Read turkana Yochua 1 Bible Online

Yochua 1 - turkana bible

Yochua 1

¹Ani ketoana ekasuban etich a Ekapolon Akuj lo anyaritae Musa kerumor, abu Ekapolon Akuj kisuruor Yochua lokookeng a Nun, lo arai ekengarakinan a Musa.

²Tolim tama, “Atoana ekasuban etich kang Musa. Tonyoutu tokona iyong ka Ngisirael, todokasi angolol a Yorudan tolomasi nakwap na ainakinit ayong kesi.

³Loger lokolong alimokinea ayong Musa, kainak iyong ka ngitunga kang daang akwap daang nacha ichiakete ngakejen kus.

⁴Isiakini akwap kus alokuju anariet, tanang lomoru a Lebanon alokwap. Ani alo kide, isiakini anangolol anaapolon a Eupurate kitor nakwap a Ngiiti, tanang nanm a Mediterenian alo too.

⁵Yochua, emam itwaan kidwangi iyong eringa iyari. Kiruki ayong ka iyong lokolong kirukitor ka Musa. Kiruki ayong ka iyong jiik. Nyakaisikini ayong.

⁶Togogonger nabo totitinyer, kainyo itolomi iyong ngitunga lugu nakwap nakolong echikakini ayong taapaakech.

⁷Toliwor lo irichakina totitinyer, nabo kirichak etal daang lokolong kiinakini iyong ekasuban etich kang Musa. Wara nyiipasak tani wadiochichi, nakaneni emam ibore kipiyori iyong awadaang ani ilosi.

⁸Kirichak akiruoro jiik ngakiro a akitab ana etal anakilip. Toliwor itami akwaar ka apaaran, nabo kiwap ngakiro daang na igiritae nakitab ngina. Nakaneni iliwor iyong lo kipiaritae lokojokon.

⁹ Nabo kalimok ayong iyong atamar toliwor lo irichakina nabo totitinyer! Wara nyiiem kori nyiimaranik kainyo ayong Ekapolon Akuj na arai Akuj kon, kirukit ka iyong ani ilosi kadaang.”

¹⁰Nakaneni abu Yochua todungok ngikarikok atamar,

¹¹toloto nadakar tolimokis ngitunga tamasi, “Tosubakisi akimuj adio natingat kainyo adaunet a ngirwa a nguuni, iloose esi todokasi angolol a Yorudan toloma nakwap nakiinakinit esi Ekapolon Akuj na erai Akuj kus.”

¹²Tolimok Yochua ekitela a Reuben ta epewae a ekitela a Manase tama,

¹³“Kitamutu eger lokolong kilimokinea esi Musa lo erai ekasuban etich a Ekapolon Akuj, atamar kiinakini esi Ekapolon Akuj na erai Akuj kus akwap na eyei kide Yorudan toliwor awi kus.

¹⁴Ngaberu kus, ka ngide kus ta ngaatuk kus elomete nege, nakaneni ngasigerea kus na ejie, edokarete ekwakaye kingarenikis ngirukitos kus luche a Ngisirael sodi kingarakineta kesi,

¹⁵ tanang ni elometa nakwap na eyei too Yorudan na ainaki kesi Ekapolon Akuj na erai Akuj kus. Ani isiangari Akuj ngitela daang a Ngisirael, tobongut esi toloma nakwap kus na eyei kide Yorudan nakolong kiinakini esi Musa, ekasuban etich a Ekapolon Akuj.”

¹⁶Tatachakis kesi Yochua tamasi, “Kisubi sua ngakiro daang nakilimok iyong nabo kilosi wadaang nikimeari iyong sua.

¹⁷Kiwapi sua ngakiro kon loger lokolong kiwapitor ngakiro a Musa. Kimiek Ekapolon Akuj na erai Akuj kon kiruko ka iyong loger lokolong arukitotor ka Musa!

¹⁸Itwaan daang ni engeri ngakiro kon kori ni nyiwapi etal kon, eario. Kirichakin nabo totitinyer!”