Read turkana Yochua 13 Bible Online

Yochua 13 - turkana bible

Yochua 13

¹Abu Yochua tomojong. Tolimok Ekapolon Akuj ngesi tama, “Imojong iyong noi toringa akwap na echamit elemario elal.

²Eringa akwap a Pilistia daang ka na Ngigechur,

³ka akwap na enyaritae Apim na eyei lowae loa lokuju. (Akwap na isiakini aningolol a Chior, ana eyei lokukuoru a Misiri, tanang alowae alo alokwap lokukuoru a Ekiron, arai daang aka Ngikanaan. Alomito ngikapolok a Ngipilisti Gasa, ka Achidod, ka Achikelon, ka Gas, ta Ekiron.)

⁴Eringa akwap a Ngikanaan daang eyei, ka na enyaritae Meara (na erai aka Ngisidon), napei ani eyei Apek na eyei lokukuoru a Ngiamor.

⁵Eringa akwap a Ngigebal ka akwap a Lebanon daang alowae alo alo kide. Napei alo Baaligad kuju emoru a Erimon, tanang napak a Amas.

⁶Imorikina akwap ngina ka akwap daang a Ngisidon alu elomito nakwap a ngimukur, nakidingos a ngimoru a Lebanon ka Misirepos Maim. Eritari ayong ngitunga ngulu daang esaa lo eponitotor Ngisirael. Echamit iyong itiakakini Ngisirael akwap loger lo kadungok ayong iyong atamar tosub.

⁷ Tokona bocha, totiakak akwap naga ngitela luche lukan-koomwon ka epewae a ekitela a Manase toliwor akech.”

⁸Aanyunito sek ngitela a Reuben ka Gad, ta epewae a ekitela a Manase akwap na atiakakini Musa kesi, lo arai ekasuban etich a Ekapolon Akuj. Ayei akwap ngina lowae loa lokide angolol a Yorudan.

⁹Anangit akwap kech Aroer (lokeli a adipo a Arinon), nabo ere lo ayei kiding adipo ngina imorikina ka emuria napei alore a Medeba tanang Dibon.

¹⁰Tanang lokukuoru a Amon ka ngirerea daang lukolong apolokinit Sion lo arai ekapolon a Ngiamor, lo apolokinit Echibon.

¹¹Emorikina neni ka Gilead, ka ngiwaitin a Gechur ka Maaka, ka emoru a Erimon wadaang, ta Bachan daang tanang ni enyaritae Saleka.

¹²Emorikina ka apolou a Ogu alo a Bachan arai ekapolon loa esal a ngitunga alu anyaritae Ngirepai, losek apolokinit Achitaros ka Edirei. Edwangi Musa ngitunga ngulu sodi kirita.

¹³ Nakaneni nyiritara Ngisirael ngitunga a Gechur ka Maaka. Eringa kesi elomito nakwap a Isirael.

¹⁴Peainakinit Musa ekitela a Lawi akwap. Loger lokolong alimokinea Ekapolon Akuj Musa, asakitae kesi totiakanakinae epewae a ngakipeyos ana epeyeeneo alokeno alo ipeyonokinere Ekapolon Akuj na erai Akuj a Isirael.

¹⁵Ainakinit Musa ngitunga a ekitela a Reuben akwap epewae kitiliwosi akech.

¹⁶Anangit akwap ngina Aroer (lokeli a adipo a Arinon), ka ere lo eyei kiding adipo ngina, ta wadaang a emuria alo edunyunatar ere a Medeba.

¹⁷Emorikina ka Echibon, ka ngirerea daang a emuria lu enyaritae Dibon, ka Bamos Baal, ka Bes Balimeon,

¹⁸ka Yaasa, ka Kedemos, ka Mepaas,

¹⁹ka Kiriasaim, ka Sibima, ka Seres-chaar lo eyei narii a adipo,

²⁰ka Bespeor, ka ngakokoriyoret a emoru a Pisiga, ta Bes Yechimos.

²¹Emorikina ka ngirerea daang a emuria kangolo, ka wadaang ni apolokinit Sion lo arai ekapolon a Ngiamor, losek apolokinit Echibon. Kidwang Musa ngesi ka ngikarikok daang a akwap a Midian ka lu enyaritae Epi, ka Rekem, ka Sur, ka Uri, ta Reba. Apolokinito kesi daang akwap kotere Sion.

²²Alotunga alu aario, ayei ekekerian lobe Balaam lokookeng a Beor.

²³Arai Yorudan ekukuor a Reuben alowae alo alo too. Ngulu kesi araakasi ngirerea lu ainakinio ngitunga a ekitela a Reuben toliworos ngikech.

²⁴Ainakinit nabo Musa ngitunga a ekitela Gad akwap ache toliwor akech.

²⁵Arai akwap kech Yaser ka ngirerea a Gilead daang, ka epewae a akwap a Amon ni enangit ni enyaritae Aroer, ni eyei kide Raba.

²⁶Esiakinit akwap kech alo Echibon tanang Ramas Misipe ka Betonim, ani alo Maanaim tanang lokukuoru a Lodebar.

²⁷Ani anadipo a Yorudan, emorikina ka Bes Aram, ka Besinmira, ka Sukos, ka Sapon, ta ngiwaitin luche daang apolokinit Sion lo arai ekapolon a Echibon. Ekukuor kech loa lotoo ngesi angolol a Yorudan, ani alowae alokwap, anangit nanam a Galilaya.

²⁸Ngulu kesi eraakasi ngirerea ka ngadakarin na ainakinio ngitunga a ekitela a Gad toliworos ngakech.

²⁹Ainakinit Musa ngitunga epewae a ekitela a Manase akwap ache toliwor akech.

³⁰Anangit akwap kech Maanaim imorikina ka akwap a Bachan daang, ka wadaang ni apolokinit Ogu lo arai ekapolon a Bachan.

³¹Ayei akwap epewae Gilead, imorikina ka Achitaros ta Edirei, lu araakasi luapolok ayakasi Bachan, lu apolokinit Ogu. Ngirerea ngulu daang ainakinio epewae a ngitunga alu araakasi ngalesea a Makiri alo arai lokookeng a Manase.

³²Eger ngolo ngesi kolong atiakea Musa akwap na ayei kide Yeriko ka Yorudan na ayakar naroatin a Moab.

³³ Nakaneni abu Musa nyeeinak ekitela a Lawi akwap. Abu tolimok kesi atamar etiakanakinio kesi epewae a ngakipeyos ana einanakinio Ekapolon Akuj na erai Akuj a Isirael.