Read turkana Yochua 21 Bible Online

Yochua 21 - turkana bible

Yochua 21

¹Apot ngikapolok a ngitunga a ekitela a Lawi toloto nia Eleasar alo arai emuron a Akuj, ka Yochua lokookeng a Nun, ta ngikapolok a ngawiyei a ngitela a Ngisirael kadaang.

²Sodi tolimokis kesi alo Chilo, alo arai ere a akwap a Kanaan tamasi, “Adunguni kolong Ekapolon Akuj ani a Musa atamar kiinakin sua ngirerea lu kilomi, ka akwap na idunyatar ngirerea ngulu na kiyoki sua ngibaren kosi.”

³ Aloger alo adungunitor Ekapolon Akuj, apot Ngisirael totiakut anakwap kech ngirerea epewae ka ni iyokiyo ngibaren sodi nakis ngitunga a ekitela a Lawi.

⁴Ngitunga a ekitela a Lawi lu araakasi ngika emachar a Koas, kesi esiaunio totiakakinae ngirerea. Ngitunga lu araakasi ngalesea a Aron, alo arai emuron a Akuj, kesi apon totiakakinae ngirerea ngitomon ka nguuni anakwapea a Yuda ka Simeon ta Benjamen.

⁵Ngitunga luche a emachar a Koas, kesi apon totiakakinae ngirerea ngitomon anakwap a Epiraim ka Dan ta Too Manase.

⁶Apon totiakakinae emachar a Gerichon ngirerea ngitomon ka nguuni anakwapea a Isakar, ka Acher, ka Naputal ta kide Manase.

⁷Apon totiakakinae ngitunga a emachar a Merari ngirerea ngitomon ka ngiarei anakwapea a Reuben, ka Gad ta Sebulun.

⁸Apot Ngisirael totiakakis ngitunga a ekitela a Lawi ngirerea ngulu ka ni iyokiyo ngibaren. Apot tosuba kongina kotere akiram ekura lokolong adungunitor Ekapolon Akuj kisitoru nia Musa.

⁹Lugu kesi eraakasi ngirora a ngirerea a ngakwapea a Yuda ka Simeon,

¹⁰lu ainakinio ngalesea a Aron na araakasi ngaka emachar a Koas, alo erai eka Lawi. Akwap kech ngesi engareni etiakunio.

¹¹Apon kesi nakinae ere enyaritae Ariba (arai Ariba apakeng a Anak). Enyaritae tokona ere ngolo Eburon. Eyei ere ngolo nakwap na ngimukur a Yuda, imorikina aapei ka akwap na idunyatar na iyokiyo ngibaren.

¹²Nakaneni atiakakinitae sek Kaleb lokookeng a Yepune ngamanat a ere kangolo ka ngadakarin toliworos ngakeng.

¹³Apon Aron lo arai emuron a Akuj totiakakinae Eburon (lo arai epei a ngirerea alu eyuunotor ngitunga), kiatakin lorerea lu enyaritae Libina,

¹⁴ka Yatir, ka Echitemoa,

¹⁵ka Olon, ka Debir,

¹⁶ka Ain, ka Yuta ta Bes Chemech, imorikina aapei ka ni iyokiyo ngibaren. Araakasi daang ngirerea ngikan-koomwon ipotorio alotela a Yuda ka Simeon.

¹⁷Apon ngalesea a Aron totiakakinae ngirerea nguomwon anakwap a Benjamen. Ngirora a ngirerea kangulu kesi Gibeon, ka Geba,

¹⁸ka Anasos ta Alimon, imorikina aapei ka ni iyokiyo ngibaren.

¹⁹Ngirerea ngulu daang atiakakinio ngimurok a Akuj lu araakasi ngalesea a Aron. Araakasi ngirerea daang ngitomon ka nguuni, imorikina aapei ka ni iyokiyo ngibaren.

²⁰Ngitunga luche a ekitela a Lawi lu araakasi ngika emachar a Koas kesi apon totiakakinae ngirerea ngiche anakwap a Epiraim.

²¹Atiakakinitae ngirerea nguomwon lu anyaritae Chekem ka akwap keng na iyokiyo ngibaren anakwap ana ngimukur a Epiraim (arai epei a ngirerea alu ayuunotor ngitunga), ka Geser,

²²ka Kibisaim ta Bes-oron, imorikina aapei ka ni iyokiyo ngibaren.

