi kori ni ilimunete, tosuba daang a ekiro a Ekapolon Yesu, ibuakinito Akuj Apa alakara ani a Yesu.

¹⁸ Esi ngaberu, kiwapa ngakiro a ngikiliok kus, kainyo ejoikina esi isubete kongina ani iraakatar ngakiristoi.

¹⁹Esi ngikiliok, tominakisi ngaberu kus nabo tochoito iliworosi lukaadengak anikech.

²⁰ Esi ngide, kiwapa ngakiro a ngikauriak kus jiik ani iraakatar esi ngikiristoi, kainyo ngakiro ejoikinito Akuj nguna.

²¹Esi ngikauriak, warasi nyiiliworosi lu itililiyete ngide kus, kainyo ilounete kesi ngakiro ngitai.

²²Esi ngikedalak, kiwapa ngakiro a ngikapolok kus alu a akwap anakiro kadaang, meere esaa lo kiteeto kesi esi bon ani isaketa esi kesi kitominakis esi, nakaneni tosuba a ngitai kus kadaang ani ikeritotor esi Ekapolon Yesu.

²³Ibore daang ni isubete esi, tosuba a ngitai kus kadaang, esibit etich a Ekapolon Yesu isubete esi, meere lo a ngitunga.

²⁴Toyena atamar kiinakini Ekapolon Yesu esi ebachit lo idaritor ngesi ngitunga keng, kainyo Ekapolon Kiristo ngesi isubanakinete esi etich.

²⁵Nakaneni itwaan ni esubi naaronok, etachio itemem ka aronis keng, kainyo irirae Akuj itwaan daang a eger a epei.