Read turkana Ngieburaniae 7 Bible Online

Ngieburaniae 7 - turkana bible

Ngieburaniae 7

¹Arai Melikisedek ekapolon a akwap a Salem, tarai Emuron Loapolon a akai a Akuj Anaapolon Noi. Ani na abongunio Aburaam alojie alo aarea ngikapolok a ngakwapea anache, kiriamuni ngesi ka Melikisedek lo apiari ngesi

²nak Aburaam ngesi alemikinet apei anatomon a ngiboro kadaang alu atingit ngesi. (Eger lo ekingaren a ekiro be Melikisedek ngesi atamar “Ekapolon a ateneanut” na kona araakar ngesi ekapolon a akwap a Salem, ekiro nabo keng eyei eger lo atamar, “Ekapolon a Ekisil”.)

³ Nyelimitoe apakeng ka itiokeng kori nyelimitoe tani ngiyenet keng, kori nyelimunitoe tani atamar edounio kori atoani wori. Ikwaan ngesi ka Lokookeng a Akuj, nabo erubakini erai emuron a akai a Akuj jik.

⁴Kitama mono esi eger lo ayenikinitere ngesi noi. Ainakini Aburaam lo erai apaayok loapolon ngesi alemikinet apei anatomon a ngiboro kadaang alu aanyuni ngesi alojie.

⁵Kiyen dang atamar Alotal yok, echamakinit ngide a Lawi lu eraakasi ngimurok a akai a Akuj idiaunete alemunet apei anatomon alotunga a Isirael. Ikote kesi neni tarai bo ngitunga ngulu ngika a akwap kech. Ani nabo eraakasi ngitunga a akwap kech, eraakasi nabo dang ngalesea ka Aburaam.

⁶Pearai Melikisedek ales a Lawi, nakaneni ediauni alemunet apei anatomon ani a Aburaam sodi topia ngesi lo kolong aanyuni ngakichikakinet a Akuj.

⁷Idodiunito ngakiro nguna atamar epolot noi lo epiari idwangit lo epiario.

⁸Alowae a ngimurok a akai a Akuj, idiaunete ngitunga lu etoakeenete alemunet apei anatomon, nakaneni alowae a Melikisedek, ediauni itwaan ni eyari alemunet apei anatomon loger lo igiritere nagiran.

⁹Ikoni ibore ngini atamar, na alemunea Aburaam alemunet apei anatomon, abu Lawi dang (lo idiaunete ngalesea keng alemunet apei anatomon) tolem.

¹⁰Kainyo aringa Lawi nyidouno, nakaneni ikoni ibore ngini atamar aringa ngesi eyei nakwaan ka apaakeng Aburaam na eriamunotor ngesi ka Melikisedek.

¹¹Ainakini Akuj Ngisirael etal iwapap ka eger a ngimurok a akai a Akuj alu a ekitela a Lawi. Arai kolong kikiuna etich lo a ngimurok a akai a Akuj, pakesakitae emuron eche a akai a Akuj lo etupuuni Melikisedek ebuni, meere lo etupuuni Aron.

¹²Kainyo na ilochere Ngimurok Luapolok a akai a Akuj, ejoikinit etal dang ilochio.

¹³Ani Ekapolon yok lo elimunitere ngakiro nu, arai eka a ekitela a eche, emam itwaan iche alokitela keng arai emuron a akai a Akuj.

¹⁴Eyenio daang atamar edounio ngesi erai eka a ekitela a Yuda, tarai bo nyelimuno Musa ekitela ngolo na eruoror ngakiro a ngimurok a akai a Akuj.

¹⁵Ileereunete ngakiro nguna noi na ebunio emuron a Akai a Akuj eche lo ikwaan ka Melikisedek.

¹⁶Pealiwor Melikisedek Emuron Loapolon a akai a Akuj a eger a ngitalio a ngitunga nakaneni aliwor kotere agogongu na akiyar ana nyesaluni.

¹⁷Kainyo igiritae nagiran atamar, “Iliwor iyong emuron loapolon a akai a Akuj jik, iwapap ka eger a emuron a akai a Akuj alo enyaritae Melikisedek.”

¹⁸Nakaneni ikisario etal longorot, kainyo amam ibore kitaanyuni arai pas.

¹⁹ Kainyo amam ibore ikiuni etal a Musa. Kianyu tokona ngoni akigieno naajokon noi nakirudunor ngoni nia a Akuj.

²⁰Ani kanguna dang, eyei akikong a Akuj. Nakolong aliwonorotor luche ngimurok a akai a Akuj, amam ngikong.

²¹ Nakaneni ekongi Akuj na aliworor Yesu emuron a akai a Akuj tolim tama, “Ekong Ekapolon nakaneni nyilochi ngitamen keng, ‘Iliwor iyong emuron a akai a Akuj jik.’ ”

²²Ibore ni etiakit nguna loger ngolo ngesi etiliwo Yesu ekaweikinan a achamunet anaajokon noi.

²³Eya nabo ngakiro ngache na etiakito, alalak ngimurok a akai a Akuj luche ngulu, kainyo atoakeenete, peadikino erotokinito jiik akisub ngitichisio kech.

²⁴Nakaneni nyikwaan Yesu ka kesi, eyari ngesi jik nabo aliwor ngesi emuron a akai a Akuj jiik.

²⁵Kongina bocha, epedori ngesi jiik ayuun daang lu epote nia Akuj itorunito nikeng, kainyo eyari ngesi jik ilipeene Akuj kotere kesi.

²⁶Nakaneni Yesu tokona erai Emuron Loapolon a akai a Akuj lokingarakini ngoni nakichanar. Erai ngesi lo italeuno, lo nyichwanganakini kori nyesecheene, atiak ngesi ka ngikasechak epuruun ka akikear kidiama adis.

²⁷Nyejoikinit mono ngesi ipeyoe Akuj akolongit daang kotere ngasechesea keng ani erumor kipeye kotere lu a ngitunga aluche, loger lo a Ngimurok Aluapolok a akai a Akuj aluche. Alemuni kolong ngesi akipeyos apei kotere ngitunga daang, nakolong alemunor elope.

²⁸ Alotal a Musa, eseunio ngitunga lu nyikiuna tarata ngimurok luapolok a akai a Akuj. Nakaneni akichikakinet a Akuj na echikakinio kikongoi ekisidi a etal, ngesi eseunitere Lokookeng a Akuj lo kolong ekiuna jik.