Read turkana 1 Ngitesalonike 1 Bible Online

1 Ngitesalonike 1 - turkana bible

1 Ngitesalonike 1

¹ Ayong Paulo ka Silipano ta Timoteo kigirakinit esi ngitunga a ekanisa lu iyakasi Tesalonike abarua naga. Ngulu eraakasi ngika a Akuj Apa ka Ekapolon Yesu Kiristo. Kigasi atamar taanyut esi ajokis ka ekisil.

²Kibuanakini sua Akuj alakara kotere esi daang nabo kilimit esi jiik nakilipeenea.

³Kainyo kitamunit sua ani a Akuj Apayok eger lo idodiuneta esi atamar inupito ngakiro a Akuj kotere na isubete esi, ka eger lo kitusubea esi amina kus etich lokojokon, ka nabo eger lo etenoonio akigieno na igienosi esi Ekapolon yok Yesu Kiristo.

⁴Ngikaitotoi kosi, kiyeni sua atamar kimina esi Akuj nabo kiseu esi aliwor ngikeng a alope.

⁵Kainyo nakolong kitatamea sua esi Ngakiro Naajokak, pekitatami a ngakiro anapasiyek. Arai kitatami sua esi a ationis ka Etau a Akuj, kinupit dir atamar eraakasi ngakiro nguna na iteni. Iyenete esi eger lokolong kibooyo sua ka esi, ebooyoto ka esi erai kingarakinit.

⁶Kisisata esi sua ka Ekapolon Yesu, ani tani na ichanatar esi noi, ipot esi tachamut ngakiro naajokak a alakara ana itorunit Lotau a Akuj.

⁷Kotere nguna, tarautu esi ekitetemes alokanupak kadaang alu eya Makedonia ka Akaya.

⁸Nakaneni apetar ngakiro na Ekapolon anikus apetakin Makedonia ka Akaya, nabo dang, apetakin tani ngakiro na inupitotor esi ngakiro a Akuj wadaang. Emam robo tokona ibore iche echamit sua kilimuni.

⁹Iruorosi ngitunga ngulu daang eger lo kipeyeuneto esi sua nakiponea sua aanyun esi, ka eger lo ireunotor esi anakilip ngakujo nasubuna, toreunos akiwap Akuj na iteni na eyari

¹⁰ sodi kidarut Lokookeng ebuni anadis, Lokookeng Yesu, lokolong eteyaruni Akuj nabo kiyuuni ngoni ananyunyura a Akuj ana ebunit.