Read turkana Yochua 3 Bible Online

Yochua 3 - turkana bible

Yochua 3

¹Ataparach nache, apot Yochua ka Ngisirael daang tonyout nataparach elilim taramakis ani enyaritae Aawoi, toloto Yorudan toloma neni eringa idarito akidok ekwakaye.

²Adaunet a ngirwa a nguuni, apot ngikarikok kitoro kiding adakar

³tolimokis ngitunga tamasi, “Ani ingolikinete ngimurok a Akuj iwokito asaduku a Achamunet a Ekapolon Akuj ana erai Akuj kus, tonyoutu anadakar kiwapakis kesi.

⁴Nyenanguna esi nege a ache, kanguna kirikete kesi esi. Nakaneni nyiapiasi diyete asaduku a Achamunet, tachadakinos akilomitait apei iwapito ngesi.”

⁵Tolimok Yochua ngitunga tama, “Kitaleunos kitosegas, kainyo esubakini moi Ekapolon Akuj ngakitoodikinet nakailiilok anikus.”

⁶Sodi tolimok ngimurok a Akuj atamar tolemasi asaduku a Achamunet tolooso ngaren ngitunga. Tosuba kesi loger lo alimuni Yochua.

⁷Tolimok Ekapolon Akuj Yochua tama, “Kotere ngakiro na asubakini ayong akolongit naga, kirimasi iyong Ngisirael daang toyena atamar irai iyong itwaan ni kiyenikinitae. Eyenunete tani atamar kirukit ayong ka iyong loger lokolong kirukitor ka Musa.

⁸Tolimok ngimurok a Akuj lu edakito asaduku a Achamunet atamar na enangeta lokwaas a ngakipi a Yorudan, towaa kaneni.”

⁹Tolimok nabo Yochua Ngisirael tama, “Potu nege kiirasi ngakiro na elimuni Ekapolon Akuj na erai Akuj kus.

¹⁰Ani kirotokis esi ngaren, iritari ngesi dir Ngikanaan, ka Ngiiti, ka Ngiipi, ka Ngiperes, ka Ngigirigach, ka Ngiamor ta Ngiebus. Iyenunete atamar eyei Akuj na eyari nikus

¹¹na idokarere asaduku a Achamunet Ekapolon Akuj a akwap kadaang ekwakaye Yorudan toeka ngaren kus.

¹²Toseutu tokona ngitunga ngitomon ka ngiarei alotela alutomon ka ngiarei a Ngisirael, itwaan ipei alokitela a epei.

¹³Ngimurok a Akuj lu edakito asaduku a Achamunet a Ekapolon Akuj ana erai Ekapolon a akwap kadaang, ani ilomakinete ngakejen kech nakipi, etubosi ngakipi a angolol a Yorudan sodi kiliirakin ngakipi na eleleunito alokuju wapei.”

¹⁴Torotokis ngitunga anadakar toloto nangolol a Yorudan, edakito ngimurok a Akuj asaduku a Achamunet ingarenete.

¹⁵Ani enangunete ngimurok lu adakito asaduku nangolol, ilomakinete ngakejen kech lokwaas a angolol (ilelebuunun Yorudan ngirwa lulemet ngamanat),

¹⁶apot ngakipi na aleleunito alokuju kiliirakin wapei tooyaketa, eyakasi nikalonan enyaritae Adam, ere lo eyei diyete Saretan. Apot ngakipi nakalelearak kwap anam a Amakat kisunyar, topedosi ngitunga adokar ekwakaye diyete Yeriko.

¹⁷Ani eringa ngitunga edokete ekwakaye itorito nikoonon, apot ngimurok lu adakito asaduku a Achamunet a Ekapolon Akuj towaa alotau a angolol a Yorudan anikoonon a ngalup tanang ngitunga daang edokarete ekwakaye.