Read turkana Ngieburaniae 11 Bible Online

Ngieburaniae 11 - turkana bible

Ngieburaniae 11

¹Anupit ngakiro a Akuj ngesi akiyen dir atamar eraakasi ngakiro na kigieno ngoni ngaka iteni, erai ngesi akinup dir ngakiro a ngiboro alu nyikitee ngoni.

²Erai epit a anupit kech ngesi kolong achamununea Akuj ngitunga lu kolong ayarete kanuan.

³ Erai epit a anupit kiyenea ngoni atamar asubi Akuj akwap a akiroit keng. Sodi tosubunae ibore ni iteeo aloboro alu nyetakanete.

⁴ Arai epit a anupit ngesi etelemuni Abel ngakipeyos naajokak noi na edwangito na Kain. Kotere anupit keng, tachamu Akuj ngesi atamar erai itwaan ni etenoono eboyor keng kainyo arai Akuj alope bon achamuni ngalemunet keng. Kotere ananupit keng, eringa Abel iruoro tokona, tani kolong ketoanit.

⁵Arai epit a anupit ngesi kolong peatoanea Enok. Nakaneni yaarae ngesi kidiama nia Akuj, emam itwaan aanyu ngesi, kainyo ayaarit Akuj ngesi kidiama. Igiritae nagiran atamar ani eringa Enok nyeyaara kidiama, etalakarit ngesi Akuj.

⁶Emam itwaan italakari Akuj erai pekenupit ngesi, kainyo itwaan cha daang ni ebuni nia Akuj, echamit enupi atamar eyei Akuj, nabo einakini lu esakete ngesi daang ebachit.

⁷ Arai epit a anupit ngesi echikichikea Akuj Noa ngakiro na adikino esubakinosi tarai peetee ngesi. Ewapakini ngesi ngakiro a Akuj sodi toduk atubwa na ayuunere ngesi ka ngitunga a awi keng. Kotere nguna, kirirae ngitunga a ngakwapea, dio taanyu Noa eboyor lo etenoono lo itorunit nanupit.

⁸Arai epit a anupit ngesi ewapakinea Aburaam ngakiro a Akuj na anyaraare tamarae tolot nakwap na asaki Akuj ainakin toliwor akeng. Towot ngesi anakwap keng peeyeni ni eteni.

⁹Arai epit a anupit ngesi ebooyo ngesi loger a epeyonon anakwap ana echikakinit Akuj. Eboyeene ngesi aloeman loger a Isaka ka Yakobo alu aanyunete akichikakinet napei ngina ani a Akuj.

¹⁰ Kainyo edarit Aburaam ere lo edukuk dir imijakina, lo erai Akuj alope etemi dio akiduk.

¹¹Arai epit a anupit ngesi auriunea ngesi ikoku, tarai amojongit Aburaam noi nabo tasalunite tani Sara. Anupit ngesi atamar irichakini Akuj akichikakinet keng.

¹² Anitwaan anipei kaen, ani ekoni ekatoan, ngesi aponeta ngalesea nakaalak loger a alalau a ngikanyer anadis, nabo lu emam ekimar loger a asinyen ana a ekwaas a anam.

¹³Arai epit a anupit ngesi atoaketa ngitunga ngulu daang. Peanyunete kesi ngiboro lu echikakinit Akuj, nakaneni epouworete ngiboro ngulu eringa eloka, tachamut dir atamar kiya kesi nakwap na loger a ngipeyok kori ngitunga lu ilato.

¹⁴Kiyeni tokona dir atamar ngitunga lu iruorosi ngakiro na ikote nguna, elimunete atamar kiitanit kesi akwap na erai akech a ngikulepek.

¹⁵Nyerubakinete kesi itamete ngakiro a akwap ana kolong aisikinete. Arai kolong kitamete, keyei kona ebongorete.

¹⁶ Nakaneni arai akwap naajokon noi eitanito kesi, akwap na a adis. Ibore ngini ngesi nyitimitor Akuj ni enyaritotor kesi ngesi Akuj kech, kainyo asubaki ngesi kesi ere.

¹⁷Arai epit a anupit ngesi kolong alemunea Aburaam lokookeng Isaka toliwor akipeyos, na eningitor Akuj ngesi. Aburaam kolong ngesi echikakinit Akuj akichikakinet, nakaneni achamunit ngesi alemun lokookeng lo arai epei bon toliwor akipeyos.

¹⁸Alimokini Akuj ngesi tama, “Erai nia Isaka ngesi ianyunea iyong ngalesea nakechikakini ayong iyong.”

