Read turkana 1 Timoteo 3 Bible Online

1 Timoteo 3 - turkana bible

1 Timoteo 3

¹Iteni dir ngakiro nugu. Itwaan ni esaki araun ekarikon a ekanisa, iitanit etich loajokon noi.

²Ejoikinit ekarikon a ekanisa erai itwaan ni emam akisech, ejoikinit erikit aberu apei bon, lo itemit ngakiro, lo iapunit ngakiro nabo kitiriyanite na esubi. Ejoikinit ipeyeununi ngipeyok nawi keng, ejoikinit eyeni akitatam,

³nyeeliwor itwaan ni emina elewas kori ni ededeng, nakaneni toliwor itwaan nikaalimon nabo ni isilit, nyejoikinit eminakini ngaropiyae.

⁴Ejoikinit erai itwaan ni eyeni achoikin ngitunga a awi keng niajokon nabo kitatam ngide keng akiwap ngakiro keng a arimatoi kadaang.

⁵Kainyo ani pekeyeni itwaan achoikin ngitunga a awi keng, ikokini ngesi echoikini ngitunga a ekanisa a Akuj ai?

⁶Ejoikinit pearai itwaan ni been aringa enupi ngakiro a Akuj, sodi nyedakakin ekinis kirirae loger lo erirare Ekipe.

⁷ Ejoikinit ngesi erai itwaan ni itojokito ngitunga lu nyenupito ngakiro a Akuj, sodi nyiitoron tolomakinea ngakiro naaronok elokitor ngesi Ekipe.

⁸Ejoikinit lu ingarakinito etich alokanisa dang eraakasi luajokak lu eteniyete, nyejoikinit emaase emuna lo epuritoe lokaalan kori iterekuyarito ngaropiyae.

⁹Echamit kesi iwapete ngakiro na iteni idodiunitae itojokito ngitai.

¹⁰Echamit kesi eroyo mono, sodi ani kesuba naajokak, kimiekinae tosuba etich.

¹¹Ejoikinit ngaberu kech dang eraakasi na ejok eboyor nabo nyeliworosi ngakaswamak, ejoikinit eliworosi na itemito ngakiro nabo na emunoi anakiro kadaang.

¹²Ejoikinit lo ingarakinit etich alokanisa erikit aberu apei, nabo tochoik ngide keng ka ngitunga a awi keng niajokon.

¹³Ngikengarakinak etich a ekanisa lu esubete etich kech niajokon, eyenikinio, nabo dang, epedorete ekiruor eger lo enupitotor kesi ngakiro a Yesu Kiristo a atitinyu.

¹⁴Tani tokona kegirakinit ayong iyong abarua naga, keburakinit abunere ataanyun ka iyong atipei.

¹⁵Nakaneni ani katinenik ayong, ianyuni iyong anabarua kana eger lo echamit ngoni kibooyo alokai a Akuj, na erai ekanisa a Akuj ana eyari. Ikoni akai ngina apir ka ngateak na itoweito ngakiro na iteni.

¹⁶Emam itwaan epega atamar epolok noi ngakiro namunonoe a edin yok. Atakanuni erai itwaan, kidodiu Etau a Akuj atamar erai lo etenoono, sodi taanyungasi ngimalaikae. Kitatamae ngibukui ngakiro keng, tonupa ngitunga ngakiro keng anakwapin kadaang, ani erumor yaarae nadis.