Read turkana Yochua 4 Bible Online

Yochua 4 - turkana bible

Yochua 4

¹Ani kedokasi ngitunga daang ekwakaye Yorudan kerumor, tolimok Ekapolon Akuj Yochua tama,

²“Toseu ngitunga ngitomon ka ngiarei, ipei alokitela a epei,

³sodi todungok kesi atamar tolemut ngamoru ngatomon ka ngaarei alotau a angolol a Yorudan anisek awaatar ngimurok. Tolimok kesi atamar totinga ngamoru nguna tanang nita iperete esi nakwaare.”

⁴Ani erumor tanyara Yochua ngitunga lutomon ka ngiarei lu aseunit ngesi,

⁵sodi tolimok tama, “Tolomasi tooma Yorudan kingarenikis asaduku a Achamunet a Ekapolon Akuj ana erai Akuj kus. Tolem itwaan daang amoru kiwok aloseget, ngitela a Ngisirael epei itwaan ipei.

⁶Isitamunete ngamoru nugu ngitunga ngakiro na asub Ekapolon Akuj. Ani monan ingitasi ngide kus atamar nyoni eger a ngamoru kanu anikus,

⁷ilimokinete esi kesi atamar atubosi ngakipi a Yorudan na edokarere asaduku a Achamunet a Ekapolon Akuj ekwakaye angolol. Isitamunete ngamoru nugu Ngisirael jiik ngakiro na asubasi.”

⁸Apot ngitunga ngulu kiwapa ngakiro a Yochua. Loger lo adungokinitor Ekapolon Akuj Yochua, apot kesi tolemut ngamoru ngatomon ka ngaarei alotau a angolol a Yorudan, eweikinit amoru apei ekitela epei a Ngisirael. Yaasi kesi ngamoru nguna tanang ni aperete, kiwaakis neni.

⁹Abu Yochua dang kitowo ngamoru ngatomon ka ngaarei alotau a angolol a Yorudan, anisek awaatar ngimurok a Akuj lu adakito asaduku a Achamunet. (Eringa ngamoru nguna eyakasi neni tani tokona.)

¹⁰Apot ngimurok towaa alokiding angolol a Yorudan tanang ni arumorotor ngakiro daang na adungokinit Ekapolon Akuj Yochua atamar tosuba ngitunga. Eraakasi ngakiro nugu kolong adunguni Musa. Apot ngitunga todokasi atipei ekwakaye.

¹¹Ani enangete kesi ekwakaye, apot ngimurok a Akuj ka asaduku a Achamunet kingarenikis ngitunga.

¹²Todokasi ngitela a Reuben ka Gad ta epewae a ekitela a Manase, kingarenikis ngitunga luche loger lo alimokinitor Musa kesi. Atingito kesi daang ngiboro lua ejie.

¹³Alongaren Ekapolon Akuj, apot ngitunga ngabunge ngatomwon-omwon lu atingito ngiboro lujiet todokasi naroatin na eyakasi diyete Yeriko.

¹⁴Apot ngakiro na asubi Ekapolon Akuj akolongit ngina kitoyena Ngisirael atamar erai Yochua dir itwaan ni eyenikinitae. Toliwor erimasi ngesi aloboyor keng kadaang loger lokolong arimatar Musa.

¹⁵Sodi tolimok Ekapolon Akuj Yochua atamar

¹⁶todungok ngimurok lu adakito asaduku a Achamunet todokut alo Yorudan.

¹⁷Tosubak Yochua nguna.

¹⁸Ani enangete ngimurok a Akuj lokwaas a angolol, kisiak angolol aleleun nabo sodi kilelebun tani lokwaasea.

¹⁹Adokete ngitunga angolol a Yorudan akolongit na ngatomon a elap alo ekingaren, toloma kesi Giligal ni eyei kide Yeriko.

²⁰Abu Yochua kitowo kaneni ngamoru natomon ka ngaarei na alemunio alo Yorudan.

²¹Tolimok Ngisirael tama, “Monan na kingiseta ngide kus esi atamar nyoni eger a ngamoru kanu,

²²ilimokinete esi kesi ngakiro a akolongit ana adoketa Ngisirael Yorudan kitoro nikoonon.

²³Tolimokis kesi atamar etooni Ekapolon Akuj na erai Akuj kus ngakipi a Yorudan todokareta esi ekwakaye, loger lokolong etoonio anam a Chamu kotere ngoni.

²⁴Kotere nguna, eyenunete ngibukui daang anakwap ationis a agogongu a Ekapolon Akuj, nabo ikerete esi Ekapolon Akuj na erai Akuj kus jik.”