Read turkana Yochua 15 Bible Online

Yochua 15 - turkana bible

Yochua 15

¹Apot ngitunga a ekitela Yuda toriamut ngakwapea loger logo. Alowae alo alokuju, anangit akwap kuju ariet na enyaritae Sin, ana enangit lokukuoru Edom.

²Esiakinit ekukuor lo alokuju logo ani esalunea anam a Amakat alokuju.

³Kinapar jik kuju anapak a Akirabim tanang Sin. Kinapar alokuju Kadech-barinea kitor Esiron tanang Adar. Ani erumor kiriwor lowae a Karika.

⁴Kinapar alo Asimon kiwapak jik ayanae alokukuoru a Misiri. Ngolo arai ekukuor a Yuda alokuju.

⁵Ekukuor loa lokide ngesi anam a Amakat, kinapar jik tanang ni eremio Yorudan anam ngina. Kisiak ekukuor loa lokwap kaneni.

⁶Kinapar alo Bes Ogila, kiriwor kwap ekeku lo erounit adipo a Yorudan. Kinapar tanang namoru a Boan (arai Boan lokookeng a Reuben).

⁷Kinapar anadipo a Ngichan tanang Debir, sodi kiriwor kwap lowae a Giligal, ni ekienyikina ka apak na anyaritae Adumim na eyei lowae lo alokuju adipo. Sodi kinapar alolelea a Enichemech topudo kinapar Enirogel.

⁸Kitor nadipo a Inom alowae alo alokuju emoru lo eyei ere a Ngiebus enyaritae Yerusalem. Tanang ekukuor kidiama emoru lo eyei too adipo a Repaim.

⁹Kinapar kaneni lolelea a Nepitoa sodi topudo lorerea lu eyakasi diyete emoru a Epiron. Kiriwor kaneni lowae a Baala (kori Kirias Yearim),

¹⁰kiloda too Baala, kinapar lowae loa ngimukur a Edom. Kinapar lowae loa lokwap emoru enyaritae Yearim (kori Kesalon), toten kwap Bes Chemech, kiporo Timuna.

¹¹Sodi kinapar ekukuor alomoru alo eyei Ekiron kwap, kiriwor alowae a Chikeron, kiporo emoru a Baala tanang Yaminia, sodi tasalu ananam a Mediterenian,

¹²ana erai ekukuor alowae alo alo too. Tooma ngikukuorio ngulu kesi alomito ngitunga a ngawiyei a Yuda.

¹³Loger lokolong adungokinitor Ekapolon Akuj Yochua, apon epewae a akwap a Yuda nakinae Kaleb lokookeng a Yepune, loa ekitela a Yuda. Nakinae ngesi Eburon, ere a Ariba alo arai apakeng a Anak.

¹⁴Kirita Kaleb ngalesea a Anak alore. Kirita emachar a Chechai, ka Aiman ta Talimai.

¹⁵Tonyou kaneni tolot akirem ngitunga a Debir. (anyaritae kolong ere ngolo Kirias Seper.)

¹⁶Tolim Kaleb tama, “Itwaan nicha eremi ere a Kirias Seper ainakini ayong nakookang Akisa sodi kiut.”

¹⁷Abu Osiniel lokookeng a Kenas alo arai lokaatokeng a Kaleb, torem ere sodi nak Kaleb ngesi nakookeng kiuut.

¹⁸Akolongit na akuuta, abu Osiniel kimaima Akisa[7] atamar kilip apakeng amana. Sodi todoku ngesi alosikiria keng, kingit Kaleb ngesi ibore ni asaki.

¹⁹ Tatachu ngesi tama, “Asaki apiaro, nakinae ngabwelin a ngakipi. Kiinakinit iyong ayong akwap nakoonon.” Sodi nak Kaleb ngesi ngileleae lu ayakasi lowaitin lua alokuju ka kwap.

²⁰Akwap naga ngesi na ariamunete ngitunga a ekitela a Yuda toliwor akech.

²¹Ngirerea lu araakasi ngikech alowae alo alokuju, lu ayakasi diyete ekukuor a Edom kesi lu anyaritae Kabiseel, ka Eder, ka Yagur,

²²ka Kina, ka Dimona, ka Adada,

²³ka Kedech, ka Asor, ka Isinan,

²⁴ka Sip, ka Telem, ka Beolos,

²⁵ka Asor Adata, ka Kerios Esiron (kori Asor),

²⁶ka Amam, ka Chema, ka Molada,

²⁷ka Asar Gada, ka Echimon, ka Besipelet,

²⁸ka Asar Chual, ka Beer-cheba, ka Bisiosia,

²⁹ka Baala, ka Iyimu, ka Esem,

³⁰ka Elitolad, ka Kesil, ka Orima,

³¹ka Sikilag, ka Madimana, ka Sanisana,

³²ka Lebaos, ka Chiliim, ka Ain, ta Rimon. Araakasi ngirerea ngulu daang ngitomwon-arei ka ngikan-koomwon, imorikina aapei ka ngadakarin na edunyatar.

