Read turkana Yochua 6 Bible Online

Yochua 6 - turkana bible

Yochua 6

¹Agolitoe ngidorin a Yeriko nabo eteo nyeelomuneta Ngisirael. Amam itwaan apedori alomun kori apudor nikalapatan a ere.

²Tolimok Ekapolon Akuj Yochua tama, “Kotere ayong, idwang iyong ngitunga a Yeriko, ka ekapolon kech, ta ngasigerea nakajwok daang ilema.

³Kirimokisi iyong ka ngasigerea kon ere logo akirimokinet apei akolongit apei, a ngirwa a ngikan-kapei.

⁴Esakitae ngimurok a Akuj ngikan-kaarei etingito ngaburucho, kingarenikis asaduku a Achamunet. Akolongit na ngakan-kaarei, kirimokis iyong ka ngasigerea kon ere ngakirimokinet ngakan-kaarei, tokutakinito ngimurok a Akuj ngaburucho.

⁵Ani erumor tokutakis akutakinet nakooyen. Napei iirareta esi akutakinet ngina, kiremasi ngitunga daang lokojokon, sodi toukor awas. Ani erumor toloma ajore daang lore.”

⁶Tanyara Yochua ngimurok a Akuj tolimok tama, “Tolemasi asaduku a Achamunet, toloto ngikan-kaarei kus ngaren asaduku etingito ngaburucho.”

⁷Sodi todungok ngesi ngitunga keng atamar kisiakis akirimokin ere, pena lukajwok ngaren asaduku a Achamunet a Ekapolon Akuj.

⁸Loger lo adungokinea Yochua ngitunga, apot ngimurok lukan-kaarei kingarenikis ekutakinito ngaburucho, kiwapite kesi asaduku a Achamunet a Ekapolon Akuj.

⁹Kingarenikis ngikiliok lukajwok ngimurok a Akuj lu akutakinito ngaburucho, sodi kiwapuut nabo ngasigerea nache, tokutakinitetei ngaburucho esaa ngolo daang.

¹⁰Nakaneni alimokinit Yochua ngitunga atamar nyiiremasi kori nyeelimut akiroit tanang ni edungunio ngesi elope.

¹¹Sodi tolimok ngesi atiakaru ngina atamar tolemasi asaduku a Achamunet a Ekapolon Akuj kirimokineta ere akirimokinet apei. Ani erumor tobongut topero neni.

¹²Sodi tonyou Yochua nataparach elilim, tolemasi ngimurok a Akuj asaduku a Achamunet a Ekapolon Akuj.

¹³Kingarenikis ngimurok lukan-kaarei lu atingito ngaburucho, ekusete jiik. Kingarenikis kesi ngasigerea ngache, kiwapuut nabo ngasigerea nache asaduku a Achamunet a Ekapolon Akuj, tokutakinitetei ngaburucho jiik.

¹⁴Akolongit na ngaarei, toloto nabo kirimokis ere akirimokinet apei, sodi tobongut nadakar. Apot kesi tosuba kongina kotere ngirwa ngikan-kapei.

¹⁵Akolongit na ngakan-kaarei tonyout kesi echili nanyang kirimokis ngakirimokinet ngakan-kaarei loger lopalem sek. Akolongit naga bon ngesi erimokineta kesi ngakirimokinet ngakan-kaarei.

¹⁶Akirimokinet na ngakan-kaarei, ani eapikini ngimurok akutakin ngaburucho, tolimok Yochua ngitunga keng atamar kiremasi, sodi tolim ngesi tama, “Kiinak esi Ekapolon Akuj ere!

¹⁷Ejoikinit ere ka ibore daang ni eyei tooma inyasunio toliwor akipeyos a Ekapolon Akuj. Amalaat Raab bon ka ngitunga a awi keng ngesi imiekinio, kainyo ewai kolong ngesi ngirototin yok.

¹⁸Nabo nyejoikinit esi ilemarete ibore ni echamit inyasunio, ani kilemasi, iyaunete ngichan ka nginyas nadakar a Ngisirael.

¹⁹Ibore daang ni esubitae a akwangat, ka egolit ta asuat nanyang kori asuat nakirion, ikitegeliara toliwor ika Ekapolon Akuj. Ikiwaakina ni iwaanakinio ngaropiyae a Ekapolon Akuj.”

²⁰Sodi tokutakis ngimurok ngaburucho. Napei eirareta ngitunga, apot kiremasi noi, sodi toukor awas. Tamataros ngasigerea daang tolomasi lore, sodi tolemasi ere.

²¹ Tolemut ngilengea kech taareta ngitunga daang alore, ngikiliok ka ngaberu, lusorok ka lumojong. Apot nabo taara ngaatuk, ka ngamesekin ta ngisikiria.

²²Tolimok Yochua ngitunga luarei lusek araakasi ngirototin tama, “Kapesi kai a amalaat kipudut ngesi ka ngitunga a awi keng nikalapatan, loger lokolong ichikakineta.”

²³Apot kesi toloto kipudut Raab nikalapatan, erukito ka apakeng ta itiokeng, ka talokaatokeng ta ngitunga a awi keng daang. Torikosi kesi ngiyenet ka ngikedalak daang diyete adakar a Ngisirael toyuunotor.

²⁴Kichunyakis kesi ere a akim tonomia, ka ibore daang ni ayei lore, pearai ngiboro lu esubitae a egolit, ka akwangat, ka asuat nanyang ta asuat nakirion. Ayaarete kesi ngiboro ngulu kiwaakis ni iwaanakinio ngaropiyae a Ekapolon Akuj.

²⁵ Nakaneni kimiek Yochua Raab ka ngitunga a awi a apakeng eyarete kainyo ewai kolong ngesi ngirototin lu amearit Yochua Yeriko. (Eringa ngalesea a Raab eyakasi nakwap a Isirael tani tokona.)

²⁶Sodi kikong Yochua akolongit ngina tama, “Itwaan daang ni etamari adukokini nabo ere a Yeriko, eliwor ni ilamit Ekapolon Akuj. Itwaan cha daang ni edukokini ngateak, etoani lokookeng loapolon. Itwaan cha daang ni edukokini ngidorin, etoani lokookeng loochi.”

²⁷Sodi abu Ekapolon Akuj kiruko ka Yochua, nabo abu ekipur keng tokeikin nakwap daang.