Read turkana Ngieburaniae 2 Bible Online

Ngieburaniae 2 - turkana bible

Ngieburaniae 2

¹Kotere nguna, ejoikinit kirichakini lokojokon na kolong kiirari sodi nyikibatar.

²Kainyo araakasi ngakiro na kolong esuruorete ngimalaikae ta apaayok na iteni. Nakaneni itwaan daang ni awouni akiwap ngakiro nguna kori akirichakin, aanyuni eriras lo etemem ka akisech keng.

³Kikokini tokona ngoni kipuun erai kipasak ayuuno naationon ikoni na ai? Ekapolon kolong elope esiauni kiruor ngakiro a ayuuno kangina. Ani lu eirarete ngakiro keng kitunupa sua atamar eraakasi na iteni.

⁴Kitiliwo Akuj dang ngakiro nguna ngaka iteni ani asubea ngakitoodikinet daang nakailiilok ka nakitalarete. Sodi totiakanak ngesi ngitunga ngainakinet a Etau a Akuj loger lo asakitor ngesi.

⁵Nyelemuna Akuj ngimalaikae atamar topolokis ngakwapea nakiteat na eraakasi ngaka monan, ngakwapea na kilimit ngoni.

⁶ Igiritae nagiran ngache kona, “Etige Akuj, nyo mono tokona itwaan itamitor iyong ngakiro keng? Nyo imisitor iyong ngakiro a itwaan?

⁷Ani cha mono wadio, kitiliwo iyong ngesi ni idwangito ngimalaikae. Kitiliwo iyong ngesi Ekapolon lo erimae, kipuruunitetei.

⁸Sodi kitopolok iyong ngesi ibore daang.” Ebeyo etiliwori Akuj itwaan “ekapolon a ngiboro kadaang,” emam nabo iche ipakaritae. Tani bo kikote neni dang, nyikitee tokona ngoni itwaan epolokinit ibore daang.

⁹Nakaneni kitee ngoni Yesu lo kolong etiliworio mono cha wadio lo idwangito ngimalaikae sodi aloger a ajokis a Akuj, totoan ngesi kotere itwaan daang. Kitee tokona ngoni ngesi itiliworio ekapolon lo erimae, kipuruunitetei ani ariabar ngesi totoan.

¹⁰Etemokino ani Akuj ana kolong asubi ibore daang, nabo ngesi iratakinit ibore daang itiliwori Yesu lo ikiuna kotere ariaba keng. Sodi yau ngesi ngide a Akuj lukaalak kipuruunoe ka ngesi aapei. Kainyo Yesu ngesi erikit kesi nayuuno.

¹¹Itosegi ngesi ngitunga anasechesea kech, sodi peneta ngesi kalu asegeta daang Apa epei. Ngakiro nguna ngesi nyitimitor Yesu anyarare kesi ngikaitotoi keng.

¹² Alimokinit ngesi Akuj tama, “Alimokini ngikaitotoi kang na isubak iyong. Kepuruuni iyong ani iriamiriamito kesi.”

¹³ Elimunit dang ebala, “Egienokin ayong Akuj.” Elimunit nabo ngesi ebala, “Kirukit ayong kane ka ngide lu kainaki Akuj.”

¹⁴Kona eraakatar lu enyarit ngesi ngide ngitunga lu eya ngawat ka ngaakot, kikwaanikin Yesu elope ka kesi, kiruko ka kesi erai itwaan. Asubi ngesi nguna kongina sodi kinyasunea Ekipe lo erai ngesi epolokinit akitu

¹⁵ani kikok neni talachak lu kolong araakasi jiik ngirikon aloboyor kech ani akeritotor akitu.

¹⁶Kainyo ileere atamar peabuni ngesi akingarakin ngimalaikae, pearai ikoni eger lo igiritere nagiran kona, “Ingarakini ngesi ngalesea ka Aburaam.”

¹⁷Idodiunit ibore ngini atamar ajoikinit ngesi ikwaanikin ka ngikaitotoi keng alorotin kadaang. Toliworor ngesi Emuron Loapolon a akai a Akuj lo emunoi ka lo angisien alotich a Akuj, sodi torimakinere ngasechesea a ngitunga.

¹⁸ Epedori tokona ngesi akingarakin lu iningitoe, kainyo eningitoe ngesi dang elope torieb.