Read turkana Ngitesalonike 3 Bible Online

Ngitesalonike 3 - turkana bible

Ngitesalonike 3

¹Eya daang ngikaitotoi kang, kilipakinae sua sodi torubakineta ngakiro a Akuj ekeanakin wadaang atipei nabo tachamuneta ngitunga erimasi loger lo kolong ekoneta neni anikus.

²Kilipa tani sodi kitoyuunea sua Akuj alotunga aluasechak luaronok, kainyo meere itwaan daang enupi ngakiro a Akuj.

³Nakaneni erai Ekapolon Yesu lo emunoi. Kingarakini ngesi esi kitoyuu Alokipe.

⁴Ani a Ekapolon Yesu, kigieno sua esi, nakaneni kiyeni atamar isubete esi nabo irubakinete isubete nakilimokini sua esi.

⁵Agasi atamar kitorik Ekapolon Yesu esi toyena lokojokon amina a Akuj ka anaikinit nakitaanyuni Kiristo.

⁶Ngikaitotoi kosi, kidungokinit esi a ekiro a Ekapolon yok Yesu Kiristo atamar totiakaros alokaitotoi kadaang alukalany alu nyiwapito ngakiro na kolong kichikakini sua kesi.

⁷Iyenete esi ngikulepek atamar ejoikinit esi iwapete ekitetemes kosi. Nakolong kirukitor sua ka esi, pekikalanyaka sua.

⁸Emam akimuj a itwaan kimuj sua nyetacha, pearai kipot atosuba etich kituburuna akwaar ka apaaran pekisaki tani ipei kus kichanakin kotere akingarakin sua.

⁹Pekisubi sua kongina ani kingolikinitor atamar nyitemokino kilimokini esi atamar kingarakis. Arai kikoni neni ani kisakea esi kiwapa ekitetemes kosi.

¹⁰Nakolong kirukitor sua ka esi, kilimonokini sua esi kona, “Itwaan cha daang ni ewouni akisub etich nyechamit imuji.”

¹¹Kilimunit sua nguna kainyo kiira atamar eya ngitunga ngiche anikus lu ekalanyaka, emam ibore iche esubete kesi mati alomanakin ngakiro a ngitunga aluche.

¹²Alokiro a Ekapolon Yesu Kiristo, kidungokinit sua ngitunga ngulu nabo kichikichiki kibala kiberaketa nabo tosuba etich taanyuneta ibore ni eyareta.

¹³Nakaneni ani esi ngikaitotoi, warasi nyikibur akisub naajokak.

¹⁴Kori robo eyei itwaan ni nyiwapi ngakiro nakigirakinit sua esi anabarua kana? Ani kikoni neni, toyena ngesi sodi nyiiruko esi ka ngesi kirumeta ngesi ngileech.

¹⁵Nakaneni nyiitusubut ngesi emoit kus, ejoikinit ichikichikete loger alokaatokus.

¹⁶Agasi tokona atamar Ekapolon Yesu elope lo erai nikeng itorunit ekisil, kitaanyu esi ekisil jiik a erot kadaang, kiruko esi daang ka Ekapolon Yesu.

¹⁷Ayong Paulo egirak nugu a akan kang a ilope. Kemalae ayong esi. Egiranakini ayong ekiro kang losal a ngabaruae kang daang kona, ekigire kang logo.

¹⁸Kagatakinit esi daang ajokis a Ekapolon Yesu Kiristo.