Read turkana Yochua 17 Bible Online

Yochua 17 - turkana bible

Yochua 17

¹Epewae akwap na ayei too Yorudan ngesi apon totiakakinae ngitunga a Manase alo arai lokookeng a Yosep lo ekingaren. Apakeng a Gilead lo anyaritae Makiri ngesi arai lokookeng a Manase lo ekingaren nabo arai lo ajwono noi anajorei. Apon nakinae ngesi ngirerea a Gilead ka Bachan lu ayakasi kide Yorudan.

²Akwap na ayei too Yorudan ngesi apon totiakakinae ngitunga luche a Manase lu anyaritae Abieser ka Elek, ka Asiriel, ka Chekem, ka Eper, ta Chemida. Lugu kesi araakasi ngide lusapa a Manase alo arai lokookeng a Yosep, nabo kesi araakasi ngikapolok a ngawiyei.

³Nakaneni Selopead lo arai lokookeng a Eper, alo arai lokookeng a Gilead, alo arai lokookeng a Makiri, alo arai lokookeng a Manase, amam ngide lusapa. Ayakasi ngesi ngide lupesur make. Ngirora kech kesi ta Maala, ka Noa, ka Ogila, ka Milika ta Tirisa.

⁴Toloto kesi nia Eleasar alo arai emuron a Akuj, ka Yochua lokookeng a Nun ta ngikarikok luche tamasi, “Adungokini kolong Ekapolon Akuj Musa ainakin sua ka ngiyenet kosi lukiliok akwap epewae toliwor akosi.” Apon kesi ka ngiyenet kech lukiliok nakinae akwap loger lokolong adungunitor Ekapolon Akuj.

⁵Abu Manase toriam ngatiaket ngatomon kimorik aapei ka Gilead ta Bachan lu ayakasi kide Yorudan,

⁶ kainyo atiakakinitae ngide keng lusapa ka lupesur akwap. Apon akwap a Gilead totiakakinae ngide luche a Manase.

⁷Esiakini akwap a Manase alo Acher tanang Mikimesas na eyei kide Chekem. Kinapar ekukuor kuju tanang lotunga a Enitapua.

⁸Arai akwap na ayei diyete Tapua aka Manase, nakaneni ani ere a Tapua lo ayei lokukuoru, arai eka ngalesea a Epiraim.

⁹Sodi tanang ekukuor nayanae a Kana. Araakasi ngirerea lu ayakasi kuju ayanae Epiraim, tani kerai nakwap a Manase ayakasi. Kiriwor ekukuor a Manase alowae alo alokwap ayanae tasalu ananam a Mediterenian.

¹⁰Ayei Epiraim lowae loa lokuju, toyei Manase lowae loa lokwap. Arai anam a Mediterenian ekukuor kech alowae alo alo too. Ayei Acher kwap too, toyei Isakar kwap kide.

¹¹Anakwapea a Isakar ka Acher, alemarit Manase Bes-chan ka Ibileam, imorikina aapei ka ngadakarin na edunyatar, ta nabo Dor (lo eyei lokwaas a anam), ka Endor, ka Taanak ta Megido, imorikina aapei ka ngadakarin na edunyatar.

¹²Nakaneni peapedorete ngitunga a Manase akiritar ngitunga lu alomito lorerea ngulu, aloger kangolo, apot Ngikanaan kiboikinos neni.

¹³ Tani na aanyuneta Ngisirael agogongu, apot nyiitwarakis Ngikanaan, nakaneni kidesikis kesi akisub etich kech.

¹⁴Apot ngalesea a Yosep tolimokis Yochua tamasi, “Nyo bo kiinakinitor iyong sua epewae a akwap ana erai akosi. Tarai kilalak sua ani kipiaritor Ekapolon Akuj.”

¹⁵Tatachak Yochua tama, “Ani kilalak esi, kiditeikinit akwap na ngimukur, toloto robo nakwap a Ngiperes ka Ngirepaim toyapasi amoni kitiliwosi akus.”

¹⁶Tatachut kesi tamasi, “Edit akwap na ngimukur, nyikitemokin sua, nakaneni Ngikanaan lua ngaroatin eyakasi ngaurukukui na irito ngangolei, aapei ka lu eyakasi Bes-chan ka ngadakarin na idunyatar ta lu eyakasi nadipo a Yesireel.”

¹⁷Tolimok Yochua ngitela a Epiraim ka lua Too Manase tama, “Ilalak esi dir, nabo igogong noi. Ianyunete esi atiaket ache nabo.

¹⁸Eliwor akwap na ngimukur akus. Tani kerai amoni, iyaparete esi sodi toliwor daang akus napei alowae a epei tanang loche. Ani Ngikanaan, itwarakinete esi kesi tani keyakasi ngaurukukui na irito ngangolei, nabo taraakas lu egogong.”