Read turkana 1 Ngitesalonike 4 Bible Online

1 Ngitesalonike 4 - turkana bible

1 Ngitesalonike 4

¹Eya daang ngikaitotoi kang, itatamasi esi anikosi eger lo ejoikinit esi ibooyoto sodi kitalakasi Akuj. Iteni dir, iboyeenete esi eger ngolo. Kilipit tokona sua esi nabo kimaimai a ekiro a Ekapolon Yesu atamar tosuba naajokak noi.

²Kainyo iyenete esi ngakiro nakichikichiki sua esi kotere apolou a Ekapolon Yesu.

³Esaki Akuj esi toliworos lu italeuno nabo lu ipalikis emalaanu.

⁴Ejoikinit ekile daang eyenuni eger lo iboyoto ka aberu keng a erot alo ebekoono ka lo a arimatoi,

⁵meere kotere etereku loaronon, loger a ngibukui alu nyerai Ngiyaudi alu nyenupito ngakiro a Akuj.

⁶Anakiro kanu, warasi robo itwaan nyeesechak ekiristoit loche kori nyiitoosor. Kilimok kolong sek sua esi nguna ekingaren, nabo echikichika esi lokojokon atamar irirae Akuj lu esubete nguna.

⁷Pekinyarae Akuj ngoni akiboi alomalaanu, nakaneni akiboi kirai lukitaleuno.

⁸Kanguna bocha, itwaan cha daang ni engeri ngakitatamet nugu nyengerit ngesi itwaan, engerit Akuj na erai ngesi kitaanyuni esi Etau keng.

⁹Nyejoikinit sua kigirakini esi ngakiro a amina ngikaitotoi lu eraakasi ngikanupak. Kitatam Akuj esi ngikulepek eger lo ejoikinit esi iminin make.

¹⁰Ngakiro napei nguna ngesi isubeta esi ngikaitotoi daang lu eya Makedonia. Tokona bocha ngikaitotoi, kilipakinit esi atamar tosuba tani na idwangito nguna.

¹¹Tasaka eboyor loajokon lo emam eburas, totionik itwaan daang ngakiro na eraakasi ngakeng a ilope, nabo tosub etich a ngakan keng a ilope loger lokolong sek kilimokinitor sua esi.

¹²Kotere eger ngolo kipuruunete esi lu nyerai ngikiristoi sodi tojongoto esi akiitanit atamar kiinakis ngitunga luche ngiboro lu ichanasi esi.

¹³Ngikaitotoi kosi, kisaki sua esi toyena ngakiro na iteni kotere lu atoaka, sodi nyialolong esi loger alu emam ibore igienosi.

¹⁴ Kinupit sua atamar atoani Yesu toyaru, nakaneni kinupit sua atamar ebuari Akuj Yesu ka daang lu atoakete enupito ngakiro keng, ebuari nikeng.

¹⁵Eraakasi ngakiro na tokona kitatami sua esi na a Ekapolon Yesu, ngoni lu eringa kiyari akolongit na ebunio Ekapolon Yesu, nyikingarenikini lukolong atoaka.

¹⁶Iremari Akuj lokojokon todung akiroit, iruorikini emalaikat loapolon kiirasi ngitunga erue a aburuch a Akuj. Sodi totiyaun Ekapolon Yesu anadis. Eyarunete mono ekingaren lu atoaka enupito ngakiro a Kiristo,

¹⁷ani ngoni lu kiyari ngirwa ngulu kichunario ka kesi aapei alodowon eriama ka Ekapolon Yesu alo kidiama. Sodi eruko ngoni ka Ekapolon Yesu jiik.

¹⁸Tokona bocha, kitoyono esi ngitai aluche a ngakiro kanu.