Read turkana Yochua 20 Bible Online

Yochua 20 - turkana bible

Yochua 20

¹Sodi tolimok Ekapolon Akuj Yochua

²atamar tolimok Ngisirael tama, “Toseutu ngirerea lu eyuunotor ngitunga, lukolong adungokini ayong Musa atamar kitolimok esi.

³Itwaan ni eari itwaan niche peiyechakinit, tolot inaa topuun anitwaan ani esaki atachakin akitu a itwaan ani earitae.

⁴Epedori ngesi adokin tolot ni eyei epei a ngirerea kangulu, sodi tolot ni elomanarere lokidor a ere, tolimok ngikapolok a ere ngakiro na asubasi. Nakaneni ilomakinete kesi ngesi lore kidodikis ni elomi.

⁵Ani kiwapak ngesi itwaan ni esaki atachakin akitu a itwaan ani earitae tanang neni, nyiipotokis ngitunga a ere kangolo itwaan ngini, torikokis itwaan ni iwapit. Echamit iyokiyete ngesi kainyo peeyachakini ngesi akiar itwaan kori peangoit.

⁶Iboikin ngesi lore ngolo tanang ititao alongaren ngitunga, nabo tanang atoanet emuron loapolon a Akuj, alo a ngirwa kangulu. Ani erumor tobongo itwaan ngini lore lo eyei awi keng, nikolong arotokinio.”

⁷Alo too Yorudan, apon toseunae ere a Kedech lo eyei Galilaya, anakwap ana ngimukur a Naputal, ka Chekem anakwap ana ngimukur a Epiraim, ta Eburon anakwap ana ngimukur a Yuda.

⁸Alo kide Yorudan, apon toseunae ere a Beser loa akwap a Reuben, lo eyei lomuria a ariet ana eyei kide Yeriko, ka Ramos alo Gilead, ni eyei akwap a Gad, ka Golan alo Bachan, ni eyei akwap a Manase.

⁹ Ngirerea ngulu kesi lu aseunio toyuunotor Ngisirael ka itwaan cha daang a akwap a ache ni arukito ka kesi. Itwaan ni aari itwaan niche peiyechakinit, apedori ayuun kaina, kilany itwaan ni asaki atachakin akitu a itwaan ani earitae. Peapedorio akiar ngesi mati mono kititae alongaren ngitunga daang.