Read turkana Yochua 8 Bible Online

Yochua 8 - turkana bible

Yochua 8

¹Tolimok Ekapolon Akuj Yochua tama, “Kirukosi ka ngasigerea daang toloto lore a Ai. Wara nyiiem kori nyiimaranik. Kotere ayong, idwangi iyong ekapolon a Ai, ka ngitunga keng, ka ere, nakaneni eliwor akwap keng akus.

²Echamit esi isubeta Ai ka ekapolon keng ngakiro nakolong isubeta Yeriko ka ekapolon keng, nakaneni ipedorete esi alemar ngiboro ka ngaatuk kech toliworos ngakus. Kituumwokisi toremo ere alowae alo too.”

³Sodi tonyout Yochua ka ngasigerea keng daang toloto Ai. Toseu ngesi ngitunga ngabunge ngauni lukajwok, tomea kesi nakwaare

⁴todungok tama, “Toduka alowae aloche a ere, meere robo nikalonan noi, tasada isakete akirem.

⁵Kiponi ayong ka ngitunga kang lore. Ani epote ngitunga a Ai akitijwore sua, kibongi sua atamataros loger lokolong a ekingaren.

⁶Kiritarete kesi sua tanang ni kiteyakarea kesi alore. Etamarete kori kiem sua kesi kimatar loger lokolong a ekingaren.

⁷Sodi topudut esi ani idukitotor toremo ere. Kiinakini esi Ekapolon Akuj kus ere.

⁸Ani ilemarete ere, kichunyakisi akim, loger lo adungunio Ekapolon Akuj. Ngakiro kidungokinitae esi nguna.”

⁹Tomea Yochua kesi, sodi toloto kesi ni aduketa, too ere a Ai, kidara kaina. Ayei neni nakidingos a Ai ka Besel. Toper Yochua nadakar.

¹⁰Ani iwalari, tonyou Yochua nataparach elilim tanyara ngasigerea tochunak wapei. Apot ngesi ka ngikarikok a ngasigerea torikosi ngitunga toloto lore a Ai.

¹¹Apot ngasigerea na arukito ka ngesi toloto lokidor loa lokinga a ere topero lowae loa lokwap, eyei adipo kiding kech ka ere a Ai.

¹²Toriko ngesi ngitunga ngabunge ngakan sodi toduka alo too ere, nakidingos a Ai ka Besel.

¹³Torekis kesi ngasigerea a ejie, ayei adakar naapolon kuju ere, toyakas ngitunga luche too ere. Toper Yochua nakwaare nadipo.

¹⁴Ani ingolikini ekapolon a Ai ngitunga a Yochua, abu ngesi tonyou atipei. Apot ngesi ka ngitunga keng toloto nadipo a Yorudan akitijwore Ngisirael ani kolong ajiere ekingaren, peayeni ngesi atamar edikino kitijikinio alo too.

¹⁵Apot Yochua ka ngitunga keng kiyechakis atamar kimatara, sodi tamataros nariet.

¹⁶Anyaraunitae sek ngitunga daang a ere atamar kiwapakis kesi, ani na erisitotor kesi Yochua, apot toekasi alore.

¹⁷Abu itwaan daang alo Ai[3] kirita Ngisirael, toisikinae ere engaara, emam itwaan idongit itee.

¹⁸Sodi tolimok Ekapolon Akuj Yochua tama, “Kidodia akwara lowae a Ai, kainak ayong iyong ere a Ai.” Tosub Yochua loger lo alimokinitae,

¹⁹napei ekearea ngesi akan keng, tonyout ngitunga lusek adukito atipei, tamataros lore toremo. Kichunyakis kesi akim lore atipei.

²⁰Ani ingoliarete ngitunga a Ai naabor, apot kingolikis apuru kenang kidiama. Tongopik kesi erot lo epuunotor, kainyo apot Ngisirael lusek amatara nariet toreeunos kitijwoto kesi.

²¹Ani ingolikinete Yochua ka ngitunga keng atamar aremo luche ere, nabo kichunyakin ere akim, apot toreeunos jik kisiakis akiar ngitunga a Ai.

²²Pot Ngisirael lu ayakasi lore kimorikinos ka luche alojie. Sodi kiriama Ngisirael ngitunga a Ai alowaitin kadaang, taara daang. Emam itwaan abu tobuchar kori kidong eyari

²³mati ekapolon a Ai bon. Apon kirumunae ngesi torikoroe nia Yochua.

²⁴Taarakis Ngisirael ngitunga daang nariet nisek erisitere kesi. Ani erumor tobongosi Ai sodi taara itwaan daang kaina.

²⁵Ngitunga lu atoakete akolongit ngina, ngikiliok ka ngaberu, araakasi ngabunge ngatomon ka ngaarei, araakasi daang ngitunga a Ai.

²⁶Abu Yochua nyeekudok akan keng nasek ekearitor akwara, tanang ni aarere ngitunga a Ai daang.

²⁷Apot Ngisirael tolemasi ngaatuk ka ngiboro daang lu aremio alore, loger lo alimokinitor Ekapolon Akuj Yochua.

²⁸Kichunyak Yochua Ai kimiek erai ekuron. Eringa tani tokona ikoni neni.

²⁹Kinenek Yochua ekapolon a Ai lokitoe a auno tomied, sodi kimiek akwaan ineno kaneni tanang ebong. Ani edooyori akolong todungok Yochua ngitunga atamar tolemasi akwaan ngina. Apon tachakakinae akwaan keng diyete ekidor a ere. Tosenokinos ngamoru nakaalak kidiama akwaan ngina. Eringa ngamoru nguna eyakasi neni tani tokona.

³⁰Abu Yochua todukok ekeno a ngakipeyos a Ekapolon Akuj na erai Akuj a Isirael moru a Ebal.

³¹Asubakini ngesi itemem ka ngakiro nakolong alimokini Musa, ekasuban etich a Ekapolon Akuj ana erai Akuj a Ngisirael, loger lo igiritere lotal a Musa kona, “Ekeno a ngakipeyos, lo edukitoe a ngamoru ana nyibetunitae a ngiboro alusua.” Kipeyonokinoe Ekapolon Akuj alokidiama ekeno ngolo, apot nabo dang tolemut ngakipeyos a ekisil.

³²Ani eyakasi neni, abu Yochua kigirak etal lokolong egiri Musa namoru iteete Ngisirael.

³³Apot Ngisirael ka ngikarikok kech, ka ngikapolok kech, ka ngikatubok ngakiro ta ngipeyok daang lu ayakasi neni, towaa alowaitin aluarei a asaduku a Achamunet a Ekapolon Akuj, ingoliarito lowae lo ayakasi ngimurok a ekitela a Lawi lu adakito asaduku a Achamunet. Towaa ngitunga epewae ibongokinito emoru a Gerisim akau, nabo towaa epewae ibongokinito emoru a Ebal akau. Alimokinit kolong Musa ekasuban etich a Ekapolon Akuj kesi atamar tosuba kongina enangi akolongit na epiarere kesi.

³⁴Kisomak Yochua etal daang irema, kisomak tani apiaro ka ngilam, loger lo egiritere nakitab a etal.

³⁵ Kisomak Yochua ngitalio a Musa daang kiirasi ngitunga, kiirasi tani ngaberu ka ngide ta ngitunga a ngakwapea anache lu ayakasi neni.