Read turkana Yochua 2 Bible Online

Yochua 2 - turkana bible

Yochua 2

¹Sodi abu Yochua tomea ngirototin ngiarei anadakar ana ayei ni enyaritae Aawoi, todungok atamar toloto torebo akwap a Kanaan, tarai cha noi ere a Yeriko asakitae torebo. Ani enanguneta lore, toloto topero kai ana amalaat anyaritae Raab.

²Kiira ekapolon a Yeriko atamar akolongit ngina nakwaare, aponito Ngisirael ngiche neni akireb akwap.

³ Abu ekapolon ngolo tomea itwaan nia Raab tama, “Eponito ngitunga lu eya kai kon akireb akwap daang! Kipud kesi nikalapatan!”

⁴Nakaneni ewait aberu ngina ngitunga luarei ngulu. Abu ngesi tatachu tama, “Iteni, aponito ngitunga ngiche nawi kang, nakaneni nyayeni ayong ni aponeta.

⁵Ani eribokini enangi ni egolere ekidor a ere, apot ngitunga ngulu topudosi nikalapatan, nyayeni ayong ni apot kesi toloto. Kiwapakisi kesi atipei kainyo ipedorete esi akidol.”

⁶Nakaneni keyaarit aberu ngina ngitunga ngulu kidiama akai keng tarap kesi a ngakasirim. Apetakinit sek ngesi ngakasirim nguna kidiama akai.

⁷Apot ngitunga a ekapolon torotokis, sodi togoloi ekidor. Torotokis kesi esakete ngirototin a Ngisirael tanang ni etubokinor erot angolol a Yorudan.

⁸Ani eringa ngirototin nyepero, abu Raab tolot kidiama akai

⁹tolimok kesi tama, “Ayeni atamar kiinak esi Ekapolon Akuj akwap naga. Ebulit itwaan daang a akwap kana kotere esi.

¹⁰Kiira sua eger lo etoonio Ekapolon Akuj anam a Chamu alongaren kus na irotokinioto esi alo Misiri. Kiira nabo eger lokolong iareta esi ngikapolok luarei a Ngiamor lu enyaritae Sion ka Ogu, lu alomito kide angolol a Yorudan.

¹¹Kipotu sua atoema atamaranikisi napei kiirarea ngakiro nguna! Kiem sua esi. Erai Ekapolon Akuj na erai Akuj kus, Akuj na eyei kidiama nadis, toyei nakwap nege.

¹²Kikongo tokona a ekiro keng atamar isubeta esi ngitunga a awi kang niajokon loger lokasubea ayong esi niajokon, nabo kidodikinae ibore ni ketunupi ayong ngakiro kus.

¹³ Kichikakinae ayong atamar iyuunete esi apakang ka itiokang ka talokaatokang ka tanakaatokang, ta ngitunga a ngawiyei kech daang! Warasi sua nyikiar!”

¹⁴Tolimokis ngitunga ngulu ngesi tamasi, “Kitaar Akuj sua pekisub sua ngakiro nakilimu![1] Ani pekilimok iyong itwaan ngakiro nakisubi sua, kichikak sua iyong atamar ani kiinakini sua Ekapolon Akuj akwap naga, kisubea sua iyong niajokon.”

¹⁵Alomit Raab kai na adukokinitae nawas a ere. Sodi kiyooliu ngesi ngitunga ngulu kwap a auno kisitor lopuke.

¹⁶Tolimok kesi tama, “Kapesi lomukur nyikianyuneta ngitunga a ekapolon. Toduka kaina a ngirwa a nguuni tanang ni ebongunioto kesi, ani erumor toloto.”

¹⁷Tolimokis ngitunga ngulu ngesi tamasi, “Kirichakini sua akichikakinet nakitilimu iyong sua.

¹⁸Ngakiro na echamit iyong isubi kesi nugu. Ani kiremi sua akwap kus, toinik auno naarengan naga lopuke lota kisitoruni iyong sua. Tochunak apakon ka itiokon ka talokaatokon ta ngitunga a awi a apakon daang tooma kai kon.

¹⁹Ani kepudo itwaan nikalapatan a akai, ngesi ilope epaikinio akitu keng, meere sua kipaikinio, nakaneni ani kewan itwaan alotooma akai, sua kipaikinio nguna.

²⁰Nakaneni ani kilimo iyong ngakiro na kisubi sua, nyikirichakini sua akichikakinet na kichikak sua iyong.”

²¹Tacham ngesi ngakiro nguna sodi talakak kesi toloto. Ani erotokinete kesi, toinik ngesi auno naarengan lopuke.

²²Toloto ngirototin lomukur toduka. Tasaka ngitunga a ekapolon kesi wadaang a ngirwa a nguuni, nakaneni nyeanyuna kesi. Apot ngitunga a ekapolon tobongosi Yeriko.

²³Sodi totiyaun ngirototin luarei ngulu alomukur, todokasi ekwakaye angolol, tobongosi nia Yochua. Tolimokis ngesi ngakiro na asubasi daang,

²⁴ani erumor tamasi, “Kiyen sua dir atamar kiinak ngoni Ekapolon Akuj akwap daang. Ebulit ngitunga daang kaina kotere ngoni!”