Read turkana Ngitesalonike 2 Bible Online

Ngitesalonike 2 - turkana bible

Ngitesalonike 2

¹Ani anakiro ana a abunere a Yesu Kiristo ka achunakin nakiriamiriamea ngoni ka ngesi aapei. Kemaimai ayong esi ngikaitotoi kang,

²atamar warasi nyiibatar ngitamen kus atipei kori nyiialolong na iirareta elimunio atamar anang Akolongit a Ekapolon Yesu. Erai ketamar kori kilimuni sua nguna nakidwarea kori nakitatamea kori atamar kigirit sua nabarua.

³Warasi itwaan idio nyikingal esi a eger a edio. Kainyo nyenangi Akolongit ngina mati mono kenang esal lo engerioto ngitunga Akuj sodi tatakanu Loaronon noi lo erai echakakina nakim nanyedunge.

⁴ Itopegi ngesi ibore daang ni enyarito ngitunga akuj ka ibore daang ni ilipito ngitunga. Etamari ngesi apolot edwangit ngulu daang. Elomari tani kai a Akuj kiboikin sodi atamar arai ngesi Akuj.

⁵Ikwa nyitamunito esi a? Kalimokini kolong ayong esi nugu daang eringa kirukit.

⁶Nakaneni eyei ibore ni itangasi nugu asubakin tokona, iyenete tani esi ibore ngini. Ani robo enangi esaa lo itemokino, etakanuni Loaronon ngolo.

⁷Tani kikoni neni, loaronon lokolong adukit ngolo, esiak tokona akisub etich, nakaneni nyesubakinio na edikino esubakinio eringa lo itangasit asubakin nyikotara.

⁸Sodi tatakanu Loaronon ngolo, nakaneni na ebunio Ekapolon Yesu, eari ngesi a akienget ana itoruni nakituk keng sodi kinyasu ngesi a akwangis ana ebunio ngesi.

⁹Ebuni Loaronon Ngolo a apolou a Esiitan sodi tosub ngakitoodikinet nakailiilok ka nakatalarak na eraakasi ngaka alioko daang,

¹⁰ebuni ngesi kingala lu ebukoro a eger kadaang alo aronon. Ebukorosi kesi kainyo peachamunito kesi ngakiro na iteni tominakis sodi toyuunere.

¹¹Kotere nguna, ereikini Akuj kesi ngakiro na ichwangakina sodi tonupeta kesi na eraakasi alioko.

¹² Ngakiro na esubakinosi kesi nugu, daang lu kolong aminakinete akisech towout akinup na iteni, irirao.

¹³Ngikaitotoi kang, kibuakinit sua Akuj alakara jiik kotere esi lu iminasi Ekapolon Yesu. Kainyo kiseuni esi Akuj napei anakisiakinet toyuunos a agogongu a Etau a Akuj. Kitiliwo Etau ngolo esi ngitunga keng lubekon kotere ni inupitotor esi ngakiro na iteni.

¹⁴Ngakiro nguna ngesi kinyaraa Akuj esi a Ngakiro a Naajokak ana kitatami sua esi. Kinyarae ngesi esi sodi toriamuneta esi dang apolou a Ekapolon yok Yesu Kiristo.

¹⁵Tokona bocha ngikaitotoi kosi, torubakisi itionikinito ka aneikina ngakiro na iteni na kolong kitatami sua esi, nguna kitatami ka nakigiri nabaruae dang.

¹⁶Kigasi tokona atamar Ekapolon yok Yesu Kiristo elope ka Akuj Apayok na kimina ngoni, sodi kitaanyu atitinyu nanyedaun ka akigieno nakationon anajokis keng,

¹⁷toliwor ngesi ilakarotor esi nabo kingarak esi topedoreta jiik akisub ka akiruor na ejokak.