Read turkana 2 Timoteo 2 Bible Online

2 Timoteo 2 - turkana bible

2 Timoteo 2

¹Ani eliwor iyong lokookang, totioner togogonger anajokis ana erai ayok ani kimorikinor aapei ka Yesu Kiristo.

²Ani ngakiro nakolong iirari iyong anikang alongaren ngikaanyunak ngikaalak, kichikak nguna ngitunga lu eyenikinitae lu epedorete akitatam ngitunga luche dang.

³Tacham kitoboliare iyong dang loger a asiger ana iwapit dir ngakiro a Yesu Kiristo.

⁴Asiger na eji niajokon, esaki talakar ekarikon a ajore keng, nyelomakini nabo ngesi akisak ngakiro ngache kimorik ka na ejie.

⁵Tani itwaan ni ebolosi ka luche ekerete, nyeanyuni ebachit mati kiwap ngakiro na elimokinitae.

⁶Eketan lo asub etich lokationon, ejoikinit eanyuni ngalemet na ekingaren.

⁷Kitamana na alimu ayong kainyo kiteyeni iyong Ekapolon Yesu nguna daang.

⁸Kitamu Yesu Kiristo lo eteyarunio. Arai ngesi ales a Daudi, loger lo itatamere Anakiro Anaajokak alimorit ayong.

⁹Kotere ni etatamea ayong Ngakiro Naajokak, aanyu ayong ngichan nabo kaenitae tani loger a erukoot. Nakaneni emam itwaan eenit akiroit a Akuj.

¹⁰Nakaneni anaikinit ayong ngakiro daang kotere ngitunga a Akuj luseuna, sodi taanyuneta kesi dang ayuuno na ebunit ani a Yesu Kiristo nabo eyaunit apolou na nyedaun.

¹¹ Eraakasi ngakiro nugu na iteni dir, “Ani kitoaka ngoni ka ngesi, kiyari tani ngoni ka ngesi.

¹²Ani kirubak ngoni kinaikinit, kiliwor tani ngoni ngikapolok ka ngesi aapei. Ani kinger ngoni ngesi, kingeri ngesi dang ngoni.

¹³Ani pekirai ngoni lu kimunoi, erubakini ngesi erai lo emunoi, kainyo nyepedori ngesi amoda bon.”

¹⁴Kisitam ngitunga kon ngakiro nugu, sodi kikilak kesi idesikinit alongaren Akuj atamar tapalikis angolopa. Nyejok echale nakaneni inyasuni tani ngitunga lu epupete.

¹⁵Tasak noi aliwor itwaan niajokon alongaren Akuj, irai ekasuban etich lo nyirumito ngileech kotere etich keng, lo itatami dir ngakiro a Akuj na iteni iyookino.

¹⁶Tapalik ekian loaronon lo erai eka a abaangu, lo echadari ngitunga nialonan ani a Akuj.

¹⁷Ikote ngakitatamet nguna ajeme na inyanyae akiring. Ngitunga ngiarei lu itatamete ngakiro na ikote nguna ngesi Umenayo ka Pileto.

¹⁸Aisikis kesi erot loa ngakiro ana iteni alomakis akikurukur anupit a ngikanupak a ngiche ebaasi kiyaru kolong ngoni arumor.

¹⁹ Nakaneni aweet na itemokino nakolong adupakini Akuj, ewei nyiukukokin, kidiama keng igiritae ngakiro nugu, “Eyeni Ekapolon Yesu lu eraakasi ngikeng” nabo, “Itwaan cha daang ni ebala arai ngesi ika Ekapolon Yesu, ejoikinit epalikini akisub naaronok.”

²⁰Kiyeni ngoni atamar tooma kai naapolon eya ngatubwae nachukul ka ngiboro lugelagelae, eraakasi ngiche ngika a akwangat ana elalak ngaropiyae taraakas ngiche ngika egolit, eraakasi ngiche ngika ngakito taraakas ngiche esubunitae alochoto, eraakasi ngiche ngika a etich ajokon taraakas ngiche ngika a etich alopasit.

²¹Ani kitoseg itwaan anakiro a naaronok kanguna kadaang, ikokini iborosit ni esubere ngitichisio luajokak, kainyo erai ngesi lo italeuno, lo ejok ani Ekapolon keng, esakit atamar katosubere etich loajokon daang.

²²Totiak etereku a esorokane sodi kirichu ngakiro na eteniyete na a anupit, na a amina ta na a ekisil, imorikina aapei ka lu enyarito Ekapolon Yesu a ngitai alu ikiuna esakete atamar kingarak kesi.

²³Nakaneni tonger ngakiro na a abaangu napasiek, iyeni iyong atamar erikito kesi eburas.

²⁴Nyejoikinit ekasuban etich a Ekapolon iburae. Ejoikinit ngesi epataner alotunga kadaang, eketataman loajokon lo etitinyikinit ngakiro,

²⁵lo epatana na eriyonokinea lu itopegete ngesi, kainyo epedori Akuj akitaanyun kesi alolom na elungeta ngasechesea kech toyenut ngakiro na iteni.

²⁶Nakaneni eriangunete kesi tobuchunos alolokit a Ekipe, alo kolong adakakin kesi kisiwap ngakiro na achamit ngesi.