Read turkana Yochua 10 Bible Online

Yochua 10 - turkana bible

Yochua 10

¹Abu Adonisedek lo arai ekapolon a Yerusalem,[4] kiira atamar abu Yochua torem ka akinyasun ere a Ai, ani erumor taar ekapolon keng, loger lokolong asubea Yeriko ka ekapolon keng. Kiira nabo atamar esila Ngigibeon ka Ngisirael nabo elomito kesi daang wapei.

²Apot ngitunga a Yerusalem toriangakinos kotere ngakiro nguna, kainyo apolot ere a Gibeon ariyan ka ngirerea lu ayakasi ngikapolok, apol tani edwangit Ai, nabo ajwoko ngitunga keng.

³Sodi abu Adonisedek tomea itwaan nia Oamu alo arai ekapolon a Eburon, ka Piram lo arai ekapolon a Yarimus, ka Yapia lo arai ekapolon a Lakich, ta Debir lo arai ekapolon a Egilon, ebala,

⁴“Potu kingarakinae ayong etijwoto ngitunga a ere a Gibeon, kainyo esila ka Yochua ta Ngisirael.”

⁵Apot ngikapolok ngikan a Ngiamor lu eraakasi ngikapolok a ngirerea alu enyaritae Yerusalem, ka Eburon, ka Yarimus, ka Lakich, ta Egilon, kimorikis ngasigerea kiriama ere a Gibeon sodi kitijwoto.

⁶Apot Ngigibeon tomeasi itwaan nia Yochua anadakar a Giligal tamasi, “Nyikichaka sua, ekapolon! Bua nege atipei kingarakinae sua! Toyuunae sua! Ngikapolok a Ngiamor daang lu elomito nakwap na ngimukur, emorikis ngasigerea kech kiremo sua!”

⁷Sodi apot Yochua ka ngasigerea keng daang, eyakasi tani lukajwok noi, torotokis alo Giligal.

⁸Tolimok Ekapolon Akuj Yochua tama, “Nyiem kesi. Ketiliwo ayong iyong lo idwangi. Emam tani ipei anikech ni kiweikini iyong.”

⁹Torotokis Yochua ka ngasigerea keng nakwaare alo Giligal tananga Gibeon, sodi kituumwokis Ngiamor kitijikis.

¹⁰Abu Ekapolon Akuj kitoem Ngiamor napei engolikineta ngasigerea a Ngisirael. Apot Ngisirael taara kesi alo Gibeon kiritasi kitoro ni enyaritae Bes-oron, ni eyei napak a emoru, kitijiosi kesi tanang ni anyaritae Aseka ka Makeda alowae alo alokuju.

¹¹Ani eringa Ngiamor ekerete anapak a emoru kiwapito ngasigerea a Ngisirael, abu Ekapolon Akuj tachaku ngamoru a akiru naapolok alokidiama kimasa kesi alorot eloose Aseka. Taara ngamoru nguna ngitunga lukaalak noi lu idwangito lu aarete Ngisirael.

¹²Akolongit na epotorea Ekapolon Akuj Ngiamor kidwanga Ngisirael kesi, kiruoro Yochua ka Ekapolon Akuj. Tolim Yochua alongaren Ngisirael tama, “Akolong, towo nyiingunyakin alokidiama Gibeon. Elap, towo alokidiama adipo a Aijalon.”

¹³Abu akolong towo nyiingunyakin, nabo nyiyotokino elap tanang na edwangeta kesi ngimoe kech. Igiritae ngakiro nugu nakitab na enyaritae Yachar. Abu akolong towo naparan lotingilan, nyedooyoro a akolongit a apei.

¹⁴ Emam akolongit ache nabo ekoni ngina kori ekok ngina nakanuan, na eirarea Ekapolon Akuj ngakiro a itwaan. Toji Ekapolon Akuj alowae a Ngisirael!

¹⁵Arumoret kanguna, apot Yochua ka ngasigerea keng tobongosi Giligal.

¹⁶Apot ngikapolok lukan a Ngiamor tobucharos, toduka anaburibur alo Makeda.

¹⁷Taanyu itwaan iche kesi sodi tolimokinae Yochua ni adukitotor kesi.

¹⁸Tolim Yochua tama, “Kikokorikisi ngamoru ngadi naapolok nakituk a aburibur, kiwaakis ngitunga kiteto neni,

¹⁹nakaneni nyiiboikinosi esi neni. Kiwapakisi esi ngimoe sodi kitijikis kesi anaabor. Warasi nyeenang lorerea kech! Epoto Ekapolon Akuj na erai Akuj kus ngimoe kus sodi kidwanga esi kesi.”

²⁰Apot Yochua ka Ngisirael taara kesi, nakaneni apon ngiche kech nyear ani aduketa anawasea a ere kech.

