Read turkana Ngieburaniae 6 Bible Online

Ngieburaniae 6 - turkana bible

Ngieburaniae 6

¹Atoloto tokona ngaren emiekisi ngakiro na isiaunio kitatam anakiroit a Akuj. Nyejoikinit tokona nabo kibongokini etatama ngakiro na kolong esiaunio akitatam na ikote na akilung ngakiro na erikito akitu dio atonupa ngakiro a Akuj.

²Nyikibongok akitatam ngakiro a akibatiso ka akidokokin ngakan, ka ayarun a ngikatoak ta eriras lonyedaun.

³Atoloto ngaren! Kikokini neni erai kichamak Akuj.

⁴Ikokinete ngitunga lu eyenete ngakiro a Akuj nasek anupito kesi elungete nabo akisech kech ai? Ayakasi sek kesi nakicha a Akuj, eirito kesi ainakinet a Akuj sodi taanyut tani Etau a Akuj.

⁵Apot toyena aloboyor kech atamar ejok akiroit a Akuj ka nabo agogongu a akwap ana isidiun.

⁶Ani erumor tapalikis kesi anupit ngakiro a Akuj! Etieno abuun kesi tolunga ngasechesea kech nabo, kainyo eramakinito kesi nabo Lokookeng a Akuj napir itaanyunito ngesi ngileech lu ileerete.

⁷Epiari Akuj ngalup na ijijiyete ngakipi a akiru ana erami sodi kituruput ngalup nguna ngikinyam lu iteyarito ngitunga.

⁸ Nakaneni ani keruput ngiikwa ka edoan, eliworosi pas. Eliwor ibore ni edikino Akuj ilami sodi kinyasunae a akim.

⁹Nakaneni ani tani kiruoro kona ngipaalon luminan, kigieno sua lokojokon ngakiro a eboyor kus. Kiyeni atamar ianyutu esi apiaro naajokon noi na a ayuuno kus.

¹⁰Kainyo meere Akuj na nyitiriyani ngakiro. Nyimuriakini ngesi etich lo isubete esi, kori amina na idodiunete esi ani ingarakineta nabo toringa ingarakinito lu italeuno a Akuj.

¹¹Ibore ni kimuit sua ngesi akingolikin atamar erubakinit ipei kus daang irichakina jik sodi toliworotor ngakiro na igienosi esi ngaka iteni.

¹²Nyikisaki sua esi takalanyeketa, nakaneni kisaki esi tarata lu inupito ngakiro a Akuj, nabo inaikinito sodi taanyuneta nakichikak Akuj.

¹³Na echikakinea Akuj Aburaam akichikakinet, kona amamakar iche apolot edwangit ngesi, tolim ngesi ekiro keng a alope na ekongio.

¹⁴Tolim ngesi tama, “Kechikakinit iyong atamar kapiari iyong kainak ngalesea nakaalak.”

¹⁵Na anaikinea Aburaam nguna, sodi taanyu na echikakinit Akuj.

¹⁶Na ikongio itwaan, elimuni ekiro a itwaan ani epolot noi idwangit ngesi, dio torumo akikong ngina ngakiro daang na epegae.

¹⁷Arumori Akuj akichikakinet keng a akikong, aloger kangolo kidodik ngesi ileere lu echikakinitae atamar nyilochi ngesi na esaki ngesi.

¹⁸Nakaneni eya ngakiro naarei nu, akichikakinet ka akikong, nyilochokinosi kori nyelimunio Akuj alioko jik. Nakaneni ngoni lu kolong kibuchun nakiyar keng, kianyu atitinyu nakirubakinea kiwapit akigieno na eyei ngaren yok.

¹⁹Etenoono dir akigieno ngina alotau yok loger a amoru ana itowei atubwa ananam. Iporit akigieno ngina aworu na iriwokina kiding Akai na a Akuj na eyei nadis, tanang tooma.

²⁰ Esiau Yesu aloma inaa kotere ngoni, nakaneni aliwor Emuron Loapolon a akai a Akuj nakajik, iwapap ka eger a emuron a akai a Akuj aloapolon alo enyaritae Melikisedek.