Read turkana Yochua 22 Bible Online

Yochua 22 - turkana bible

Yochua 22

¹Abu Yochua tochunak ngitunga a ngitela a Reuben, ka Gad ta Kide Manase.

²Tolimok kesi tama, “Isuba esi ngakiro daang nakolong kidungokini Musa ekasuban etich a Ekapolon Akuj atamar tosuba, nabo irichakis ngakiro nakadungokinit ayong esi daang.

³Nyeisikina esi Ngisirael luche alochan napei kanuan jik. Ichoikis esi akiwap ngakiro nakidungok Ekapolon Akuj, na erai Akuj kus.

⁴Tokona, etaanyu Ekapolon Akuj na erai Akuj kus Ngisirael luche ekisil loger lokolong echikakinitor ngesi. Aloger kangolo, tobongosi nawi, nakwap nakolong kitiakakinio esi toliwor akus, nakwap na eyei kide Yorudan, nakolong kiinakini esi Musa, lo erai ekasuban etich a Ekapolon Akuj.

⁵Kirichakisi etal lokolong kidungokini Musa esi. Tominakisi Ekapolon Akuj na erai Akuj kus, tosuba ngakiro na esaki ngesi, kirichakisi ngitalio keng, toliworos ngitunga lu kimuno Akuj, tosuba etich keng a ngitai kus kadaang, ka akiyar kus daang.”

⁶Nakaneni topia Yochua kesi kimiek toloto. Apot kesi toloto nawiyei kech.

⁷Atiakakinit Musa ngitunga a ekitela a Manase epewae akwap alo Bachan, nakaneni ani ngitunga a ekitela a Manase luche, atiakakinit Yochua akwap aapei ka talokaatokech alowae alo alo too Yorudan. Ani elimokini Yochua kesi atamar toloto nawiyei kech, sodi topia kesi,

⁸ tolimok kesi tama, “Tobongosi nawiyei kus ka ebari lotikaalan, ka ngaatuk nakaalak, ka ngasua nakwangae, ka egolit, ka ngasua nanyangayek, ka ngasua nakirionok ta ngiworui lukaalak. Tokora ka ngitunga kus luche ngiboro lu ingatarete alomoe kus.”

⁹Apot ngitunga a ngitela a Reuben ka Gad, ta Kide Manase tobongosi nawiyei. Toisikis kesi Ngisirael luche alo Chilo, anakwap a Kanaan, sodi toloto kesi nakwap a Gilead na arai akwap kech nakolong alemarete kesi loger lokolong echikakinitor Ekapolon Akuj kesi kisitoru nia Musa.

¹⁰Ani enangunete ngitela a Reuben ka Gad ta Kide Manase ni enyaritae Gelilos, ni erai too[12] Yorudan, apot todukokis ekeno a ngakipeyos lotiapolon ajokon lokwaas a angolol.

¹¹Apon tolimokinae Ngisirael luche tamarae, “Topupokisi! Adukokis ngitunga a ngitela a Reuben, ka Gad ta Kide Manase ekeno a ngakipeyos Gelilos, lowae a Yorudan lo erai eyok!”

¹²Ani iirarete Ngisirael ngakiro nguna, apot ngitunga daang tochunakin Chilo alosit akitijwore ngitela lua akide.

¹³Sodi tomeasi Ngisirael Pineas lokookeng a Eleasar alo arai emuron a Akuj, sodi tolot lotunga a ngitela a Reuben, ka Gad ta Kide Manase anakwap a Gilead.

¹⁴Apot ngikapolok ngitomon kirukosi ka Pineas, epei eweikinit ekitela epei alotela alu ayakasi too, nabo ayakasi ngikapolok lu araakasi ngika ngimacharin, eweikinit epei emachar epei.

¹⁵Tanangut kesi nakwap a Gilead lotunga a Reuben, ka Gad, ta Kide Manase,

¹⁶kisuruorikis kesi ngitunga a Ekapolon Akuj daang tamasi, “Kotere nyo isubeta esi Akuj a Isirael ngakiro naaronok nugu? Ingero esi Ekapolon Akuj ani idukioto ekeno lo a ngakipeyos logo kitiliwosi ekus! Nyeringa esi iwapito ngesi!

¹⁷Kitamutu akisech nakolong kisubi ngoni alo Peor, na eriraa Akuj ngitunga keng a ngidekesinei aluaronok. Eringa ngoni kichana kotere ngakiro nguna. Nyitemokino kolong akisech ngina?

¹⁸Ingerete tokona esi akiwap ngesi a? Ani kingero esi Ekapolon Akuj akolongit naga, engoikini moi ngesi Ngisirael daang.

¹⁹Aloger kangolo, ani pekitemokino akwap kus ilipeenere, potu nakwap a Ekapolon Akuj, ni eyei eam keng. Tolemasi akwap nakosi epewae. Nakaneni nyiingero Ekapolon Akuj kori nyikitiliwosi sua ngitunga lu engerito Ekapolon Akuj ani idukioto ekeno a ngakipeyos toyei ekeno a ngakipeyos a Ekapolon Akuj ana erai Akuj yok.