³³Ngirerea lu ayakasi naukon kesi lu anyaritae Echitaol, ka Sora, ka Achina,

³⁴ka Sanoa, ka Enganim, ka Tapua, ka Enam,

³⁵ka Yarimus, ka Adulam, ka Soko, ka Aseka,

³⁶ka Chaaraim, ka Adisaim, ka Gedera, ka Gederosaim. Araakasi ngirerea ngulu daang ngitomon ka nguomwon imorikina ka ngadakarin na edunyatar.

³⁷Ngirerea nabo ngiche kesi lu enyaritae Senani, ka Adacha, ka Migidaligad,

³⁸ka Dilan, ka Misipa, ka Yokiseel,

³⁹ka Lakich, ka Bosikas, ka Egilon,

⁴⁰ka Kabon, ka Lamas, ka Kisilich,

⁴¹ka Gederos, ka Besidagon, ka Naama, ta Makeda. Araakasi ngirerea ngulu daang ngitomon ka ngikan-kapei, imorikina aapei ka ngadakarin na edunyatar.

⁴²Ngirerea nabo ngiche kesi lu enyaritae Libina, ka Eseri, ka Achan,

⁴³ka Ipita, ka Achina, ka Neseb,

⁴⁴ka Keila, ka Kesibu, ta Marecha. Araakasi ngirerea ngulu daang ngikan-koomwon imorikina aapei ka ngadakarin na edunyatar.

⁴⁵Apon kesi nakinae tani Ekiron ka ngirerea keng ta ngadakarin keng.

⁴⁶Ayakasi ngirerea daang lu alodiyete Achidod, napei ani a Ekiron tanang nanam a Mediterenian.

⁴⁷Ayakasi Achidod, ka Gasa, ta ngirerea kech ka ngadakarin na enangito nayanae na eyei lokukuoru a Misiri, ta ekwaas a anam a Mediterenian.

⁴⁸Ani anakwap ana ngimukur, ayakasi ngirerea lu enyaritae Chamir, ka Yatir, ka Soko,

⁴⁹ka Dana, ka Kirias Seper (kori Debir),

⁵⁰ka Anab, ka Echitemos, ka Anim,

⁵¹ka Gochen, ka Olon, ta Gilo. Araakasi ngirerea ngulu daang ngitomon ka epei, imorikina aapei ka ngadakarin na edunyatar.

⁵²Ayakasi Arab ka Duma, ka Echan,

⁵³ka Yanim, ka Bes Tapua, ka Apeka,

⁵⁴ka Umuta, ka Eburon, ta Sior. Araakasi ngirerea ngulu daang ngikan-koomwon, imorikina aapei ka ngadakarin na edunyatar.

⁵⁵Ayakasi Maon, ka Karimel, ka Sipu, ka Yuta,

⁵⁶ka Yesireel, ka Yokideam, ka Sanoa,

⁵⁷ka Kain, ka Gibea, ka Timuna. Araakasi ngirerea ngulu daang ngitomon, imorikina aapei ka ngadakarin na edunyatar.

⁵⁸Ayakasi Aliul, ka Besisur, ka Gedor,

⁵⁹ka Maaras, ka Besanos ta Elitekon. Araakasi ngirerea ngulu daang ngikan-kapei, imorikina aapei ka ngadakarin na edunyatar.

⁶⁰Ayakasi Kirias Baal (kori Kirias Yearim), ta Raba. Araakasi ngirerea ngulu ngiarei, imorikina aapei ka ngadakarin na edunyatar.

⁶¹Ani anariet, ayakasi Bes Araba, ka Midin, ka Sekeka,

⁶²ka Nibichan, ka ere a Amakat, ta Engedi. Araakasi ngirerea ngulu dang ngikan-kapei imorikina aapei ngadakarin na edunyatar.

⁶³ Nakaneni peapedorete ngitunga a Yuda akiritar Ngiebus lu alomito Yerusalem. Eringa Ngiebus elomito neni ka ngitunga a Yuda.