Read turkana 1 Timoteo 4 Bible Online

1 Timoteo 4 - turkana bible

1 Timoteo 4

¹Elimunit Etau a Akuj ngakiro na ileerete atamar epalikinete ngitunga ngiche anupit ngakiro a Akuj ngirwa lu esal. Enupete ngakiro a alioko nabo kiwapa ngakitatamet a ngipean.

²Ngikaliokok lukengalak kesi epetarito ngakitatamet nguna, ikote kesi lu etoakito ngitai, esibit imaditae a asuat anakariran.

³Itatamete ngitunga lu ikote ngulu atamar erono akuutar, ka akinyam ngamuja ngache. Nakaneni asubi kolong Akuj ngamuja nguna esaki tanyamae, arumoret a akilip ebuakinitae Akuj alakara. Lu ikwaanakinete neni kesi ngikanupak lu ayan ngakiro na iteni.

⁴Ejok ibore daang ni asub Akuj, emam ibore ni erai ingerot, nakaneni ejoikinit ibore daang idiaunio ilipitae ka abuakinit Akuj alakara,

⁵kainyo Akiroit a Akuj ka akilip itojoki ibore ngini ani a Akuj.

⁶Ani kilimok iyong ngikaitotoi ngakiro nugu, iliwor iyong ekasuban etich a Yesu Kiristo loajokon, erai irubakinit iyong akitatam ngakiro a Akuj na iteni na iwapit iyong.

⁷Nakaneni tonger ngakiro napasiek na nyerai ngaka edin, na nyejoikinit isisao. Tanaik akiboi eboyor lo iminar Akuj.

⁸Ejok noi akitorwaanar akwaan, nakaneni arubakin itatama ngakiro a Akuj, ejok noi a eger kadaang, kainyo kitaanyuni akiyar ngirwa lu tokona lu ka lumonan.

⁹Eraakasi ngakiro nugu na iteni dir na echamit echamunio noi tonupae.

¹⁰Kiricha ngoni kisubi etich lokojokon kainyo kigienokino ngoni Akuj na eyari, na erai Akayuunan kadaang, tarai noi lu enupito ngakiro a Akuj.

¹¹Todungok kesi ngakiro nugu kitatam.

¹²Wara itwaan nyikimenya iyong ani iditia, nakaneni toliwor ekitetemes alokanupak kotere ekiruor kon, ka elote, ka amina, ka anupit ta akikiuna.

¹³Totionik akisomanakin ngitunga ngakiro a Akuj ka akisuruor ta akitatam, tanang na abunio ayong.

¹⁴Wara nyiipasak ainakinet a Etau a Akuj na eyei nikon, nakolong kitaanyunio iyong na eruorotor ngikadwarak a Akuj sodi kidokokis ngikasukou a ekanisa ngakan kech nakou kon.

¹⁵Tosubeene ngitichisio lugu sodi totionik iyong kesi, sodi kingolikineta daang eger lo isubeta esi etich.

¹⁶Tochoikin iyong ilope, tochoik tani ngakitatamet kon. Torubak jiik isubi ngakiro nugu kainyo kikok iyong neni, iyuun iyong elope nabo toyuu tani lu epupete ngakiro kon.