Read turkana Yochua 11 Bible Online

Yochua 11 - turkana bible

Yochua 11

¹Na eirarea Yabin lo arai ekapolon a Asor ngakiro na edwangeta Ngisirael ngitunga, abu tomea itwaan nia Yobab alo a Madon, ka nia ekapolon a Chimuron ka ekapolon a Akichap.

²Sodi tomea itwaan nia ngikapolok alu ayakasi lomukur, lowae loa lokwap, ka lu ayakasi nadipo a Yorudan, lowae loa lokuju anam a Galilaya, ka lu ayakasi naroatin, ta lu ayakasi lokwaas a anam, diyete Dor.

³Abu nabo tomea itwaan nia Ngikanaan alu alomito kide ka too angolol a Yorudan, ka nia Ngiamor, ka nia Ngiiti, ka nia Ngiperes, ta nia Ngiebus alu alomito nakwap na ngimukur. Tomea nabo itwaan nia Ngiipi alu alomito nakeju a emoru enyaritae Erimon alo eyei nakwap na enyaritae Misipa,

⁴pot kesi ka ngasigerea kech daang. Alalak ngasigerea nguna noi atiakasi asinyen na eyei lokwaas a anam. Ayakasi kesi ngangolei ka ngaurukukui na irito ngangolei.

⁵Apot ngikapolok ngulu daang kimorikis ngasigerea aapei sodi tolom adakar kech ningolol ni enyaritae Merom, esakete akitijwore Ngisirael.

⁶Tolimok Ekapolon Akuj Yochua tama, “Nyiem kesi. Moi esaa lo ikoni logo, aari ayong kesi daang ewaak nakan a Ngisirael. Tonged ngamori a ngangolei kech tongwala, sodi kinom ngaurukukui na irito ngangolei.”

⁷Abu Yochua ka ngitunga keng kituumwokis kesi kitijikis aningolol a Merom.

⁸Sodi nak Ekapolon Akuj Ngisirael agogongu na idwangeta kesi. Kitijikis Ngisirael kesi ka akiritar tanangut alowae alo alokwap ni anyaritae Misirepos Maim ta Sidon, ani alowae alo alo kide, kiritasi tananga nadipo a Misipa. Taara Ngisirael ngimoe, emam tani epei lo edong eyari.

⁹Tosubakinea Yochua kesi ngakiro na adungunit Ekapolon Akuj, tonged ngamori a ngangolei kingwal nabo kinom ngaurukukui kech na irito ngangolei.

¹⁰Abu Yochua tobong torem a Asor sodi taar ekapolon keng. (Ngirwa ngulu, ekapolon a Asor ngesi ajwono noi edwangit ngikapolok luche daang.)

¹¹Taara kesi itwaan daang kaneni, emam itwaan edong eyari, ani erumor kinomae ere.

¹²Abu Yochua tolema ngirerea ngulu ka ngikapolok kech, taar itwaan daang loger lokolong adungokinitor Musa, ekasuban etich a Ekapolon Akuj.

¹³Nakaneni apot Ngisirael nyiinoma ngirerea lu adukitoe kidiama lotela. Asor bon ngesi abu Yochua kichunyak akim kinom.

¹⁴Apot Ngisirael tolemasi ngiboro luajokak daang ka ngaatuk alorerea kangulu. Nakaneni apot kesi taara itwaan daang, emam itwaan edong eyari.

¹⁵Adungokinit sek Ekapolon Akuj Musa lo arai ekasuban etich keng nguna, sodi todungok Musa Yochua, dio Yochua kiwap ngakiro nguna. Tosub ngesi ngakiro daang nakolong adungokinit Ekapolon Akuj Musa.

¹⁶Tolema Yochua akwap daang, akwap na ngimukur ka ngaukon, napei alokwap tanang Negeb, tolema akwap a Gochen daang ka akwap nakoonon ayei kwap keng, ta adipo a Yorudan.

¹⁷Napei alomoru a Alak alo eteni lowae a Edom, tanang ni enyaritae Baaligad ni eyei nadipo a Lebanon, na eyei kuju emoru lo enyaritae Erimon. Sodi kirum ngesi ngikapolok kech daang kibunga taar kesi.

¹⁸Abu Yochua tojwoto ka ngikapolok ngulu a ngirwa alukaalak.

¹⁹Ngitunga a ere a Gibeon make kesi esilete ka Ngisirael. Alomito Ngiipi ngiche neni. Apon luche daang kidwangae alojie.

²⁰ Abu Ekapolon Akuj kitiliwo kesi lu irichasi tojwoto ka Ngisirael, sodi tomunyarae kesi nabo taarae daang emam akisienut. Nguna kesi kolong adungokini Ekapolon Akuj Musa.

²¹Ngirwa ngulu, abu Yochua tolot tomunya ngitunga lulangir kooyak anyaritae Ngianak lu alomito nakwap na ngimukur ni enyaritae Eburon, ka Debir, ka Anab ta ngakwapea na ngimukur daang a Yuda ka Isirael. Abu Yochua tomunya kesi ka ngirerea kech.

²²Emam Ngianak tani epei abu kidong nakwap a Isirael. Nakaneni apot ngidikidio kidongo Gasa, ka Gas, ka Achidod.

²³Tolema Yochua akwap daang loger lokolong adungokinitor Ekapolon Akuj Musa. Nak Yochua Ngisirael akwap ngina kitiliwosi akech, sodi totiakanak ewae apei toliwor eka ekitela a epei.