Read turkana 2 Timoteo 1 Bible Online

2 Timoteo 1 - turkana bible

2 Timoteo 1

¹Ayong Paulo lo kaseuni Akuj atoliwor emeanara a Yesu Kiristo ngesi egirunit abarua naga. Kaseunio ayong atolimo ngakiro a akiyar ana kolong kichikakinio ngoni ani kimorikinor aapei ka Yesu Kiristo.

² Kegirakinit ayong iyong lokookang lominat, Timoteo. Agasi atamar kitaanyu Akuj Apa ka Ekapolon yok Yesu Kiristo ajokis ka ngisien ta ekisil.

³Abuakinit ayong Akuj alakara na erai ngesi asubakinit ayong etich a etau aloajokon, loger lokolong kata apaayok. Abuakinit ngesi alakara esaa daang lo ketamunea ayong esi elipit nakwaare ka naparan.

⁴Etamunit ayong ngakiyo kus, nakaneni kemuit ayong aanyun ka esi noi, sodi atalakaror ayong lokojokon noi.

⁵Etamunit ayong atamar inupit iyong dir ngakiro a Akuj, anupit na ikoni nakolong ka ataa kon Lois, na ayei tani nia itiokon Eunike. Ayeni ayong atamar eyei tani anupit ngina nikon.

⁶Kotere nguna, kesitamunit iyong atamar torubak itiriraunit ainakinet a Etau a Akuj nakitaanyuni iyong Akuj na edokokinio ayong ngakan kang nakou kon.

⁷ Kainyo nyikitukuriani ngoni Etau lo kitaanyu Akuj, pearai kilelebi ngoni Etau keng agogongu ka amina ta akiapunit ngakiro.

⁸Wara robo nyikiruma ngileech akiruoro ngakiro a Ekapolon yok Yesu, kori nyikiruma ngileech kotere ayong lokaenitae kotere Kiristo. Erai ejoikinit iyong dang kiboliare kotere Ngakiro Naajokak, itemem ka agogongu nakitaanyuni Akuj.

⁹Kiyuuni ngesi ngoni kitanyarau atarata ngitunga keng a elope, meere kotere na kisub ngoni, erai kotere echami keng a elope ka ajokis. Kitaanyuni ngesi ngoni ajokis keng ani a Yesu Kiristo kolong eringa ngakwapin nyesubuna,

¹⁰ nakaneni edodiun tokona aniyok na abunio Ekayuunan yok Yesu Kiristo. Etasalu ngesi agogongu a akitu sodi kotere ngakiro naajokak, kidodiu ngesi akiyar na nyetoakere.

¹¹Kaseu ayong Akuj atolimo Ngakiro Naajokak arai emeanara ka eketataman,

¹²nakaneni erai ngakiro nguna ngesi anaikinitor ayong ngichan lu daang. Nakaneni aringa ayong arai lo egieno noi kainyo ayeni ayong lo amuno nabo ayeni dir atamar epedori ngesi achoikin ayong niajokon tanang Akolongit ngina kasekinit ngesi ayong.

¹³Totionik noi ngakiro na iteni nakolong ketatami ayong iyong, toliworos ekitetemes lo iwapit iyong, nabo kirichak anupit ka amina na erai ayok ani kimorikinor aapei ka Yesu Kiristo.

¹⁴Kotere agogongu a Etau a Akuj alo ibooyi aniyok totionik ngakiro naajokak kichikakin iyong.

¹⁵Iyeni iyong atamar kaisikis ayong ngitunga daang anakwap a Asia, kaisikis tani Pugelo ka Erimogene.

¹⁶Agasi atamar kisieni Akuj ngitunga a awi a Onesiporo, kainyo ketalakanari ngesi ayong ngirwa ngikaalak. Nyiruma ngesi ngileech nakaenitere ayong alojela,

¹⁷nakaneni napei anangunea ngesi Roma, tolomak akisak ayong tanang nakaanyunea.

¹⁸Agasi ayong atamar kisieni ngesi Akuj Akolongit ngina! Nabo iyeni dir nakolong kasubea ngesi ayong na ayakar Epeso.