¹⁹Etemit Aburaam atamar epedori Akuj akiteyarun Isaka, kikok ekitetemes ngolo atamar, aanyuni Aburaam Isaka nabo tarai sek atoanit.

²⁰ Arai epit a anupit ngesi echikakinea Isaka Yakobo ka Esau atamar eliworosi lu epiaritae.

²¹Arai epit a anupit ngesi apiarea Yakobo talokookeng a Yosep daang eringa nyetoana. Togongakin ngesi naburo keng sodi kilip Akuj.

²² Arai epit a anupit ngesi alimunio Yosep na aapikinea akitu atamar erotokinete monan Ngisirael alo Misiri, dio nabo dang kichikak kesi eger lo enukere ngakoyo keng.

²³ Arai epit a anupit ngesi edaeta ngikauriak a Musa ngesi a ngilapio a nguuni na edounere. Kingolikis kesi atamar erai ngesi ikoku nikebusean, dio nyekera kesi akinger ngakiro na adungunit ekapolon a Misiri.

²⁴Arai epit a anupit ngesi angerio Musa anyarao lokookeng a nakookeng a ekapolon a Misiri na apolounio.

²⁵Totiaku ngesi atamar katoboliare ka ngitunga a Akuj aapei akidwang amera anakisech wadio.

²⁶Kitem ngesi atamar ejok kiboliare dio kimenyar kotere Kiristo idwangit ebari daang lo eyei Misiri. Arai akienyikinit ngesi ebachit lo eanyuni monan.

²⁷Arai epit a anupit ngesi arotokinio Musa alo Misiri peemit atamar engoi ekapolon a Misiri. Towou ngesi abongor ikwa ibore esibit etee ngesi Akuj na nyetakani.

²⁸ Arai epit a anupit ngesi esiakinea ngesi Adeparet ka eger lo adungunio ngesi atamar kiwasanakisi ngaakot kidiama ngidorin, sodi nyearea Emalaikat lo a akitu ngide lusapa lu ekingaren alokolea kadaang a Ngisirael.

²⁹ Arai epit a anupit ngesi kolong etorioto Ngisirael Nanam a Chamu, ikwa ibore esibit aloose anikalapatan. Na asaketa ngitunga a Misiri akitor neni, tomunyasi kesi daang ngakipi.

³⁰Arai epit a anupit ngesi aukuorotor ngawasea a Yeriko na erimioto Ngisirael a ngirwa a ngikan-kaarei.

³¹ Arai epit a anupit ngesi pearere amalaat na enyaritae Raab aapei ka lu angerete Akuj, kainyo epeyeuni ngesi ngirototin a Isirael niajokon.

³²Ekoe, anu ngache alimuni? Emam esaa tokona lo itemokino alimuni na kata Gideon ka Barak, ka Samson ka Yepita, ka Daudi ka Samuel ta ngikadwarak a Akuj.

³³Arai epit a anupit ngesi etijioto kesi ngibukui lu a ngakwapea anache kidwanga. Asubete kesi ngakiro na ateniyete eriyan sodi taanyut na echikakini Akuj. Agolete kesi ngakituk a ngingatunyo,

³⁴etudungeete ngakimea nakarirak, dio tobuchun na adikino earere a ngilengea. Apalag kesi, nakaneni togogongioto. Ajioko kesi noi kidwanga ngajorei na a ngakwapea anache tobwanga.

³⁵Kotere epit a anupit, aanyunete ngaberu ngitunga kech lusek anupito kainyo apon kiteyerunae. Ani luche lu peasakete talachakinae, totoaka eboliare kainyo asakete kesi kiteyarun atolomareta nakiyar naajokon noi.

³⁶Akianare ngiche sodi kidetae, ani ngiche toenae a ngiriko torikoroe lojela.

³⁷Achakio kesi a ngamoru, tapakae a ngilengea ta akichum taarae! Erimito kesi akwap enapito ngilowi a ngamesekin ka ngakinei, ebootonit kesi, aboliare nabo kichanitetei.

³⁸ Ajokak kesi noi edwangito ngikajokak a akwap kana! Elato kesi anarieta ka ngimoru loger a ngikepasak, kiboyoto alotooma ngatabab ka ngaduon.

³⁹Ayenikinitae ngitunga ngulu daang atamar ekilenikinit kotere epit a anupit kech! Nakaneni ani tani kikoni neni, emam tani ipei kech ni abu taanyu na echikakinitae,

⁴⁰kainyo kirekinit kolong ngoni Akuj ibore niajokon noi. Ayeni ngesi atamar eliworosi kesi lu ikiuna kirukit ka ngoni aapei.