Read turkana Yochua 19 Bible Online

Yochua 19 - turkana bible

Yochua 19

¹Akwap na ngaarei ipotorio ngesi na atiakakinio ngitunga a ekitela a Simeon. Anangit akwap kech nakwap na atiakakinio ekitela a Yuda.

²Ngirerea a akwap kangina kesi ta Beer-cheba, ka Cheba, ka Molada,

³ka Asar Chual, ka Bala, ka Esem,

⁴ka Elitolad, ka Besul, ka Orima,

⁵ka Sikilag, ka Bes Marikabos, ka Asar Susa,

⁶ka Bes Lebaos ta Charuen. Araakasi ngirerea ngulu ngitomon ka nguuni imorikina aapei ka ngadakarin na idunyatar.

⁷Ngirerea nabo ngiche kesi lu enyaritae Ain, ka Rimon, ka Eseri, ta Achan. Araakasi ngirerea ngulu nguomwon, imorikina aapei ka ngadakarin na edunyatar.

⁸Emorikina kesi aapei ka ngadakarin na edunyatar ngirerea ngulu tanang Baalas Beer (kori Rama), lo eyei Negeb. Akwap ngina ngesi atiakakinitae ngitunga a ekitela a Simeon, toliwor akech.

⁹ Ani kona apoloo akwap na atiakakinitae Yuda noi, apon akwap epewae totiakakinae ekitela a Simeon.

¹⁰Akwap na ngauni ipotorio ngesi na atiakakinio ngitunga a ekitela a Sebulun. Anangit akwap na atiakakinio kesi Sarid.

¹¹Napei kaneni, tolot ekukuor too tanang Mareal, kiriama ka Dabeches, ta ayanae na eyei kide Yokineam.

¹²Alowae aloche a Sarid, abu kinapar kide tanang Kisilos Tabor, sodi kipor Daberas tanang Yapia.

¹³Tolot kide napei alo Gas Eper ka Esikasin, torei lowae a Nea lo eyei lorot lo etenere Rimon.

¹⁴Alokwap, torei ekukuor alowae a Anason, tasalu anadipo a Ipitael.

¹⁵Ngirerea lu ayakasi nakwap ngina kesi lu enyaritae Kata, ka Naalal, ka Chimuron, ka Idala, ta Betleem. Araakasi ngirerea ngulu ngitomon ka ngiarei, imorikina aapei ka ngadakarin na edunyatar.

¹⁶Ayakasi ngirerea ngulu ka ngadakarin kech nakwap na atiakakinitae ngitunga a ekitela a Sebulun toliwor akech.

¹⁷Akwap na ngoomwon ipotorio ngesi ngitunga a ekitela a Isakar.

¹⁸Arai akwap ngina na ngirerea alu enyaritae Yesireel, ka Kesulos, ka Chunem,

¹⁹ka Aparaim, ka Chion, ka Anaaras,

²⁰ka Rabis, ka Kichion, ka Ebes,

²¹ka Remes, ka Enganim, ka Eniada, ta Bespases.

²²Eriamito ekukuor tani ka Tabor, ka Chaasuma, ta Bes Chemech, tasalu alo Yorudan. Araakasi ngirerea ngulu daang ngitomon ka ngikan-kapei, imorikina aapei ka ngadakarin na edunyatar.

²³Ayakasi ngirerea ngulu ka ngadakarin kech nakwap na atiakakinitae ngitunga a ekitela a Isakar toliwor akech.

²⁴Akwap na ngakan ipotorio ngesi na ngitunga a ekitela a Acher.

²⁵Arai akwap ngina na ngirerea alu enyaritae Elikas, ka Ali, ka Beten, ka Akichap,

²⁶ka Alam Melek, ka Amad, ta Michal. Ani alo too, eriamito ka Karimel ta Chior Libinas.

²⁷Torei ekukuor kide tanang Besidagon, kiriama ka Sebulun ta adipo a Ipitael inapara kwap tanang Besemek ka Neyel. Kiriwor kwap tanang Kabul,

²⁸ka Eburon, ka Reob, ka Amon, ka Kana, tanang Sidon.

