Read turkana Ngieburaniae 12 Bible Online

Ngieburaniae 12 - turkana bible

Ngieburaniae 12

¹Ani alowae yok, eyakasi ngikaanyunak lukaalak lu kiriamito ngoni, nakaneni tokona, atochakasi ibore daang ni kiratakinit ngoni ka akisech daang na erubit aniyok, atamataros tokona erinyakinos anakerit ana eyei ngaren yok.

²Ejoikinit tokona ngoni kikenyikini Yesu lo erai ngesi kolong esiakini anupit yok nabo ngesi itasaluni. Kotere alakara na ayeni ngesi atamar aanyuni, tanaik ngesi atoanere anapir! Nyemisikina ngesi ngileech lu aanyuni, nakaneni ibooyi tokona ngesi alowae alo aloteten a ekicholong a apolou a Akuj.

³Kitama daang na aanyuni Yesu, eger lo anaikinea ngesi ngakiro daang na aremitotor ngikasechak! Warasi nyiiar ngitai tolilimiosi.

⁴Kainyo alopit alo irichatar esi akinger akisech, eringa esi nyirichakina tanang tani kiario.

⁵Kaneni a, kimuriakis esi ngakiro nakitalakarete ngitai nakilimitor esi Akuj atamar iraakasi talokookeng a? “Ikakoku, nyiimisik nakirikinio iyong Akuj, nabo nyiar etau nakikilakinea ngesi iyong.

⁶ Kainyo erionokini Ekapolon itwaan daang ni emina ngesi, nabo idesi itwaan daang ni echamuni ngesi atamar erai ikoku keng.”

⁷Tanaikisi daang na eriebete ngitai kus iyenete atamar eraakasi ngakiro na kitatamete esi, idodiunito na kiriebete esi ngitai atamar kimarunit Akuj esi atamar iraakasi talokookeng. Eyei ikoku nakanuan ni nyidesit apakeng a?

⁸Ani pakidesio esi lopit a ngide keng aluche kadaang, idodiunit ibore ngini atamar nyikote esi ngide lu a akai, ikote esi ngide a akeor.

⁹Aloger kata a apayok alu kuurunete ngoni, kideese kesi ngoni sodi atokera ngoni kesi. Kongina pei, ejoikinit ngoni kikeri noi Apayok alopit a etau sodi atoyareta!

¹⁰Kiriraate ngoni ta apayok lu kuurunete ngoni a ngirwa a ngidikidio make, alopit alo ajoikinit kesi, nakaneni kirirae ngoni Akuj sodi ataanyuneta ngoni akitaleuno keng.

¹¹Nakiriraare ngoni, esubuni mono ibore nikitisinyi ngoni, meere ni kitalakari. Ani ekisidi, ngulu etenikin loger ngolo, eanyunete ebachit lo ekisil lo erai eboyor lo etenoono.

¹²Kikeutu ngakan kus na eburunit, sodi kitogogongo ngakungin kus na emaranete!

¹³ Torubakisi iloose alorotin alu itenikina, sodi nyengwaleta ngakejen kus na ichodosi esi, nakaneni toliworos na engalekinete.

¹⁴Tasaka akisil ka itwaan daang, nabo tasaka akiboi eboyor lo italeuno, ani kiitun eboyor ngolo, emam itwaan eanyungari Ekapolon.

¹⁵Tochoikinos sodi nyiibatarosi anajokis a Akuj. Warasi nyeemin itwaan ni ikoni ekitoe loadwaran lo erupuni sodi kisiak ngichan, toliworos ngikaalak lu nyitaleuno kotere ngichan ngulu.

¹⁶Warasi nyeemin itwaan nimalaat kori ni nyekerit Akuj loger a Esau, alo kolong agialari apolou keng na araakar ikoku ni ekingaren kotere akimujet apei bon.

¹⁷ Iyenete esi atamar asaki ngesi ekisidi atamar katopia apakeng, nakaneni tongeroi ngesi kainyo amam ngesi kona ilochi nasek apon tosubae. Asaki ngesi noi katopiar sodi kigor tani ngakiyo cholae.

¹⁸Nyepona esi loger lo kolong aponeta Ngisirael. Nyepona esi nibore ni epedorio akitap, kori ni ikoni emoru a Sinai lo ewari asarae, kori aribu ka akirionut kori ekuwam,

¹⁹kori ekuse a aburuch ta echale a etoil. Na eirareta ngitunga etoil, tamasi nyikisaki eirasi achekiroit,

²⁰kainyo amam kona enaikinete kesi akiroit na adungunitoe atamar, “Ani tani kerai etiengit etapi emoru, echamit imasio a ngamoru totoan.”

²¹ Arai na eteete naketubulok noi dio tolim Musa tama, “Kabul ayong noi aem!”

²²Nakaneni ipot esi moru a Sion, ni eyei ere lo a Akuj ana eyari. Inanga esi Yerusalem lo erai ere a Akuj, ni echunakina ngimalaikae lukaalak lu emam ekimar.

²³Ipot esi ni echunakina talokookeng a Akuj lu a ekingaren lu igiritae ngirora kech nadis. Ipot esi nia Akuj ana irirae ngitunga daang ka ngitai a ngitunga aluajokak alu etiliwor lu ikiuna.

²⁴ Ipot esi nia Yesu alo aree achamunet nakitetet nabo ta ngaakot na abukor na kichikakinito ngiboro luajokak noi lu idwangito ngaakot a Abel.

²⁵Tochoikinos robo warasi nyiingero akiirar ngakiro kangolo iruoro. Ani pekeyuuna lu kolong awounete akiirar na echikichikere kane anakwap, kikokini ngoni kiyuun ai, arai kinger akiirar nakichikichikea lo abuni anadis?

²⁶Etamaranikini etoil keng akwap ngirwa ngulu. Nakaneni echikak tokona ngesi atama, “Meere akwap bon etamaranikini nabo, etamaranikini adis dang.”

²⁷ Akiroit be “nabo” idodiunit dir atamar itamaranikinio ngiboro lu asubitae tolemarae, sodi ani ngiboro lu nyitamaranikinio, kidongo.

²⁸Atobuakisi robo Akuj alakara kainyo kianyuni ngoni Apolou na nyitamaranikinio. Atalakaros elipa Akuj a erot alo ejoikinit ngesi, kirima ngesi atokerito,

²⁹ kainyo erai Akuj yok akim nakinyasuni dir.