Read turkana Ngieburaniae 1 Bible Online

Ngieburaniae 1 - turkana bible

Ngieburaniae 1

¹Kolong a angorot, eruorosi Akuj ka ta apaayok alokadwarak a Akuj ngirwa ngikaalak, a ngirotin a ngikaalak.

²Nakaneni ngirwa lu esal lu, kisuruor ngesi ngoni ani a Lokookeng. Erai ngesi kolong asubea Akuj akwap, sodi toseu ngesi Akuj toliwor ekeruman a ibore kadaang topolok.

³Inwakunit ngesi akwangis na ipuruore Akuj, nabo ngesi ka Akuj alope, ikwaan per. Itoweit ngesi akwap a agogongu a akiroit keng. Ani arumoret a akitaanyun ngitunga arimakino a ngasechesea kech, kiboikin nadis lowae lo a aloteten a Akuj, ana epol.

⁴Toliwor ngesi loapolon noi lo idwangit ngimalaikae loger lopei tani epolotor ekiro keng.

⁵ Kainyo nyelimokina Akuj tani epei a ngimalaikae keng tama, “Irai iyong Lokookang. Aliwor ayong Apakon akolongit na.” Kori nyelimuno Akuj alomalaikat tani epei tama, “Aliwor Apakeng, toliwor ngesi Lokookang.”

⁶Nakaneni ani eapuuni Akuj ameun Lokookeng lo ekingaren nakwap, tolim ngesi tama, “Ejoikinit ngimalaikae a Akuj daang ilipete ngesi.”

⁷ Nakaneni alowae a ngimalaikae tolim Akuj tama, “Itusubuni Akuj ngimalaikae keng ngikuwamea, ani ngikasubak etich keng tosubut ngasarae a akim.”

⁸ Nakaneni ani alowae a Lokookeng, tolim Akuj tama, “Apolou kon Akuj, erai na nyedaun jik! Ipolokinit iyong ngitunga kon a eboyor alo etenoono.

⁹ Imina iyong ngakiro na eteniyete nakaneni iremokino na ichwangakina. Kotere nguna, kiseu iyong Akuj na erai Akuj kon kitalaka noi kitaanyu ekipur loajokon noi lo idwangit lo a ngirukitos kon.”

¹⁰Tolim ngesi nabo tama, “Iyong Ekapolon ngesi kolong isubakini akwap anakisiakinet nabo isubakini iyong adis a ngakan kon.

¹¹Engopiarete kesi nakaneni idongi iyong. Edaudaunosi daang loger a ngiworui.

¹²Ibilanakini iyong kesi loger a eworu. Ilochio kesi loger a ngiworui alu enapio ngiche. Nakaneni idongi iyong ikoni neni jik, nabo nyedaun akiyar kon.”

¹³ Nyelimokina Akuj tani epei a ngimalaikae keng tama, “Kiboikin lowae lo akan kang ana aloteten, tanang na ewaakinea ayong ngimoe kon kwap nakejen toreu iyong kesi.”

¹⁴Eraakasi ngimalaikae ngiborei lu emam ngawat lu esubete etich a Akuj sodi kingarakis lu eyuunio.