Read turkana Yochua 14 Bible Online

Yochua 14 - turkana bible

Yochua 14

¹Eger logo ngesi kolong atiakakinere Ngisirael akwap a Kanaan na ayei too Yorudan. Apot Eleasar lo arai emuron a Akuj, ka Yochua lokookeng a Nun, ka ngikapolok a ngawiyei a ngitela a Ngisirael totiakakis ngitunga akwap.

²Loger lokolong adungokinitor Ekapolon Akuj Musa, apon ngakwapea a ngitela alukan-koomwon ka epewae ekitela eche totiakae kotere akiram ekura,[6]

³kainyo atiakinit sek Musa ngitela ngiarei ka epewae a ekitela a epei akwap, ayakasi ngulu kide Yorudan. Nakaneni peatiakakinit ngesi Ngilawi akwap.

⁴Araakasi ngalesea a Yosep ngitela ngiarei, lua Manase ka lua Epiraim. Nakaneni amam akwap abu Musa totiakak Ngilawi, abu nak ngirerea make lu elomete kesi ka lu iyokiyete ngaatuk kech ka ngibaren luche.

⁵ Apot Ngisirael totiaka akwap loger lokolong adungokinitor Ekapolon Akuj Musa.

⁶Akolongit apei, pot ngitunga a ekitela a Yuda nia Yochua alo Giligal. Abu epei kech lo anyaritae Kaleb lo arai lokookeng a Yepune, lo arai eka akwap a Kenis, tolimok Yochua tama, “Iyeni iyong ngakiro nakolong alimokini Ekapolon Akuj Musa lo arai itwaan keng alo Kadech-barinea kotere iyong ka ayong.

⁷Arai kolong ngikaru kang ngitomwon-omwon nakamearea ayong Musa lo arai ekasuban etich a Ekapolon Akuj alo Kadech-barinea, akireb akwap naga.

⁸Nakaneni apot ngitunga lu kirukorit ka ayong kitoema ngitunga yok. Nakaneni ewap ayong ngakiro a Ekapolon Akuj kang a eger alo etenoono.

⁹Kotere nguna asubi ayong, abu Musa kechikak ayong atamar kirumi ayong ka ngide kang akwap nakolong echiaki ayong toliwor akosi jik.

¹⁰Kingolik tokona, adaunosi ngikaru ngitomwon-omwon ka ngikan alorwa alu kolong alimokinea Ekapolon Akuj Musa ngakiro nguna. Ngirwa ngulu kesi lukolong alooso Ngisirael anariet. Keteyar ayong Ekapolon Akuj tanang tokona, loger lokolong alimunitor. Kingolikinae ayong! Eraakasi tokona ngikaru kang ngitomwon-kauni ka ngikan.

¹¹Eringa tani tokona eyakasi ngikilinga lu ikote lua ngirwa alu kolong kamearitor Musa. Eringa ayong eyakasi ngikilinga lujiet kori lusubet ibore daang.

¹² Tokona bocha, nakinae ayong akwap na ngimukur nakolong kechikakini Ekapolon Akuj ayong akolongit nakibongunio ka ngitunga kang. Kilimokini kolong sua esi atamar eyakasi ngitunga lulangir kooyak inaa enyaritae Ngianak, lu elomito lorerea luapolok a ngawasea. Ani erai kiruk ayong ka Ekapolon Akuj, eritari ayong kesi loger lokolong alimunio Ekapolon Akuj.”

¹³Topia Yochua Kaleb lokookeng a Yepune sodi nak ngesi ere a Eburon toliwor ekeng.

¹⁴Eringa Eburon erai eka ngalesea a Kaleb lokookeng a Yepune, alo arai eka akwap a Kenis kainyo ewapi ngesi Ekapolon Akuj na erai Akuj a Isirael a eger alo etenoono.

¹⁵Sek ekingaren anyaritae Eburon ere a Ariba. (Arai Ariba itwaan ni apolot ni edwangit Ngianak luche.) Min tokona ekisil nakwap.