Read turkana Yochua 23 Bible Online

Yochua 23 - turkana bible

Yochua 23

¹Ekisidi abu Ekapolon Akuj kiyok Ngisirael alomoe kech alu eriamito kesi. Ngirwa ngulu amojongit Yochua noi.

²Sodi tanyarau ngesi Ngisirael daang ka ngikasukou, ka ngikapolok, ka ngikatubok ngakiro ta ngikaweikinak a ngitunga, tolimok tama, “Amojong ayong tokona noi.

³Ingolikis esi ngakiro daang na asubea Ekapolon Akuj na erai Akuj kus ngibukui lugu daang kotere esi.

⁴Atiakak ayong ngitela kus ngakwapea a ngitela alu idongito, imorikina aapei ka ngibukui daang lu edwang ayong napei alo kide angolol a Yorudan tanang nanam a Mediterenian alo too.

⁵Iritari Ekapolon Akuj na erai Akuj kus kesi anikus, nabo itwarakini kesi toeakasi na ilooso esi ngaren. Ilemarete esi akwap kech loger lo kichikakinea esi Ekapolon Akuj na erai Akuj kus.

⁶Kirichakinos robo kiwapa ka akisub ngakiro daang na igiritae nakitab a etal a Musa. Nyiilagalagakis tani wadiochichi.

⁷Sodi nyiimorikinosi esi ka ngitunga lu idongito kiding kus lugu kori tolimuunut ngakujo kech, kori kikongo a ngirora a ngakujo kech, kori kilipa kesi, kori toriediko alongaren kech.

⁸Pearai toliworos esi lu kimuno Ekapolon Akuj loger lo isubeta tanang tokona.

⁹Itwarakini Ekapolon Akuj ngibukui lu eyenikinitae taraakas nabo lukajwok, itwarakini na ilooso esi ngaren. Emam tani epei kiweikini esi alojie.

¹⁰Epedori itwaan ipei anikus akiritar ngitunga abunget apei, kainyo Ekapolon Akuj na erai Akuj kus ngesi eji kotere esi, loger lokolong kichikakinea.

¹¹Kirichakisi robo aminakin Ekapolon Akuj na erai Akuj kus.

¹²Ani kisecha esi kimorikinos ka ngibukui luche idongito kiding kus, sodi toliwor iutasi ka esi,

¹³ toyena iteni dir atamar nyiritari Ekapolon Akuj na erai Akuj kus ngibukui lugu esaa lo ilooso esi ngaren. Pearai erokearosi kesi anikus kikokis eloit, kori akipany, nabo epipiler noi loger a akulit ana kirami kaku, kori kikok ngiikwa anakonyen kus. Epete ngakiro nugu jik tanang imunyarosi esi, nyiidong tani ipei nakwap naajokon naga, nakiinak esi Ekapolon Akuj na erai Akuj kus.

¹⁴“Anang tokona esaa kang lo adaunor. Iyenete esi daang alotai kus nabo anakiyar kus atamar kiinak Ekapolon Akuj ngakiro naajokak daang nakolong kichikakini. Eyookin ngakichikakinet daang nakolong alimuni ngesi. Emam tani apei na nyiyookino.

¹⁵Loger lokolong eyookinio ngakichikakinet naajokak daang, kongina pei tani naaronok daang na alimu ngesi atamar ayauni nikus.

¹⁶Ani pekirichakis esi achamunet nakolong kidungokini esi Ekapolon Akuj na erai Akuj kus atamar kirichakis, sodi kiwapa esi ka akilip ngakujo nache, engoi Ekapolon Akuj noi kirira esi. Ani napei ngina jik, emam tani ipei kus ni idongi nakwap naajokon nakiinak ngesi esi naga.”