Read turkana 1 Timoteo 5 Bible Online

1 Timoteo 5 - turkana bible

1 Timoteo 5

¹Wara nyiikilak ekasukout, nakaneni kimaima ngesi loger ka apakon. Kisuruor lusorok loger a ngikaitotoi kon,

²kisuruor ngakimak loger kata itio, ani ngapesur loger a ngakaitotoi kon, erai ikiuna anakiro kadaang.

³Kidodiu arimatoi anapuseru ana ekokianito.

⁴Nakaneni ani keyei apuserut ngide kori ngide a ngide keng, ejoikinit kesi mono itatamasi achoikin ngitunga a awi kech sodi kotere erot ngolo, tatachakis na kolong asubeta kesi ngikauriak kech kata apaakech kata ataa kech, kainyo nguna kesi italakarete Akuj.

⁵Nakaneni apuserut na ekokianit na emam itwaan echoikinit, egienokin Akuj nakaneni erubakinit ilipit nabo elimokinit Akuj atamar kengarak ngesi akwaar ka apaaran.

⁶Nakaneni apuserut na emerakin, ekok ngesi nakatoan, tani keringa eyari.

⁷Kidesik kesi ngakiro nugu sodi tongopea tani itwaan ipei ni itoroni kesi.

⁸Nakaneni ani pekechoiki itwaan ngiyenet keng, tarai cha noi ngitunga lua awi keng, anger ngesi anupit ngakiro a Akuj nakaneni erono noi idwangit tani itwaan ni nyerai ekanupan.

⁹Wara apuserut na eringa ngikaru keng nyipororo ngitomwon-kapei igirakini ekiro keng lorora a ngapuseru. Nabo dang, toliwor na kolong eusitae akuuset apei.

¹⁰Nabo tarai na ipuroi atamar esubi naajokak, na kolong etanuni ngide keng niajokon, na epeyeununi ngipeyok nawi keng, na asubanakinea ngikiristoi luche ngitichisio lua akitiditeuna, na engaranakini ngitunga lu echanasi nabo amina akisub naajokak.

¹¹Nakaneni wara nyiigirak ngirora a ngapuseru anasorok, kainyo na ekulaunea etereku a ngawat kech kiburak kesi akiuto nabo, engerete akiwap Kiristo,

¹²nakaneni eliworosi ngakasechak ani ichwangakineta akichikakinet na kolong sek echikakinete kesi ngesi ekingaren.

¹³Eliworosi kesi tani nakalany na irimito ngawiyei a ngitunga, meere kongina bon, eliworosi ngakaswamak na elomanakinete ngakiro a ngitunga aluche, kiruoro nanyejoikinit kesi iruorosi.

¹⁴Nakaneni kajoikinit ayong iusio ngapuseru nasorok toureta ngide ka achoikin ngiwiyei kech, tongopikinea ngimoe yok naaronok kiruorotor ngoni.

¹⁵Kainyo abongosi ngapuseru ngache akiwapit ngakiro a Esiitan.

¹⁶Ani keyei akiristoit ngayenet na eraakasi ngapuseru, ejoikinit ngesi echoikini kesi nyeliworotor ngichan ngulu ngika ekanisa, sodi tochoikineta ngitunga a ekanisa ngapuseru na ekokianito.

¹⁷Ngikasukou a ekanisa lu esubete etich loajokon noi, ejoikinit etachio ngaropiyae nakaalak na idwangito na aluche, tarai noi lu esubete etich loationon analimonor akiroit ka akitatam.

¹⁸Kainyo igiritae nagiran kona, “Wara nyiitenger emong lo ichiakachiakae ngimomwa adak”, nabo “Ejoikinit ekasuban etich etachio kotere etich keng.”

¹⁹Wara nyiinup ngakiro na ititaare ekasukout mati keya ngikaanyunak ngiarei kori ngikaalak.

²⁰ Kikilak lu esecheenete alongaren ngitunga daang sodi toemeta luche.

²¹Kadungokinit ayong iyong ngakiro nugu kechikichiki alongaren Akuj ka Yesu Kiristo ta ngimalaikae lu italeuno atamar kiwap ngakiro nugu wara nyiipasak tani apei kori tominak itwaan iche anibore kadaang ani isubi.

²²Nyiimatakin akidokokin ngakan nakou a itwaan atipei erai isaki tosub etich a Ekapolon Yesu. Wara nyiiloma nasechesea a ngitunga aluche, kiboikin irai itwaan ni ikiuna.

²³Wara nyiimat ngakipi make, nakaneni tamaseene emuna lodiochichi kotere akook kon ka ni idekanakinor iyong jiik.

²⁴Ileerete ngasechesea a ngitunga a ngiche, erikito kesi loriras, nakaneni etakanunete ngasechesea a ngiche ekisidi.

²⁵Loger lopei ngolo ileerete ngakiro naajokak, tani nanyileerete, emam kona idayo.