Read turkana Ngieburaniae 10 Bible Online

Ngieburaniae 10 - turkana bible

Ngieburaniae 10

¹Nyerai etal a Ngiyaudi ekitetemes lo ka dir a ngakiro ana eraakasi ngaka iteni. Ikoni etorube a ngakiro anaajokak monan epote. Elemuununio ngakipeyos nguna jiik, ngikaru daang. Ikokini tokona etal itiliwori ngitunga lu epote nia Akuj lu ikiuna kotere eger a ngakipeyos kanu ai?

²Arai kolong dir kitosegae ngitunga lu elipito Akuj alosech kech, pakeringa kesi eyenete atamar kirai ngikasechak nabo kepalikinito jik alemuunun ngakipeyos.

³Nakaneni ngakipeyos na elemuununio ngikaru daang nguna, isitamunito ngitunga ngasechesea kech.

⁴Kainyo nyelemarete ngaakot a ngimongin ka ngakinei ngasechesea a ngitunga.

⁵ Ibore ngini ngesi kolong alimunio Kiristo na abunio nakwap tama, “Nyesaka iyong ngalemunet kori ngakipeyos, nakaneni isubak iyong akwaan kon kotere ayong.

⁶Nyikijoikinito iyong ngibaren lukipeyokinitere iyong, kori ngalemunet na elemarete ngasechesea.

⁷Sodi atolim ayong atama, ‘Ee Apa, ayong lo, asaki akisub na ichamit iyong, loger lo igiritere ngakiro kang, nakitab na a etal.’ ”

⁸Alimuni mono ngesi tama, “Nyisaki iyong kori nyikijoikinito ngakipeyos ka ngalemikinet, kori tani ngibaren lu kipeyoore iyong ka ngalemikinet na elemarete ngasechesea.” Alimuni ngesi nguna tarai bo alemuununio ngakipeyos nguna daang iwapap ka etal.

⁹Sodi tolim ngesi tama, “Ee Apa, ayong lo, asaki akisub na ichamit iyong.” Abu Akuj kimiek ngakipeyos na kolong ngorok dio kilunyok akipeyos a Kiristo ni kolong ayakasi nguna.

¹⁰ Kona asubea Yesu lo erai Kiristo na kolong asaki Akuj ngesi tosub, kitaleunio ngoni daang alosech a akwaan keng ana alemuni ngesi alemunet apei nakajik.

¹¹Emuron a akai a Akuj daang esubeene etich akolongit daang nabo ipeyoe ngakipeyos ngapei ngakipeyoet ngakaalak, nakaneni nyelemarete ngakipeyos nguna ngasechesea.

¹²Nakaneni alemuni Kiristo akipeyoet apei kotere ngasechesea. Arai akipeyoet ngina na etenoono jik dio ani erumor kiboikin ngesi nakan na aloteten a Akuj.

¹³Idarit tokona ngesi kaina Akuj iwaakini ngimoe keng kwap nakejen keng dio toreu ngesi.

¹⁴Kotere akipeyos apei, etiliwo ngesi lu etaleunio alosech lu ikiuna.

¹⁵Kitunupit ngoni dang Etau a Akuj na alimunio mono tama,

¹⁶ “Ebala Ekapolon, ngirwa lu monan epote, achamunet nakichamakin ayong ka kesi. Eteyenuni ngitalio kang alotai kech, nabo egiri lotamen kech.”

¹⁷Sodi tolim tama, “Nyetamuni nabo jik ngasechesea kech ka ngakiro na ichwanganakinete kesi.”

¹⁸Nakaneni na erimakinere ngulu, nyechamakinitae nabo eyei akipeyos a ngasechesea.

¹⁹Tokona bocha ngikaitotoi, kigienokin ngoni alomar ni Italeuno Noi kotere ngaakot a Yesu.

²⁰Kingak ngesi ngoni erot lokitetet, erot lo erai eka akiyar, erot ngolo ngesi lo a awaru anakooyen, ngesi atamar, erai akwaan keng a elope.

²¹Eyei ngoni Emuron Loapolon noi lo eweikinit ngitunga a Akuj.

²²Ejoikinit tokona ngoni kirudun nia Akuj a ngitai aluajokak alu enupito ngakiro a Akuj dir. Erudun a ngitai alu etaleun alosech ka ngawat na elotar a ngakipi anaasegak.

²³Atorubakisi anakigieno ana kilimorit ngoni, kainyo eraakasi ngakiro nakichikak ngoni Akuj ngaka iteni.

²⁴Atasaka epit lo kichoanakinor ngoni make, engaranakin ngoni make kidodianakin amina ka akisub naajokak.

²⁵ Nyikipalik akiriamuunun wapei loger a ngiche. Nakaneni engaranakin jiik kona aapunea Akolongit na a Ekapolon.

²⁶Emam akipeyos ache eyei erai kiyechak ngoni atorubakisi kisecheene tarai kitoyen ngoni sek ngakiro na iteni.

²⁷Ibore ni idongi ngesi akidarun a ebuloi eriras a Akuj ka akim naka monan na emunyari daang lu itopegete Akuj!

²⁸Itwaan daang ni asechi etal a Musa, aareeneo emam ngisien arai kelimut ngikaanyunak ngiarei kori ngikaalak atamar esechit ngesi.

²⁹Ekoe, ani bo itwaan ni imenyarit Lokookeng a Akuj ka ajamuar ngaakot a achamunet a Akuj ana kolong etaleuni ngesi? Eroner noi eriras lo eanyuni itwaan ni iyenyi Etau a Akuj lo erai eka a ajokis a Akuj!

³⁰Kainyo kiyeni lo kolong abala, “Atachakini ayong, atachakini ayong,” ka nabo lo abala, “Irirae Ekapolon ngitunga keng”.

³¹ Nakaneni erai ibore niaronon noi aanyun eriras a Akuj ana eyari!

³²Kitamutu na kolong asubakinosi na kolong a ekingaren na ianyungareta esi akicha a Akuj. Tani na ichanyuneta esi nakaalak kiboliare ngirwa ngulu, ipot esi tanaikis.

³³Ani awache kiyenyio esi kitoboliare alongaren ngitunga, ani nabo awache isakete esi akimorikin kangulu asubere ngakiro nguna.

³⁴Kisienito esi lu aenitae alojela ani nakidemarere esi ngiboro kus, ipot esi tanaikis nguna a alakara, kainyo iyenete esi atamar itingito esi ibore niajokon noi ni nyedaun jik.

³⁵Nakaneni warasi nyiipalikis na igienosi esi kainyo kesi kitaanyunete esi ebachit loapolon noi.

³⁶Ejoikinit esi inaikinito ngakiro sodi tosubeta na echamit Akuj, nabo taanyuneta nakichikak ngesi esi.

³⁷ Kainyo igiritae nagiran kona, “Eringa cha mono wadio, sodi bunio ngolo kabunon, nyerubakini ngesi.

³⁸Nakaneni enupete ngitunga kang lu etenoono eboyor kech ngakiro kang dio toyara, nakaneni ani kerea ipei kech tobongo, nyakajoikinete ayong ngakiro keng.”

³⁹Meere ngoni ngitunga lu kirea atobongosi sodi atobukoros, nakaneni kirai ngitunga lu kinupit ngakiro a Akuj lu kiyuun.