Read turkana 2 Timoteo 3 Bible Online

2 Timoteo 3 - turkana bible

2 Timoteo 3

¹Kitamutu atamar epete ngakiro nakationok ngirwa lu a esal.

²Eminakinosi ngitunga make, eminakinete ngaropiyae, iwogasi ka akinisakin, imenyete Akuj, nyekerete ngikauriak kech, nyidodiunete alakara nabo nyikiunosi a naaronok.

³Epete ngitunga lu nyeminasi luche, lu emam ngisien, ngikaswamak, lu nyitemito ngakiro nabo todedeng, eremokinosi ibore daang ni ejok.

⁴Eliworosi ngikamodeanak, luaronok, kisisaka noi. Eminakinosi amera akidwang amina Akuj.

⁵Esubunete kesi lu eminasi Akuj, nakaneni engerete agogongu keng. Tochoik ngitunga lu ikote ngulu.

⁶Eloloto ngiche kech anakais a ngitunga sodi kirumuunut ngaberu nakabangaanak na ekuruworito ngasechesea nabo torikite etereku a ngawat kech lokaalan,

⁷esakete ngaberu nguna jiik akiyen ngakiro daang nakaneni nyepedorete akiyen ngakiro na iteni.

⁸Loger lokolong etopegeta Yane ka Yambire Musa, epegasi ngitunga lu dang ngakiro na iteni, ngitunga lu enyasun ngatameta nabo apalikis anupit ngakiro a Akuj.

⁹ Nakaneni emam ni enangete kesi kainyo eyenuni itwaan daang atamar ebangaaka kesi noi. Ekokinete kolong ngakiro neni ani a Yane ka Yambire.

¹⁰Nakaneni iwap iyong ngakitatamet kang, elote kang ka eger lo asubea ayong ngakiro daang. Iseme iyong eger lo anupitor ayong ngakiro a Akuj, atitinyikinit kang, amina kang ta anaikinit kang,

¹¹aboliaro kang ka ngichan kang. Iyenete esi daang na asubakin anikang alo Antiok ka Ikonio ta Lusitura ta aboliaro naaronon na anaikini ayong! Nakaneni katoyuu ayong Ekapolon ani eya kesi daang.

¹²Itwaan daang ni esaki akiboi eboyor lo eminar Akuj imorikina ka Yesu Kiristo aapei, eboliare.

¹³Nakaneni erubakinete ngitunga luaronok ka lukamodeanak aroner noi, ingalaate luche nabo kingalas make.

¹⁴Nakaneni ani eliwor iyong torubak iwapit ngakiro na iteni nakolong kitatamio iyong nabo inupit lokojokon noi. Iyeni iyong atamar ngiketatamak kon kesi ta ngae,

¹⁵nabo iyeni iyong atamar napei kolong irai iyong ikoku, iyeni iyong ngagiran na italeuno a Akuj na apedorete akitaanyun iyong aosou na eyauni ayuuno ani inupea ngakiro a Yesu Kiristo.

¹⁶Itojokit Akuj ngagiran daang nakaneni itemokino itatamere ngakiro na iteni, akikilakin naaronok, ka arionokin na ichwangakina ta akitatam eger loajokon lo ejoikinit ibooyere.

¹⁷ Sodi toliworor itwaan ni esubi etich a Akuj ni esubakina eriyan, tosubea etich loajokon daang.