Read turkana Ngieburaniae 13 Bible Online

Ngieburaniae 13 - turkana bible

Ngieburaniae 13

¹Torubakisi iminan make loger a ngikaitotoi alukiristoi.

²Warasi nyikimuriak akipeyounun ngipeyok, kainyo a epit kangolo, epeyounete ngitunga ngiche ngimalaikae peeyenete.

³ Kitamutu lu eenitae alojela tosub kienitae esi ka kesi aapei. Kitamutu lu eboliare tosub kiboliare esi ka kesi aapei.

⁴ Ejoikinit akuuta erimasi ngitunga daang, toliwor ekile ka aberu lu irichuna. Irirae Akuj lukiliok ka luberu lu epereenete peiutut, ta ngikalomak.

⁵Nyiiliworosi ngitunga lu eminasi ngaropiyae. Kitemokin esi ngiboro lu itingito. Kainyo alimu Akuj alope ebala, “Nyekemiekini jik, kori nyakachakari.”

⁶ Ngesi kititinyoror atolimutu atamasi, “Ekapolon ngesi kengarakini ayong, nyaemi. Anukiro kasubakinea ayong itwaan?”

⁷Kitamutu ngikarikok kus lu kolong kilimokinete esi ngakiro a Akuj. Kitama epit a elote kech sodi kirokut anupit kech.

⁸Yesu Kiristo ngesi erai lopei been ka akolongit na ta lokajik.

⁹Warasi ngakitatamet ngakaalak nagelagelae kitowoliorete esi alorot alo etenoono. Ejoikinit ngitai yok itogogongio a ajokis a Akuj, meere a ngitalio alu a epit a akimuj. Emam itwaan ni ewap ngitalio ngulu ni apot kingarakis.

¹⁰Nyechamit ngimurok a akai a Akuj lu esubete etich ani ilipitotor Ngiyaudi Akuj enyamete akipeyos na ipeyokinitoe Akuj.

¹¹Eyauni Emuron Loapolon a akai a Akuj a Ngiyaudi ngaakot a ngitieng ni Italeuno Noi sodi tolemu ngalemikinet kotere ngasechesea. Nakaneni ipeyoe akiring a ngitieng kangulu anikalapatan a adakar.

¹²Ibore ngini ngesi atoanea Yesu dang anikalapatan a ere, sodi kitiliworea ngitunga lu ikiuna anakisech a ngaakot keng a elope.

¹³Atoloto tokona ngoni nikeng nikalapatan a adakar, sodi ataanyutu ka ngesi ngileech aapei.

¹⁴Kainyo emam ngoni ere lokajik kane anakwap. Kidarit ngoni ere lo ebuni.

¹⁵Epuruutu robo ngoni jiik Akuj toliwor akipeyos yok ani a Yesu. Ibore ngini ngesi ekipur lo elimunete ngitunga lu elimorito ekiro keng.

¹⁶Warasi nyikimuriak akisub naajokak ingaranakinosi, kainyo nguna eraakasi ngalemunet na ejoikinito Akuj.

¹⁷ Tokera ngikarikok kus kiwapa ngitalio kech. Echoikinito kesi ngitai kus nakwaare ka naparan, nabo elimuunete ngakiro a etich alo asubete kesi alongaren Akuj. Ani kiwap esi ngakiro kech, esubete kesi etich kech elakara. Ani pekiwap ngakiro kech, esubete etich ialolongete nakaneni emam ibore ianyunete esi alopit kangolo.

¹⁸Torubakisi kilipakinito. Kiyeni sua dir atamar ejok sua ngitai, kainyo kisaki atosuba ibore ni eriyan jiik.

¹⁹Kemaimai esi noi atamar kilipakinae Akuj sodi abunio nikus atipei.

²⁰Eteyaru Akuj Ekapolon yok Yesu lo erai Ekeyokon Loapolon a ngamesekin ani abukorea ngaakot keng na eyookinete achamunet nakajik.

²¹Kimiekisi Akuj na a ekisil kiinak esi ibore daang niajokon ni isakete esi tosubeta na echamit ngesi. Kimiekisi ngesi nabo dang tosub na echamit ngesi anikosi, ani a Yesu alo erai Kiristo. Nabo kipuruunoe Yesu Kiristo jik nakajik! Aamen.

²²Kemaimai esi ngikaitotoi kang atamar tanaikisi kare topupokis ngakiro nakitititinyete nu. Kainyo nyewoi abarua nakegirak ayong esi naga.

²³Asaki ayong esi toyena atamar alachakin lokaatoyok Timoteo alojela. Ani kebu ngesi atipei, kirukuni ayong ka ngesi na abunio aanyun esi.

²⁴Kimalata ngikarikok kus daang ka ngitunga a Akuj daang. Kimalaate esi ngikaitotoi lu eponito alo Italia.

²⁵Kigasi atamar kiruko esi daang ka ajokis a Akuj.