Read turkana Yochua 9 Bible Online

Yochua 9 - turkana bible

Yochua 9

¹Toyena ngikapolok daang lu ayakasi too Yorudan ajwonu a Ngisirael. Ngikapolok ngulu kesi lu alomito lomukur ka naukon ta lokwaas a anam a Mediterenian tanang Lebanon alokuju. Araakasi kesi ngikapolok a Ngiiti, ka Ngiamor, ka Ngikanaan, ka Ngiperes, ka Ngiipi ta Ngiebus.

²Kiriamariama kesi kimorikinos ngasigerea kech sodi kitijwoto Yochua ka Ngisirael.

³Nakaneni Ngigibeon lu araakasi Ngiipi, kiirasi ngakiro na asubea Yochua Yeriko ka Ai,

⁴sodi tasaka kesi akingalare ngesi. Tolemut kesi akimuj, sodi kisiwoko ngisikiria ngichuei luchilichila, ka ngituol a emuna lu edapitae.

⁵Tanapa kesi ngakorisae a ngiworui ta ngamuk nadaidauna na kedonyonokinio. Aokito ngamugati na atingito kesi nabo ayei erukopus.

⁶Toloto kesi nadakar a Giligal tolimokis Yochua ka Ngisirael tamasi, “Kiponit sua anakwap anakalonan. Kisaki sua atachamakin ka esi.”

⁷ Nakaneni tolimut Ngisirael tamasi, “Kotere nyo kichamakinor ngoni? Tokona ngon ibooyete esi alo diyete kane.”

⁸Tolimokis kesi Yochua tamasi, “Kirai sua ngikasubak etich kon.” Kingit Yochua kesi tama, “Tangae esi, aliwae iponitotor esi?”

⁹Sodi tolimokis kesi ngesi akiroit naga, “Kiponit sua anakwap anakalonon noi ekapolon, kainyo kiira ngakiro a Ekapolon Akuj ana erai Akuj kus. Kiira ngakiro na asubi ngesi alo Misiri daang

¹⁰ka na asubea ngikapolok luarei a Ngiamor alo kide Yorudan, kesi Sion ekapolon a Echibon, ka Ogu ekapolon a Bachan lu alomito Achitaros.

¹¹Ngikarikok kosi ka ngitunga daang lu elomito nakwap kosi kesi kilimokinete sua atamar atolemutu akimuj atonyoutu alosit akisiriam esi. Kitolimokis atamar atoliworos ngikasubak etich kus sodi atachamakinos ka esi.

¹²Kingolik mono cha iyong ngamugati, nakolong kirotokinio sua kiponit akisiriam esi, aringa ngamugati ibus. Nakaneni kingolik a! Aoko tokona amin erukopus.

¹³Nakolong kilelebea sua ngituol lugu, aringa ekiteteka, nakaneni kingolik a, adaidaunosi! Adaidaun ngiworui kosi ka ngamuk kotere alosit nakooyen.”

¹⁴Tachamut Ngisirael akidiaun akimuj ngina epewae nakaneni nyitaanyuna kesi Ekapolon Akuj ngakiro a akimuj kangina.

¹⁵Abu Yochua toelokin ka kesi tachamakin, sodi kimiek kesi eyarete. Apot ngikarikok a Ngisirael kichikakis atamar kirichuni achamunet ngina.

¹⁶Adaunet a ngirwa a nguuni ekisidi a achamakin, apot Ngisirael taanyut atamar elomito ngitunga ngulu diyete neni.

¹⁷Sodi tonyout Ngisirael toloto, ani adaunet a ngirwa a nguuni, tananga lorerea lu alomito ngitunga lu enyaritae Ngigibeon, ka Ngikepira, ka Ngibeeros ta Ngikirias Yearim.

¹⁸Nakaneni nyeara Ngisirael kesi kainyo ekongito ngikarikok kech alokiro a Ekapolon Akuj ana erai Akuj a Ngisirael. Apot ngitunga daang kisuburata ngikarikok kotere ngakiro nguna,

¹⁹nakaneni tatachut kesi tamasi, “Kisikong kolong kesi sua a ekiro a Ekapolon Akuj ana erai Akuj a Isirael. Nyikiwani tokona ngoni kesi.

²⁰Echamit ngoni kimiekini kesi toyara kotere akikong na kikongi ngoni, ani pekisub ngoni kongina, kirirae Akuj ngoni.

²¹Kimiekisi kesi toyara, nakaneni eliworosi kesi kiyapanakinete ngoni ngakito ka aokonokin ngakipi.” Ngakiro na alimunete ngikarikok nguna.

²²Todung Yochua atamar torikunoe Ngigibeon ni ayei ngesi, sodi kingit kesi tama, “Nyo kingalaata esi sua ibalatar iponito anikalonan, tarai ilomito esi nipei nege?

²³Ani kona isubeta esi kongina, kilam esi Akuj. Eliworosi ngitunga kus ngikedalak jik, eyepete ngakito ka akuok ngakipi a akai a Akuj kang.”

²⁴Tatachakis tamasi, “Kisubi sua kongina ekapolon, kainyo kipot atoyena dir atamar adungokini kolong Ekapolon Akuj na erai Akuj kus Musa ekasuban etich keng ebala, kiinakini esi akwap daang sodi taara ngitunga lu elomito neni daang, iloose ngaren. Kisubi sua kongina ani kiemitor sua esi, kipot sua kitobul.

²⁵Eraakasi tokona ngakiro kosi ngaka akiding kus, tosubere sua ngakiro nakijoikinito esi.”

²⁶Abu Yochua toik kesi kiratak Ngisirael nyear kesi.

²⁷Ani kikok neni, kitiliwo kesi ngikedalak, toliworos eyapanakinete Ngisirael ngakito tookonokinete ngakipi. Ayepeenete tani ngakito ka akiok ngakipi a ekeno a ngakipeyos. Arubakis kesi esubete etich logo ani kolong aseuni Ekapolon Akuj atamar kelipere ngesi, tanang akolongit napei tokona naga.