Read turkana 1 Timoteo 6 Bible Online

1 Timoteo 6 - turkana bible

1 Timoteo 6

¹Ejoikinit ngikedalak daang ekerete ngikapolok kech sodi tongop ibore ni imenyeta ngitunga Akuj ka ngakitatamet yok.

²Nyejoikinit ngikedalak lu eraakasi ngikapolok kech ngikiristoi imenyarete kesi ani eraakatar ngikapolok kech ngikaitotoi kech. Erai ejoikinit kesi esubete etich kech lokojokon noi kainyo eraakasi lu ingarakinit etich ngolo ngikanupak lu eminasi kesi. Ejoikinit esi ilimorete nabo kitatama ngakiro nugu.

³Itwaan cha daang ni itatami ngakiro ngache ngagelayek nabo tongerite ngakiro na iteni a Ekapolon Yesu Kiristo ka ngakitatamet a edin yok,

⁴adakakin ekinis nakaneni emam ibore eyeni. Aliwor ngesi itwaan ni emina apega ka eburas a ngakiro anapasiek, nakaneni irokunete nguna etereku, angolopa, ekiyeny ta ngitamen lu etongunere ngakiro naaronok,

⁵ka eburas lo nyesaluni lo itorunit lotunga lu agealaketa ngitamen nabo nyeringa enupito ngakiro na iteni. Ebalasi kesi kori eraakasi ngakiro a Akuj nabaret.

⁶Iteni, itiliwori edin itwaan ekabaran erai kechamu ngesi atamar ketemokino ibore ni atingit.

⁷Kainyo emam kolong ibore kiyauni ngoni nakwapin nugu, nabo emam ibore kilemari anakwapin kanu.

⁸Tokona bocha, ani keyei ngoni akimuj ka ngiworui, ejoikinit ngulu kitemokinosi.

⁹Nakaneni ngulu esakete toliworos ngikabarak, elomakinete nakiningioto ka etereku loaronon lokaalan lo elokitor kesi Ekipe. Etikiyorete kesi ngakiro nguna kinyasut.

¹⁰Kainyo amina ngaropiyae noi ngesi irokunit ngakiro naaronok daang. Kona eburakinitor ngiche lokojokon aanyun ngaropiyae, kibataros kesi ananupit ngakiro a Akuj sodi kituupa ngitai kech ngichan lukaalak isialolongete kesi.

¹¹Nakaneni ani iyong lo irai itwaan a Akuj, tochoite ilomari nakiro nguna. Kirichak aliwor lo itenoono, lo imina Akuj, lo inupit ngakiro a Akuj, lo irichit amina, anaikinit ta apatanu.

¹²Kirichakin lokojokon anakerit ana enupitere ngakiro a Akuj sodi taanyunea akiyar nanyedaun. Kainyo arai kolong akiyar ngina ngesi kinyarakinit iyong Akuj na kolong ilimunio iyong atamar inup Akuj dir alongaren ngikaanyunak ngikaalak.

¹³Alongaren Akuj na itaanyuni ibore daang akiyar ka ngaren Yesu Kiristo lo kolong alimuni ngakiro na iteni alongaren Pontio Pilato, kadungokinit ayong iyong atamar

¹⁴kiwap ngakiro nakilimokinitae nyiitoron tanang Akolongit na etakanunea Ekapolon yok Yesu Kiristo.

¹⁵Itatakanuuni Akuj ngesi esaa lo itemokino, ngesi lo erai bon Ekaweikinan lo epiaritae, Ekarikon lo epolot noi idwangit daang ta Ekapolon lo epolot noi idwangit daang.

¹⁶ Ngesi bon nyetoanene, ibooyi anakicha ana emam itwaan eapiyari. Emam itwaan engolik ngesi, emam itwaan ingolikini ngesi jik. Emini nikeng arimatoi ka apolou nakajik! Aamen.

¹⁷Todungok ngitunga lu ebarito anakwap atamar nyiinisakinos, nyiigienokinos ibore ninyerubi ikoni ebari, nakaneni kigienokinos Akuj nakiinakini ngoni ibore daang a alalau atalakarotor ngoni.

¹⁸Ejoikinit kesi esubete naajokak, kirichakis ngitichisio luajokak noi, toliworos lukapatanak lu emorete ka luche ngiboro kech.

¹⁹Kotere eger ngolo iweyete kesi ebari lo eliworo ngesi monan eweeta kesi nikaagongon. Sodi taanyuneta kesi akiyar na erai aka iteni.

²⁰Timoteo, tochoik nguna kichikakin iyong. Tapalik ngakiro naaronok ka eburas lo a abaangu lo isudete ngitunga ngiche enyarito “Aosou”.

²¹Kainyo iwogasi ngiche ebaasi kianyu aosou ngina, nakaneni kotere nguna, apalikis kesi anupit ngakiro a Akuj. Kagatakinit esi daang ajokis a Akuj!