Read turkana Tito 3 Bible Online

Tito 3 - turkana bible

Tito 3

¹Kisitam ngitunga kiwapa ngakiro a ngikarikok ka ngikapolok, tokera kesi nabo tasaka akisub etich loajokon daang.

²Tolimok kesi atamar nyiruorotor itwaan tani ipei ngakiro naaronok, nakaneni ejoikinit isilito nabo tapataka. Ejoikinit jiik eraakasi ngitunga lu elilim alotunga kadaang.

³Kainyo kolong ngoni dang kibangaaka, pekipupi ngakiro, nabo kibatara. Kineikina kolong ngoni dang arorokanut nabo kimera a ngikitetio kadaang. Kiboi ngoni kirai ngitunga lu a anyunyura ka etereku, kiremokino ngitunga ngoni nabo atoremokino ngoni kesi.

⁴Nakaneni na atakanunea ajokis ka amina a Akuj a Akayuunan yok,

⁵kitoyuu ngesi ngoni. Meere kotere ngakiro ngache naajokak nakisubi ngoni ngikulepek, nakaneni erai ngisien keng a ilope ngesi kiyuunea ngesi ngoni, kotere Etau a Akuj lokitaanyunit ngoni akidouno nakitetet ka eboyor lokitetet ani kilotarea ngoni.

⁶Kilelebi ngoni Akuj Etau keng noi ani a Yesu Kiristo Ekayuunan yok,

⁷sodi kotere ajokis keng atachamunotor ngoni ka Akuj ataanyuneta akiyar nanyedaun nakigieno ngoni.

⁸Eraakasi ngakiro nugu na iteni. Asaki ayong iyong toneikin ekiruor ngakiro nugu, sodi topedoreta ngitunga lu enupito Akuj tominakis akisub ngakiro naajokak na ingarakinete itwaan daang.

⁹Nakaneni totiak apega na a abaangu, ka ekian ngakiro a ngirora alukaalak kata apaa yok ka eburas, ta angolopa kotere ngakiro a etal. Eraakasi ngakiro nguna napasiek na nyikingarakinete.

¹⁰Kikilak itwaan ni irokunit ekurikur akikilakinet na ekingaren ka na a ngaarei. Ani erumor, wara nabo nyiibongok ngesi.

¹¹Iyeni iyong atamar itwaan ni ikoni neni erono nabo erai ekasechan, nakaneni eyeni ngesi dang ilope atamar asubi naaronok.

¹²Ani kameu ayong Aritemas ka Tukiko nikon, kikirikiruun bu kitaanyu alo Nikopoli, kainyo asaki ayong akiboi kaina ngirwa lua akatorot.

¹³Kirichakin akingarakin eketataman a etal Senas ka Apolo analotoru kech. Ani keyei ibore ni ichanasi, ejoikinit iyong isakakini.

¹⁴ Ejoikinit ngitunga yok itatamasi akisub ngitichisio luajokak, taanyuneta ngiboro lu iitanitae, meere akiboi pas.

¹⁵Kimalaate iyong ngitunga daang lu kirukit ka ayong. Kimala ngipaalon kosi lu enupito ngakiro a Akuj. Kagatakinit esi daang ajokis a Akuj.