²³Apon kesi nakinae ngirerea nguomwon anakwap a Dan. Ngirora a ngirerea kangulu kesi Eliteke, ka Gibeson,

²⁴ka Aijalon ta Gasirimon, imorikina aapei ka ni iyokiyo ngibaren.

²⁵Apon kesi totiakakinae ngirerea ngiarei anakwap a too Manase. Ngirora a ngirerea kangulu kesi Taanak ta Gasirimon imorikina aapei ka ni iyokiyo ngibaren.

²⁶Apon ngitunga lua emachar a Koas ngulu totiakakinae ngirerea ngitomon, imorikina aapei ka ni iyokiyo ngibaren.

²⁷Apon totiakakinae ngitunga a ekitela a Lawi lu emachar a Gerichon ngirerea ngiarei anakwap a Kide Manase. Ngirora a ngirerea kangulu kesi Golan lo eyei Bachan (arai epei a ngirerea alu ayuunotor ngitunga) ta Beechitera, imorikina aapei ka ni iyokiyo ngibaren.

²⁸Apon totiakakinae ngirerea nguomwon anakwap a Isakar. Ngirora a ngirerea kangulu kesi Kichion, ka Daberas,

²⁹ka Yarimus ta Enganim, imorikina aapei ka ni iyokiyo ngibaren.

³⁰Apon totiakakinae ngirerea nguomwon anakwap a Acher. Ngirora a ngirerea kangulu kesi Michal, ka Abidon,

³¹ka Elikas ta Reob, imorikina aapei ka ni iyokiyo ngibaren.

³²Apon kesi totiakakinae ngirerea nguuni anakwap a Naputal. Ngirora a ngirerea kangulu kesi Kedech lo eyei Galilaya, imorikina aapei ka ni iyokiyo ngibaren (arai epei a ngirerea alu ayuunotor ngitunga), ka Amos Dor ta Karitan, imorikina aapei ka ni iyokiyo ngibaren.

³³Araakasi ngirerea lu atiakakinitae ngitunga a emachar a Gerichon ngitomon ka nguuni imorikina aapei ka ni iyokiyo ngibaren.

³⁴Apon ngitunga a ekitela a Lawi luche lu a emachar a Merari totiakakinae ngirerea nguomwon anakwap a Sebulun. Ngirora a ngirerea kangulu kesi Yokineam, ka Karita,

³⁵ka Dimina ta Naalal, imorikina aapei ka ni iyokiyo ngibaren.

³⁶Apon kesi totiakakinae ngirerea nguomwon anakwap a Reuben. Ngirora a ngirerea kangulu kesi Beser, ka Yaas,

³⁷ka Kedemos ta Mapaas imorikina aapei ka ni iyokiyo ngibaren.

³⁸Apon kesi totiakakinae ngirerea nguomwon anakwap a Gad. Ngirora a ngirerea kangulu kesi Ramos lo eyei Gilead, ka ni iyokiyo ngibaren (arai epei a ngirerea alu ayuunotor ngitunga), ka Maanaim,

³⁹ka Echibon ta Yaser, imorikina aapei ka ni iyokiyo ngibaren.

⁴⁰Nakaneni apon emachar a Merari totiakakinae ngirerea ngitomon ka ngiarei.

⁴¹Araakasi ngirerea a ngitunga a Lawi anakwap kadaang ana aliwor aka Ngisirael ngitomwon-omwon ka ngikan-kauni, imorikina aapei ka ni iyokiyo ngibaren.

⁴²Ayakasi ngirerea ngulu daang ngiwaitin lu iyokiyo ngibaren.

⁴³Abu Ekapolon Akuj nak Ngisirael akwap daang nakolong echikakinit ngesi taapaakech atamar ainakini. Ani elemarete kesi akwap ngina, apot toloma neni.

⁴⁴Kitaanyu Ekapolon Akuj kesi ekisil anakwap kadaang, loger lokolong echikakinitor taapaakech. Emam ngimoe kech lo abu toweik kesi tani epei, kainyo apot Ngisirael kidwanga ngimoe kech daang kotere Ekapolon Akuj.

⁴⁵Kiyook Ekapolon Akuj ngakichikakinet keng daang nakolong echikakinit Ngisirael.