²⁰ Kitamutu eger lokolong awounea Akani lokookeng a Sera akirichakin ngakiro na adungokinitae aloboro alu achamit inyasunio. Apon kirirae Ngisirael daang kotere ngakiro nguna. Meere Akani bon atoani kotere akisech keng.”

²¹Apot ngitunga a ngitela a Reuben ka Gad ta Kide Manase tatachakis ngikapolok a ngitunga a ngitela a atoo tamasi,

²²“Akuj ngesi erai Namerikanyer! Ngesi erai Ekapolon Akuj! Akuj ngesi erai Namerikanyer! Ngesi erai Ekapolon Akuj! Eyeni ngesi atamar anukiro kisubea sua kona, nabo kisaki tani esi toyena! Ani kingerit sua Ekapolon Akuj, sodi atosuba ngakiro na nyeraakasi ngaka iteni anikeng, nyikimiekis sua kiyari nabo jik!

²³Ani kingerit sua Ekapolon Akuj sodi atoduko ekeno a ngakipeyos kosi a ngikulepek, kori toliwor eka ngakipeyos a ngalemet ka ngakipeyos a ekisil, kimiekisi Ekapolon Akuj alope kirira sua.

²⁴Meere kongina! Kisubi sua kongina kainyo kiemi kitamit atamar epote moi ngalesea kus tolimokis ngalesea kosi tamasi, ‘Nyo kus Ekapolon Akuj na erai Akuj a Isirael?

²⁵Ewaakini ngesi angolol Yorudan kitotiak sua ka esi ngitunga a Reuben ka Gad. Meere esi ngitunga a Ekapolon Akuj.’ Nakaneni epedorete ngalesea kus kitapalikis ngalesea kosi akilip Ekapolon Akuj.

²⁶Kipot sua atoduko ekeno, meere loa ngakipeyos kori loa ngalemunet.

²⁷Nakaneni erai akidodiunet a ngitunga kosi ka lukus, ka ngalesea yok nakisidiun ngoni. Kidodiu atamar kilipit ngoni Ekapolon Akuj iteni aloeam keng a ngakipeyos yok ana inomio, ka ngakipeyos a ngibaren ta ngakipeyos a ekisil. Kisubi sua kona nyeetamareta ngalesea kus nyeyenete ngalesea kosi Ekapolon Akuj.

²⁸Kitamit sua atamar ani kisubak kona, etamarete ngalesea kosi, ‘Kingolikisi! Asubakinete kolong taapaakosi ekeno a ngakipeyos lo ikwaan ka ekeno a ngakipeyos. Arai meere eka ngakipeyos ana inomio, kori ngakipeyos a ngibaren kori ngakipeyos a ekisil, nakaneni arai akidodiunet a ngitunga kosi ka lukus.’

²⁹Iteni nyikingeri sua Ekapolon Akuj kori nyikipalikini tokona sua akiwap ngesi kotere akiduk ekeno lo inomere ngakipeyos, kori lo ipeyoore ngalemet, kori ngakipeyos a ngibaren. Nyikiduki sua ekeno eche mati lo ipeyonokinere Ekapolon Akuj na erai Akuj yok. Ekeno ngolo ngesi lo eyei ngaren eam keng.”

³⁰Apot Pineas lo arai emuron a Akuj ngikapolok a ngitunga lutomon lu arukito ka ngesi, ta ngikapolok a ngawiyei a ngitela a atoo, kiirasi ngakiro na alimunete ngitunga a ngitela a Reuben, ka Gad ta Kide Manase, sodi tojoikis ngakiro nguna kesi.

³¹Abu Pineas lokookeng a Eleasar, alo arai emuron a Akuj, tolimok kesi tama, “Kiyen tokon sua atamar kirukit ngoni ka Ekapolon Akuj. Eringa esi nyengero ngesi. Aloger kangolo, iyuut esi Ngisirael aloriras a Ekapolon Akuj.”

³²Apot Pineas ka ngikapolok toisikis ngitunga a Reuben, ka Gad anakwap a Gilead. Toloto kesi tobongosi Kanaan ni ayakasi Ngisirael, sodi tolimokis Ngisirael ngakiro nguna.

³³Tojoikis Ngisirael ngakiro nguna sodi kipuruut Akuj. Apot kesi nyiiruoro nabo ngakiro a alosit lojie esakete akinyasun akwap a ngitunga a Reuben ka Gad.

³⁴Tolimut ngitunga a Reuben ka Gad tamasi, “Erai ekeno loa ngakipeyos logo itaanyuni ngitunga daang atamar Ekapolon Akuj ngesi erai Akuj.” Kotere ngakiro nguna, apon ekeno ngolo tolimokinae ekiro be “Ekaanyunan.”