Read turkana Ngieburaniae 5 Bible Online

Ngieburaniae 5 - turkana bible

Ngieburaniae 5

¹Eseunio Emuron Loapolon a akai a Akuj daang, sodi tosubanakinea Akuj etich kotere ngitunga, tolemuununea ngalemunet ka ngakipeyos kotere ngasechesea.

²Kona epalagagea ngesi elope a ngirotin a ngikaalak, epataner ngesi alukabangaanak ka lu ichwanganakinete.

³Ani kona epalagagea ngesi elope, ipeye ngesi ngakipeyos, meere kotere ngasechesea a ngitunga make, erai kotere tani ngasechesea keng a elope.

⁴ Nyeseun itwaan bon tama kepuruun atoliwor Emuron Loapolon a akai a Akuj, erai Akuj alope enyarae itwaan kitiliwo Emuron Loapolon a Akai a keng, loger lo kolong a Aron.

⁵Aloger alopei kangolo, nyesaka Kiristo kepuruun ngesi atoliwor Emuron Loapolon a Akuj, arai Akuj alimokini ngesi tama, “Irai iyong Lokookang, aliwor ayong akolongit na Apakon.”

⁶ Tolim nabo ngesi na igiritae wache tama, “Iliwor iyong emuron a akai a Akuj jik. Iwapap ka eger a Emuron a akai a Akuj alo enyaritae Melikisedek.”

⁷Na ebooyo Yesu anakwap, agasi ngesi Akuj kilipeene irema, kigoro ngakiyo cholae ani a Akuj ana adikino eyuuni ngesi anakitu. Kona etiditeunor ngesi tomina Akuj noi, kiira Akuj ngakiro keng.

⁸Nakaneni tani bo erai ngesi Lokookeng a Akuj dang, etatama ngesi akiwap ngakiro a eger alo aboliare.

⁹Na etiliworere ngesi lo ikiuna, toliwor akisiakinet a ayuuno ana nyedaun kadaang alu iwapete ngesi,

¹⁰sodi tolim Akuj atamar erai ngesi Emuron Loapolon a akai a Akuj iwapap ka eger a emuron akai a Akuj alo enyaritae Melikisedek.

¹¹Eya nakaalak na ejoikinit kilimuni anakiro kanu, nakaneni etiono akisisakin esi kainyo nyebeben esi akiyen.

¹²Napei kolong jik ajoikinit esi iliworosi ngiketatamak, nakaneni eringa esi isakete itwaan iche kitatam esi ngakiro na isiaunio kitatamae anakiroit a Akuj. Ajoikinit esi ikote ngitunga lu imujete akimuj, nakaneni ikote tokona esi ngitunga lu emaase ngakile.

¹³Itwaan daang ni eringa emasi ngakile, eringa erai ikoku, nyeyeni eger a ngakiro ana eteniyete ka na ichwangakina.

¹⁴ Nakaneni, erai akimuj aka ngitunga aluapolok alu ayan kolong epit lo etiaketa ngakiro naajokak ka naaronok.