Read turkana 1 Timoteo 2 Bible Online

1 Timoteo 2 - turkana bible

1 Timoteo 2

¹Mono ekingaren, echikichika atamar tolimut ngichan, ka agata, ka akilip ka abuakinit Akuj alakara kotere ngitunga daang,

²ka ngikapolok ta daang lu eya napolosio, sodi eboyoto ngoni nikaalimon ka ekisil erai kikerit daang Akuj nabo ebooyete eboyor loajokon.

³Ejok ngakiro na ikote neni nabo italakarete Akuj Akayuunan yok,

⁴na esaki itwaan daang toyuunae sodi toyenunea ngakiro na iteni.

⁵Kainyo eyei Akuj apei, nabo eyei epei lo imorikinit Akuj ka ngitunga wapei, itwaan ngini ngesi Yesu Kiristo,

⁶ngesi ngolo alemun toliwor ekalachunan a ngitunga kadaang. Ngakiro nguna kesi edodiunete na etemokinor esaa atamar, asaki kolong Akuj ngitunga daang toyuunos.

⁷ Ngesi kameunere ayong atoliwor emeanara ka eketataman a ngibukui alu nyerai Ngiyaudi, atamar atolimo ngakiro na anupit ka na iteni. Nyesudi ayong, eruoro ngakiro na iteni!

⁸Awadaang ani ilipitere, asaki ayong ngikiliok lu elemuna ani a Akuj kilipa ikearito ngakan kech, nyeengoa kori nyiiburata.

⁹Asaki ayong tani ngaberu toosokis enape ngiboro kech niajokon. Meere akitok ngitim kori akinap ngiriko a egolit kori a ngalului kori ngiworui lukaanikak lukaalak a ngaropiyae.

¹⁰Nakaneni ejoikinit esubete ngakiro naajokak loger a ngaberu ana enupito ngakiro a Akuj.

¹¹Echamit ngaberu ililingete chek nabo kitiditeunos esaa lo itatamere.

¹²Nyachamakinit ayong aberu itatami kori epolokini ekile, echamit ngesi ililingi chek.

¹³Kainyo asubunio kolong Adam ekingaren ani ekisidi tosubunae Awa.

¹⁴Nakaneni meere kolong Adam engalao, erai aberu engalao sodi tosech etal a Akuj.

¹⁵ Nakaneni eyuun aberu kotere ni idoununio ngide, erai kenaiki ngesi anupit ngakiro a Akuj ka amina ka abekoonut ta ateneanut.