Read turkana Ngieburaniae 4 Bible Online

Ngieburaniae 4 - turkana bible

Ngieburaniae 4

¹Nakaneni tokona, ani eringa akichikakinet nalomaret nikiangaret keng eyei, ejoikinit ngoni kichoikin sodi nyeerukaun tani ipei yok kebuchar anakichikakinet anakisiangarere.

²Kainyo kiira ngoni Ngakiro Naajokak a Akuj loger lo eirareta kesi. Nakaneni na eirareta kesi ngakiro nguna, emam ibore niajokon aanyut kesi kainyo awounete achamun akiroit ngina tonupa.

³ Ani ngoni lu kinupit ngakiro a Akuj, kianyuni akisiangaro na kichikakini Akuj. Ikoni eger lo alimuni ngesi tama, “Ekongi ayong anangoit kang, ‘Nyelomarete kesi nakwap na adikino ayong esiangunea kesi!’ ” Alimuni ngesi nguna tani sek edauna etich keng napei kolong jik asubea ngesi akwap.

⁴Kainyo igiritae wache anagiran ngakiro a akolongit ana a ngikan-kaarei kona, “Sodi kianga Akuj alotichisio keng kadaang akolongit na a ngakan-kaarei.”

⁵Alimunitoe ngakiro napei nguna nabo kona, “Nyelomarete kesi nakwap na adikino ayong esiangunea kesi.”

⁶Peanyunete kolong lu eirarete Ngakiro Naajokak a Akuj ekingaren akisiangaro ngina kotere ni peanupitotor ngakiro a Akuj. Nakaneni eyakasi ngiche lu echamakinitae eanyunete.

⁷Idodiunitae nu ani aseunea Akuj achekolongit na enyaritae “Akolongit na.” Ngirwa ngikaalak ekisidi, kiruor ngesi ngakiro a akolongit kangina ani a Daudi anagiran anatete kanu, “Ani kiirasi esi etoil a Akuj akolongit na, nyiitogogongo ngitai kus.”

⁸Arai kisianga Yochua ngitunga loger lo echikakinitor Akuj, pekiruorit Akuj ekisidi ngakiro a akolongit a ache.

⁹Kongina bocha, eringa eyei akiangar lotunga a Akuj na ikoni akiangar na eangarea Akuj akolongit na ngikan-kaarei.

¹⁰Kainyo, itwaan cha daang ni eanyuni akiangarit nakichikakinit Akuj, iangari alotich keng loger lo eangarea Akuj alo keng.

¹¹ Ejoikinit tokona robo ngoni kirichakin atolomasi nakiangar sodi nyeewolio tani itwaan ipei loger lo kolong awoliyoreta kesi ani peanupitotor ngakiro a Akuj.

¹²Eyari Akiroit a Akuj eyei agogongu. Idwangit akwanis keng tani na a ekileng alo ipenitae ngiwaitin ngiarei. Edungi tanang tani ni etiakatar etau ka nikiyenget kori ni etiakatar ngakoyo ka akimiet a ngakoyo. Eyenuni ngitamen ka ngakiro na iitanito ngitunga.

¹³Emam ibore idayo ani eyei Akuj, ileere ibore daang ni esubit ngesi etakani anikeng. Erai ngesi kilimokini ngoni ngakiro daang na kisubi.

¹⁴Ejoikinit ngoni kirubakini jik kinupit ngakiro a Akuj. Kainyo eyei Emuron yok Loapolon noi lo anangit Nakuj, lo erai Yesu lokookeng a Akuj.

¹⁵Erai Emuron yok loapolon a Akuj lo isieni eboyor a apalagu yok. Emuron Loapolon a Akuj ngolo, eningitoe alowaitin kadaang loger yok nakaneni nyesecha ngesi.

¹⁶Atotitinyeketo robo erudaros napolou na a ajokis a Akuj. Kianyuni ngoni ngisien kaneni ka ajokis na kingarakini ngoni esaa lokiitanitor.