²¹Sodi tobongut ngitunga a Yochua daang ni ayei ngesi niajokon, anadakar ana ayei Makeda. Emam itwaan tani ipei anakwap kangina ni asak akiruoror Ngisirael ngakiro naaronok.

²²Tolim Yochua tama, “Tangaasi akituk a aburibur sodi yaut ngikapolok lukan ngulu nia ayei ayong.”

²³Apon tangaarae aburibur, sodi kipudunoe nikalapatan ngikapolok a Yerusalem, ka Eburon, ka Yarimus, ka Lakich ta Egilon,

²⁴torikoroe nia Yochua. Sodi tanyara Yochua Ngisirael daang, ani erumor todungok ngikarikok daang lusek arukito ka ngesi atamar kichiaka ngimosiringan a ngikapolok alukan kangulu. Tosubakis kesi kongina.

²⁵Sodi tolimok Yochua ngikarikok lu arukito ka ngesi tama, “Warasi nyieam kori nyiimaranikis. Togogongioto nabo totitinyeketo kainyo ngakiro esubea Ekapolon Akuj ngimoe kus daang nugu.”

²⁶Sodi abu Yochua taar ngikapolok daang kinenek lokito ngikan, kinenos ngawat kech kaneni tanang ebong.

²⁷Ani edooyori akolong, todung Yochua atamar totiyaunae ngawat kech tachakakinae naburibur nasek adukitotor. Tosenokinoe ngamoru naapolok nakituk a aburibur, eyakasi neni tani tokona.

²⁸Akolongit ngina torem Yochua Makeda tolema, sodi taar ekapolon. Taar ngesi itwaan daang alore, emam itwaan aisikin eyari. Tosubea ngesi ekapolon a Makeda ngakiro nasek asubea loa Yeriko.

²⁹Arumoret kanguna, apot Yochua ka ngasigerea keng torotokis alo Makeda toloto toremo Libina.

³⁰Kingarak Ekapolon Akuj Ngisirael kidwanga ngitunga a ere kangolo ka ekapolon kech. Emam itwaan aisikis kesi eyari, nakaneni apot taara itwaan a ere daang, Tosubeta kesi ekapolon a ere kangolo ngakiro nasek asubeta ekapolon a Yeriko.

³¹Arumoret kanguna, tonyout Yochua ka ngasigerea keng alo Libina toloto Lakich kiriama sodi toremo.

³²Kingarak Ekapolon Akuj Ngisirael kidwanga ngitunga a ere a Lakich akolongit na ngaarei ajiere. Apot kesi taara itwaan daang alore, loger losek aareta alo Libina.

³³Abu Oram lo arai ekapolon a Geser bu ayuun Lakich, sodi kidwang Yochua ngesi ka ngasigerea keng daang, nabo emam itwaan ni edong eyari.

³⁴Ani erumor tonyout Yochua ka ngasigerea keng alo Lakich toloto Egilon, kiriama toremo.

³⁵Toremo Egilon akolongit ngina, taara itwaan daang loger losek aareta alo Lakich.

³⁶Arumoret kanguna, apot Yochua ka ngasigerea keng tonyout alo Egilon toloto lomukur lu etenere Eburon, toremo

³⁷sodi tolemasi ere. Taara ekapolon ka itwaan ni ayei lore daang ta ngitunga a ngirerea alu aapiyete kaneni. Kinyasu Yochua ere lokojokon loger lo enyasunea Egilon. Emam itwaan kaneni ni abu kidong eyari.

³⁸Sodi tobongosi Yochua ka ngasigerea keng toloto Debir toremo.

³⁹Tolema ere ngolo, ka ekapolon keng ta ngirerea lu edunyatar daang. Taara kesi ngitunga daang kaneni. Tosubea Yochua Debir ka ekapolon keng ngakiro nasek asubea Eburon ka Libina ka ekapolon keng.

⁴⁰Torem Yochua akwap daang. Kidwang ngesi ngikapolok a akwap ana ngimukur, ka ngakokoriyoret a ngimoru na eyakasi kide, ta ngaukon na eyakasi too tanang tani nariet a Negeb. Emam itwaan ni abu ngesi toisik eyari, apon itwaan daang taarae loger losek adungunitor Ekapolon Akuj erai Akuj a Ngisirael.

⁴¹Abu Yochua toji jik napei alo Kadech-barinea ana eyei kuju tanang Gasa na eyei lokwaas a anam. Toji alowaitin kadaang a Gochen tanang Gibeon alowae alo alokwap.

⁴²Kidwang Yochua ngikapolok ngulu daang ka ngakwapea kech ajikinet apei kainyo ajii Ekapolon Akuj na erai Akuj a Ngisirael alowae kech.

⁴³Arumoret kanguna, apot Yochua ka ngasigerea keng tobongosi nadakar na ayei Giligal.