²⁹Torei ekukuor kinapar Rama, tanang lore a Tiro lo edukitoe awas. Sodi torei lowae a Osa, tasalu ananam a Mediterenian. Araakasi ngirerea keng ta Maalab, ka Akisib,

³⁰ka Uma, ka Apek ta Reob. Araakasi ngirerea ngulu ngitomwon-arei ka ngiarei imorikina aapei ngadakarin na edunyatar.

³¹Ayakasi ngirerea ngulu ka ngadakarin kech nakwap na atiakakinio ngitunga a ekitela a Acher toliwor akech.

³²Akwap na ngakan-kapei ipotorio ngesi na atiakakinio ngitunga a ekitela a Naputal.

³³Esiakinit ekukuor keng alo Elep tanang lochoke lo eyei ni enyaritae Saananim, kinapar tanang Adaminekeb ta Yaminia, toeka tanang Lakum tasalu alo Yorudan.

³⁴Torei ekukuor too tanang Asinos Tabor, kiriwor lowae loa Ukok, kiriama ka Sebulun alowae alo alokuju, ka Acher alowae alo alo too, ta Yorudan[10] alowae alo alo kide.

³⁵Ngirerea lu adukitoe ngawasea kesi Sidim, ka Ser, ka Amas, ka Rakas, ka Kineres,

³⁶ka Adama, ka Rama, ka Asor,

³⁷ka Kedech, ka Edirei, ka Eniasor,

³⁸ka Yiron, ka Migidalel, ka Orem, ka Besanas, ta Bes Chemech. Araakasi ngirerea ngulu ngitomon ka ngikan-koomwon, imorikina aapei ka ngadakarin na edunyatar.

³⁹Ayakasi ngirerea ngulu ka ngadakarin kech nakwap na atiakakinio ngitunga a ekitela a Naputal toliwor akech.

⁴⁰Akwap na ngakan-kaarei ipotorio ngesi na atiakakinio ngitunga a ekitela a Dan.

⁴¹Arai akwap ngina ngirerea alu enyaritae Sora, ka Echitaol, ka Irichemech,

⁴²ka Chaalibim, ka Aijalon, ka Isila,

⁴³ka Elon, ka Timuna, ka Ekiron,

⁴⁴ka Eliteke, ka Gibeson, ka Baalas,

⁴⁵ka Yeud, ka Beneberak, ka Gasirimon,

⁴⁶ka Mejarikon ta Rakon, imorikina aapei ka ngadakarin na edunyatar Yopa.

⁴⁷Ani edidingikini ngitunga a Dan akwap kech, toloto kesi toremo Laich. Taara ngitunga kaneni todemasi akwap kitiliwosi akech. Toloma kesi neni kilocho ekiro be Laich kitiliwosi Dan, tolimokis ekiro a apakech alo enyaritae Dan.

⁴⁸ Ayakasi ngirerea ngulu ka ngadakarin kech nakwap na atiakakinio ngitunga a ekitela a Dan, toliwor akech.

⁴⁹Ani erumorete Ngisirael atiakatiak akwap, apot nakis Yochua lokookeng a Nun akwap epewae toliwor akeng.

⁵⁰Loger lokolong adungunitor Ekapolon Akuj, apot nakis ngesi ere lo asakit ngesi lo enyaritae Timunas Sera, anakwap ana ngimukur a Epiraim. Toduka ngesi ere ngolo sodi tolom neni.

⁵¹Apot Eleasar lo arai emuron a Akuj ka Yochua lokookeng a Nun, ta ngikapolok a ngawiyei a ngitela a Ngisirael, totiakatiakata akwap kotere akiram ekura[11] alo Chilo, alokidor a eam a Akuj, taanyuneta ngakiro na esaki Ekapolon Akuj. Aloger kangolo, apot kesi torumosi akitiak akwap.