Read turkana Yochua 7 Bible Online

Yochua 7 - turkana bible

Yochua 7

¹Apon nyiiwap ngakiro na adungokini Ekapolon Akuj Ngisirael atamar nyeelemasi alo Yeriko ibore daang ni echamit inyasunio. Abu itwaan ni anyaritae Akani nyiiwap ngakiro na adungunitoe, sodi abu Ekapolon Akuj tongoik Ngisirael lokojokon. (Arai Akani lokookeng a Karimi, tarai etatait a Sabudi alo arai lokookeng a Sera alo erai eka ekitela a Yuda.)

²Tomea Yochua ngitunga ngiche alo Yeriko toloto lore a Ai, arai Ai ere lo ayei kide Besel, diyete Betapen, tolimok kesi atamar toloto torebo akwap ngina. Ani kelot kerumor,

³tobongut tolimokis Yochua tamasi, “Nyejoikinit ngitunga daang eloose akirem Ai. Tomea ngitunga ngabunge ngaarei kori ngauni make. Nyiimea ngasigerea daang inaa alosit ejie, kainyo nyerai ere lotiapolon.”

⁴Sodi apot Ngisirael ngabunge ngauni toremo ere ngolo, nakaneni apot kesi tamataros alotunga a Ai.

⁵Apot ngitunga a Ai kiritasi kesi jik napei alokidor a ere tanang niboket ngamoru naduket, sodi taarae ngasigerea ngatomwon-uni ka ngakan-kapei anakikokoriunet a emoru. Apot Ngisirael toema tamaranikis, toliworos ebulit.

⁶Apot Yochua ka ngikarikok a Ngisirael tochilichilaasi ngiworui kech ialolongete, sodi tadakakinos kesi kwap ilipito alongaren asaduku a Achamunet a Ekapolon Akuj. Topero kesi kaneni tanang ebong, eyei apua nakies kech idodiunit atamar ialolongeta kesi.

⁷Tolim Yochua tama, “Ekoe anukiro nugu Ekapolon lo irai Ekapolon Akuj? Ani nyo kidokunea iyong sua ekwakalo Yorudan? Akipotokin sua Ngiamor a? Isaki iyong amunyar sua? Nyo kolong pekimiekinere sua eboikinos ekwakaye Yorudan?

⁸Nyaanu na alimuni ayong, Ekapolon, na tokona amatarotor Ngisirael alomoe?

⁹Iirarete Ngikanaan ka itwaan daang anakwap ngakiro nugu. Kiriamete kesi sua, sodi kitaar sua daang. Ani anukiro isubakini iyong toliwor kirimae iyong?”

¹⁰Tolimok Ekapolon Akuj Yochua tama, “Tonyou! Nyo iperio iyong analup kona?

¹¹Asecha Ngisirael! Asecha kesi nakolong adungokini ayong kesi atamar kirichakis. Alemasi kesi ngiboro lu achamakinitae inyasunio. Akokoyete kesi ngiboro ngulu, nabo kidaasi sodi kimorikis ka ngiboro kech.

¹²Ngakiro nugu kesi nyeweikineta Ngisirael ngimoe kech kitijwoto. Ematarosi kesi alomoe kech kainyo eraakasi tokona kesi daang ngimunyara! Nyeringa nabo ayong kiruki ka esi mati kinyasut esi ngiboro lukolong kidungokinitae atamar nyiilemasi.

¹³Tonyou! Kitaleu ngitunga kitoseg poneta ngaren kang. Tolimok kesi tosubakinos moi, kainyo ayong Ekapolon Akuj na arai Akuj a Isirael, eyakasi ngakiro na asaki alimun abala, ‘Ngisirael, itingito esi ngiboro ngiche lukolong kadungokini ayong esi atamar kinyasutu! Nyipedorete esi aweikin ngimoe kus mati kichakasi esi ngiboro ngulu!’

¹⁴Tolimok kesi atamar moi nataparach, erikunio kesi ngaren kang a ngapeipei, etupit ekitela apei loche. Ekitela lo epakuni ayong, pot ngimacharin a ngapeipei, etupit emachar loche. Ani emachar lo epakuni ayong, pot ngitunga a ngawiyei a ngapeipei, etupito ngitunga a awi a apei lua nache. Ngitunga a awi ana epakuni ayong, pot a ngapeipei, etupit itwaan ipei niche.

¹⁵Itwaan ni ipakunio toriamunae etingito ngiboro lu echamit inyasunio, inomio ngesi ka ngitunga a awi keng ka ibore keng daang, kainyo ayau ngesi ngileech luapolok nia Ngisirael nabo asech achamunet kang.”

¹⁶Ani iwalari enangi nataparach elilim, abu Yochua toriku Ngisirael ngaren Ekapolon Akuj, a ngapeipei, etupit ekitela epei loche. Apon kipakunae ekitela a Yuda.

¹⁷Toriku ngesi ekitela a Yuda ngaren Ekapolon Akuj, etupit emachar epei loche, sodi apon kipakunae emachar a Sera. Toriku ngesi emachar a Sera ngaren Ekapolon Akuj, etupito ngitunga a awi a apei lua nache. Apon kipakunae ngitunga a awi a Sabudi.

¹⁸Sodi abu ngesi tanyarau ngitunga a awi a Sabudi ngaren Ekapolon Akuj, etupit itwaan ipei niche, sodi apon kipakunae Akani lokookeng a Karimi, tarai atatait a Sabudi.

¹⁹Tolimok Yochua ngesi tama, “Lokookang, tolim ngakiro na iteni ani a Ekapolon Akuj ana erai Akuj a Isirael, sodi tolimo akisech kon. Tolimokinae ayong tokona ngakiro na isubit iyong. Nyikimunon ayong ngakiro nguna.”

²⁰Tatachak Akani tama, “Asechit ayong dir ani a Ekapolon Akuj ana erai Akuj a Isirael. Ngakiro na asubi ayong kesi nugu.

²¹Aloboro alu aremio, abu engolik eworu loajokon kooyen a Babilon, ka ngakiloi ngaarei a akwangat ta engolit anus a akilo. Katominasi ayong ngiboro ngulu lokojokon, atolema. Iriamuni iyong enukakina tooma eam kang toberite akwangat kwap kech.”

²²Abu Yochua tomea ngitunga ngiche, kipiirioto loeam toriamut ngiboro lu achamakinitae inyasunio enukakina dir neni, toyei akwangat kwap.

²³Kipudut kesi ngiboro nikalapatan a eam yaasi nia Yochua ka Ngisirael daang, sodi kinapanapakis daang kwap ngaren Ekapolon Akuj.

²⁴Apot Yochua ka Ngisirael daang kirumut Akani, tolemut akwangat dang, ka eworu, ta egolit kimoriut aapei ka talokookeng, ka tanakookeng, ka ngaatuk keng, ka ngisikiria, ka ngamesekin ta eam keng ta ibore keng daang. Sodi yaarae kesi nadipo a Ngichan.

²⁵Tolim Yochua tama, “Nyo kiinunea iyong sua ngichan lugu? Kiinuni tokona Ekapolon Akuj iyong ngichan akolongit naga!” Kimasa ngitunga daang Akani a ngamoru totoan, kimasa tani ngitunga a awi keng a ngamoru ani erumor kinoma ka ngiboro keng daang aapei.

²⁶Tosenokis kesi ngamoru nakaalak kidiama keng, eringa ngamoru nguna eyakasi neni tani tokona. Ngesi enyaritere neni adipo a Ngichan. Abu Ekapolon Akuj tojongo angoit.