Read turkana Yochua 18 Bible Online

Yochua 18 - turkana bible

Yochua 18

¹Ani elemarete Ngisirael akwap, apot daang kiriamariama Chilo sodi todukokis eam a Akuj.

²Ayakasi ngitela ngikan-kaarei a Ngisirael lu aringa nyetiakakina akwap.

³Sodi tolimok Yochua Ngisirael tama, “Nyooni eringa esi idarito alosit tolemasi akwap nakiinak esi Ekapolon Akuj na erai Akuj ka taapaakus.

⁴Asaki ayong toseunae ngitunga nguuni alokitela a epei, alotela kadaang. Ameari ayong kesi wadaang a akwap kisemoto akwap, sodi toseut ni esakete kesi alemar. Ani erumor tobongut ni ayei ayong.

⁵Etiakakinio kesi akwap ngatiaket ngakan-kaarei. Elomi Yuda lowae loa lokuju, sodi tolom Yosep lowae loa lokwap.

⁶Kigira eger a ngatiaket anakan-kaarei kanguna kiinut ayong. Sodi ataram ayong ekura[8] ataanyunea ngakiro kus na esaki Ekapolon Akuj na erai Akuj yok.

⁷Nakaneni nyeriamunete ngitunga a ekitela a Lawi akwap ka esi aapei kainyo ibore ni erai ikech ngesi akisub etich a Ekapolon Akuj eraakasi ngimurok a Akuj. Nabo ekitela a Gad ka loa Reuben ta loa Kide Manase, aanyut kolong akwap kech alo kide Yorudan, nakolong atiakakini kesi Musa, ekasuban etich a Ekapolon Akuj.”

⁸Sodi apot ngitunga ngulu toloto akigeronokin akwap sodi kigira ni ikoni, arumoret a Yochua alimokin kesi ebala, “Kapesi wadaang a akwap kigerokis, sodi tobongut ni ayei ayong. Ani erumor kataramak ayong esi ekura kane alo Chilo ataanyunea ngakiro kus na esaki Ekapolon Akuj.”

⁹Apot ngitunga ngulu toloto wadaang a akwap sodi kigira eger lo atiaketa kesi akwap ngatiaket ngakan-kaarei, nabo kigira ngirora a ngirerea. Sodi tobongosi kesi nia Yochua anadakar ana ayei Chilo.

¹⁰Taram Yochua ekura taanyunea ngakiro na esaki Ekapolon Akuj anikech. Ngitela a Ngisirael daang lu edongito, abu ngesi totiakanak a ngapeipei akwap epewae.

¹¹Akwap a ngitunga a ekitela a Benjamen ngesi epotorio ekingaren. Ayei akwap kech kiding ngitela a Yuda ka Yosep.

¹²Alokwap, esiakinit ekukuor kech alo Yorudan, kiriwor tanang nakokoriyoret na eyei kwap Yeriko. Ani alowae alo alo too, kitor nakwap na ngimukur, tanang nariet a Betapen.

¹³Tanang ekukuor nakokoriyoret alowae alo alokuju ani enyaritae Lus (ni anyaritae a eche kiro Besel), sodi totiyaar kwap tanang Ataros Adar, alomoru alo eyei kuju ekienyikina ka Bes-oron.

¹⁴Torei ekukuor napei alo too emoru kiriwor kuju tanang Kirias Baal (kori Kirias Yearim), na erai eka ekitela a Yuda. Ngolo ngesi erai ekukuor alo too.

¹⁵Isiakini ekukuor loa lokuju alokeli a Kirias Yearim, sodi tolot[9] tanang lolelea a Nepitoa.

¹⁶Tolot tanang nakeju a emoru alo erounit adipo a Inom, alowae alo alokwap esalunea anam a Repaim. Sodi tolot kuju kitor nadipo a Inom, alowae alo alokuju ekeku a Ngiebus, lowae lo etenere Enirogel.

¹⁷Torei kwap tanang Enichemech, sodi kiporo tanang Gelilos na ekienyikina ka apak a Adumim. Tolot ekukuor jik tanang namoru a Boan (arai Boan lokookeng a Reuben).

¹⁸Sodi kitor kwap ekeku lo erounit adipo a Yorudan sodi toloma nadipo.

¹⁹Kitor kwap apak a Bes Ogila tasalu anaremiet ana eyei kwap anam a Amakat, ni eremio angolol a Yorudan anam ngina. Ngolo ngesi arai ekukuor loa alokuju.

²⁰Yorudan ngesi arai ekukuor loa lokide. Ngikukuorin a akwap ana atiakinitae ngitunga a ekitela a Benjamen toliworos ngikech kesi ngulu.

²¹Ngirerea lu araakasi ngika ngitunga a ekitela a Benjamen kesi lu enyaritae Yeriko, ka Bes Ogila, ka Emek Kesis,

²²ka Bes Araba, ka Semaraim, ka Besel,

²³ka Apim, ka Para, ka Opira,

²⁴ka Keparamon, ka Opini, ta Geba. Araakasi ngirerea ngulu ngitomon ka ngiarei imorikina aapei ka ngadakarin na edunyatar.

²⁵Ngirerea nabo ngiche kesi lu enyaritae Gibeon, ka Rama, ka Beeros,

²⁶ka Misipa, ka Kepira, ka Mosa,

²⁷ka Rekem, ka Irepeel, ka Tarala,

²⁸ka Sela, ka Aelap, ka Yebus (kori Yerusalem), ka Gibea ta Kirias Yearim. Araakasi ngirerea ngulu daang ngitomon ka nguomwon, imorikina aapei ka ngadakarin na edunyatar. Akwap ngina ngesi atiakakinitae ngitunga a ekitela a Benjamen toliwor akech.