Read turkana Tito 2 Bible Online

Tito 2 - turkana bible

Tito 2

¹Nakaneni ejoikinit iyong itatami ngakiro na ejokak.

²Tolimok ngikasukou toliworos lu etikokinito ngakiro, lukoosok nabo kiapunito ngakiro. Toliworos lu itemokino dir ananupit kech, ka amina ta anaikinit.

³Aloger alopei kangolo, tolimok ngakimak kibooyoto loger a ngaberu ana arimatoi. Nyeeliworosi ngakaswamak kori ngakamatak epurot. Ejoikinit itatamete ngakiro na ejokak,

⁴sodi kitatameta ngaberu nasorok aminakin ngikiliok kech ka ngide,

⁵toliworos na iapunito ngakiro, kikiuna, ngaberu nakeberak na epupete ngakiro a ngikiliok kech, sodi tongopea itwaan iruoror ngakiro a Akuj niaronon.

⁶Aloger alopei kangolo, kichikichik lusapa toliworos lu iapunito ngakiro.

⁷Anakiro kadaang, toliwor iyong elope ekitetemes a eboyor a loajokon. Toliwor lo itenoono nabo totenooko ngakiro na itatami iyong.

⁸Kiruor ngakiro naajokak na emam aratanu, kirumeta ngimoe kon ngileech ani engopeta ngakiro naaronok kiruorotor ngoni.

⁹Ejoikinit ngikedalak iwapete ngakiro a ngikapolok kech sodi kitalakasi kesi anakiro kadaang. Nyejoikinit kesi elunyanakinete kesi ngakiro

¹⁰kori tokokoa ngiboro kech. Erai ejoikinit kesi idodiunete atamar ejokak kesi jiik nabo emunoi, sodi kipuruunere ngakitatamet a Akuj a Akayuunan yok anibore kadaang ani esubete kesi.

¹¹Kainyo edodiu Akuj ajokis keng na eyuunere ngitunga daang.

¹²Kitatami ajokis ngina ngoni atamar atapalikisi ekibooye loaronon ka etereku a akwap, sodi eyaputu ngakiro, erichunos nabo eboikinos eboyor lo kinupitor Akuj anakwap,

¹³kiboi kidarit akolongit naajokon ngina nakigieno ngoni, akolongit na etakanunea akwangis a Ekapolon Akuj yok ka Ekayuunan Yesu Kiristo.

¹⁴ Alemun kolong ngesi kotere ngoni sodi kitoyuu anaronis kadaang, nabo kitiliwo ngitunga lukikiuna lu kirai ngikeng make, nabo kiitanit akisub naajokak.

¹⁵Kitatam ngakiro nugu ichikichiki ngitunga kikilakinite a apolou kadaang. Wara itwaan tani ipei nyikimenya iyong.